ජනාධිපති මෛත්‍රීගේ ප්‍රකාශ ජනමාධ්‍යවේදීන්ට එරෙහි අපරාධ පරීක‍්ෂණ වලට අකුල් හෙලීමකි..! – මාධ්‍ය සංවිධාන වල විරෝධය

(10.03.2017 – 22:10 +0530 – lankaenews.com)

ශ්‍රී ලංකාවේ ජනමාධ්‍යවේදීන්ට එරෙහිව සිදු වූ අපරාධ පිළිිබඳ පරීක්ෂණ කඩිනම් කොට ඔවුන්ට යුක්තිය ඉටු කිරීම හා අපරාධකරුවන්ට දඬුවම් ලබා දීම වෙනුවෙන් දිගින් දිගට ම පෙනී සිටින මාධ්‍ය සංවිධාන පසුගිය අවස්ථා කිහිපයක දී ම ජනාධිපති මෛත්‍රීපාල සිරිසේන මහතා එම අපරාධ පරීක්ෂණ අධෛර්යමත් කිරීමට තුඩු දෙන අයුරින් පළ කරන ලද අදහස් පිළිබඳව දැඩි කනස්සල්ල පළ කර සිටී.

ජනාධිපතිවරයා මෙන්ම වෙනත් ප්‍රධානීන් කිහිප දෙනෙකු ද අවස්ථා කිහිපයක දී ම එවැනි අදහස් පළ කළ අතර, පසුගිය දා පලාලි ගුවන් හමුදා මූලස්ථානයේ උත්සවයක් අමතමින් ජනාධිපතිවරයා සිදු කරන ලද ප්‍රකාශය ද එහිම දිගුවක් බව එක් මාධ්‍ය සංවිධානයක් වන නිදහස් මාධ්‍ය ව්‍යාපාරය පවසයි.

මෙරට ආරක්ෂක අංශයේ යම් යම් ක්‍රියාකාරීත්වයන් සම්බන්ධයෙන් ජාතික මෙන්ම ජාත්‍යන්තර වශයෙන් ද එල්ල වන චෝදනා  පිළිබඳව සඳහන් කරමින් ඒ සියල්ල රාජ්‍ය නොවන සංවිධානවලින් නැඟෙන චෝදනා බවට ලඝු කරමින් ජනාධිපතිවරයා එහි දී කියා සිටියේ තමන් ඉතා පැහැදිලිව යුධ, නාවික, ගුවන් යන ත්‍රිවිධ හමුදාවත්, පොලිසියේ සියලු දෙනාත් ඉතාමත් වගකීමෙන් ආරක්ෂා කරන බවය. ජනාධිපතිවරයා සේනාධිනායකයා වශයෙන් එබඳු ප්‍රකාශයක් සිදු කිරීම සාමාන්‍ය තත්වයෙහි ලා සැළකිය හැකි වුව ද, වරින්වර මෙබඳු ප්‍රකාශ මගින් කරනු ලබන අවධාරණයන් ගැටලුකාරී ප්‍රකාශයන් ලෙස අප දකින්නේ රටේ පවතින සන්දර්භයට සාපේක්ෂවය.

ජනමාධ්‍යවේදීන්ට හා ජනමාධ්‍ය ආයතන ගණනාවකට එරෙහිව සිදු වූ අපරාධ පිළිිබඳ චෝදනාවලට සමහර ආරක්ෂක අංශ සාමාජිකයින්ගේ නම් සම්බන්ධ වී තිබේ. අද වන විට එම පරීක්ෂණ සියල්ල තිඛෙන්නේ එක තැන හිර වූ තත්ත්වයකය. මෙම පරීක්ෂණ කඩිනම් කොට වින්දිතයින්ට සාධාරණය ඉටු කරන ලෙස කරන ඉල්ලීම රාජ්‍ය නොවන සංවිධාන කිහිපයක පටු ඉල්ලීමකට ලඝු කළ නොහැකිය. එය පුළුල් සමාජ ඉල්ලීමකි.

එබඳු සන්දර්භයක් තුළ ඉහත කී පුළුල් සමාජ ඉල්ලීම ගර්හාවට ලක් කරමින් වරින්වර කරනු ලබන මෙවැනි ඇතැම් ප්‍රකාශ මෙන්ම ඊට සමාන්තරව ගනු ලබන ඇතැම් පියවර මගින් ද සිදු වන්නේ දැනටමත් එක තැන හිර වී තිබෙන නීත්‍යානුකූල පරීක්ෂණ කටයුතු තවදුරටත් අඩාල වීමය. එසේම වින්දිතයින්ට යුක්තිය ඉටුවීම පිළිබඳව පවත්නා මහජන විශ්වාසය තවදුරටත් පළුදු වීමය.

මෙවැනි තත්ත්වයක් යටතේ ජනාධිපතිවරයා විසින් සිදු කරන ලද ඉහත ප්‍රකාශය පිළිබඳව දැඩි කනස්සල්ල පළ කරන නිදහස් මාධ්‍ය ව්‍යාපාරය, මෙම පරීක්ෂණ කඩිනම් කොට ප්‍රචණ්ඩත්වයට ගොදුරු වූ මාධ්‍යවේදීන් සහ මාධ්‍ය ආයතන ඇතුලු සියලු වින්දිතයින්ට සාධාරණය ඉටු කරන ලෙස දැඩිව ඉල්ලා සිටී ෴

********************* ( නැවත මුල් පිටුවට ….. )

ප්‍රතිචාරයක් ලබාදෙන්න

ඔබගේ ඊමේල් ලිපිනය ප්‍රසිද්ධ කරන්නේ නැත. අත්‍යාවශ්‍යයය ක්ෂේත්‍ර සලකුණු කොට ඇත *