කථානායක කරු-මයාට අත්තන ඇට කැවිලද? අමාත්‍ය විමල් වීරවංශ අසයි

(17.11.2018 – 18:59 +0530 – sinhala.adaderana.lk)

කථානායකට අත්තන ඇට කැවිලද? අමාත්‍ය විමල් වීරවංශ අසයි

ආණ්ඩුවට එරෙහිව විශ්වාසභංග යෝජනාවක් ඉදිරියටත් ගෙන එන්නේ නම් ජනාධිපතිවරයා එක්සත් ජාතික පක්ෂයට ඒ සම්බන්ධයෙන් කොන්දේසි තුනක් පනවා ඇතැයි බුද්ධ ශාසන හා ආගමික කටයුතු අමාත්‍ය උදය ගම්මන්පිල මහතා පවසයි.

අද (17) පැවති ආණ්ඩු පක්ෂයේ මාධ්‍ය හමුවට එක් වෙමින් ඒ මහතා මේබව සඳහන් කළේය.

එහිද අදහස් දැක්වු ආයෝජන ප්‍රවර්ධන හා ජාත්‍යන්තර වෙළඳ අමාත්‍ය බන්දුල ගුණවර්ධන මහතා පැවසුවේ අසම්මත ආකාරයට විශ්වාසභංගය සම්මත කර ගත් ආකාරයටම ඉදිරියේදි ෆෙඩරල් ව්‍යවස්ථාවත් එක්සත් ජාතික පක්ෂය ඒ ආකාරයටම සම්මත කර ගනු ඇති බවයි.

එමෙන්ම නිවාස හා සමාජ සුබසාධන අමාත්‍ය විමල් වීරවංශ මහතා පැවසුවේ කථානායකවරයා පවසන පරිදි ආණ්ඩුවක්, අගමැතිවරයෙක් අමාත්‍ය මන්ඩලයක් නැත්නම් එක්සත් ජාතික පක්ෂ විසින් විශ්වාසභංගයක් ගෙන එන්නේ කාට විරුද්ධව ද යනුවෙන්ය.

කථානායකවරයා මෙලෙස හැසිරෙන ආකාරයෙන් අනුව ඔහුට අත්තන ඇට කැවිලද යන්න සිතෙන බවද අමාත්‍යවරයා එහිදි පැවසීය.

වැඩිදුරටත් අදස්දැක්වු අමාත්‍යවරයා පැවසුවේ මේ දිනවල එක්සත් ජාතික පක්ෂයේ මන්ත්‍රීවරුන් හැසිරෙන්නේ මද කිපුණු අලි මෙන් බවයි.

++++++++++++++++++++++++

කථානායකවරයා හැසිරුනේ තෙමුන ඌරුමීයෙක් වගේ

(17.11.2018 – 16:54 +0530 – sinhala.adaderana.lk)

විනාඩි 10 ක් වත් ගත වීමට පෙර මහින්ද රාජපක්ෂ මහතාට එරෙහිව ඉදිරිපත් වූ විශ්වාසභංගය කථානායකවරයා භාර ගත් බවත් වසර 25 ක් පාර්ලිමේන්තුවේ සිටියත් කිසිදාක මෙසේ සිදුවී නොමැති බවත් පාර්ලිමේන්තු මන්ත්‍රී ලක්ෂ්මන් යාපා අබේවර්ධන මහතා පැවසීය.

ශ්‍රි ලංකා පොදු ජන පෙරමුණ පක්ෂ කාර්යාලයේ අද (17) පැවති මාධ්‍ය හමුවකදී ඔහු මෙසේ ප්‍රකාශ කළේය.

අධිකරණයේ නඩුවක් පවතිද්දී කථානායකවරයා පාර්ලිමේන්තුවේ එයට පිටුපාමින් ක්‍රියා කළ බවත් පාර්ලිමේන්තුවේ ඇතිව තිබෙන නොසන්සුන් කාරී තත්ත්වය පාලනය කර ගැනීමට නොහැකි නම් ගෞරවයෙන් යුතුව ඉල්ලා අස්විය යුතු බවත් මන්ත්‍රීවරයා ප්‍රකාශ කළේය.

සිදුවූ අපකීර්තියේ හතරෙන් තුනක වගකීම කථානායකවරයා භාර ගත යුතු බවත් ද මන්ත්‍රීවරයා එහිදි පැවසීය.

එසේම මන්ත්‍රීවරයා ප්‍රකාශ කළේ ඉදිරියේදී මංත්‍රීවරුන් තම ආසන වලින් නැඟිට කතානායකතුමාට ගරු නොකිරීමට හෝ ඉඩ පවතින බවයි.

එම මාධ්‍ය හමුව අමතමින් පාර්ලිමේන්තු මන්ත්‍රී සුසන්ත පුංචිනිළමේ මහතා පැවසූවේ ඉතිහාසයේ පළමු වරට එක්සත් ජාතික පක්ෂයේ පිරිස මෙලෙස අශෝභන ලෙස හැසිරේමින් හූ කියන තත්ත්වයක් ඇති වූ බවත් එම තත්ත්වයට ඉඩ දී කථානායකවරයා කිසිවක් සිදු නොකර සිටි බවත් ය.

කැලෑ නීතිය අනුව මේ වන විට පාර්ලිමේන්තුවේ වැඩකටයුතු සිදු වන බවත් කථානායකවරයාගේ හැසිරීම පැවතියේ තෙමුන ඌරුමීයෙකු ලෙසින් බවත් ඔහු පැවසීය.

එම මාධ්‍ය හමුව අමතමින් පාර්ලිමේන්තු මන්ත්‍රී පියල් නිශාන්ත මහතා පැවසුවේ පාර්ලිමේන්තු මහලේකම්ට පවා කළකිරී ඇති තත්ත්වයක් මේ වන විට ඇතිවී තිබෙන බවයි.

++++++++++++++++++++++++

++++++++++++++++++++++++

කතානායකට එරෙහිව CID යට පැමිණිල්ලක්

(17.11.2018 – 18:50 +0530 – hirunews.lk/sinhala)

කතානායකවරයා විසින් කූඨ ලේඛන සකසා ජනාධිපතිවරයා නොමග යැවීමට තැත් කර ඇති බව පවසමින් සිවිල් සංවිධාන කිහිපයක නියෝජිතයින් අද අපරාධ පරීක්ෂණ දෙපාර්තමේන්තුවට පැමිණිල්ලක් ඉදිරිපත් කළා.

ඔවුන් එමගින් ඉල්ලා සිටියේ කතානායකවරයාට එරෙහිව නීතිය ක්‍රියාත්මක කරන ලෙසයි.

පසුගිය 14 වනදා අග්‍රාමාත්‍ය මහින්ද රාජපක්ෂට එරෙහිව පාර්ලිමේන්තුව තුළ විශ්වාසභංග යෝජනාවක් සම්මත කළේයැයි පවසමින් කතානායකවරයා ජනාධිපතිවරයා වෙත මන්ත්‍රී අත්සන් ලේඛණයක් ද සමග ලිපියක් යොමුකර තිබුණා.

ඊට ජනාධිපතිවරයා විසින් ද පිළිතුරු ලිපියක් යොමුකළ අතර, එහිදී ජනාධිපතිවරයා සදහන් කර තිබුණේ කතානායකවරයා විසින් එවා තිබූ මන්ත්‍රී අත්සන් ලේඛණයේ මුල් පිටපතෙහි සදහන් පැරණි දිනයක් මකා ඒ මත නව දිනයක් යොදා තිබූ බවයි.

කතානායකවරයා යොමුකර තිබූ මෙම ලිපිය සම්බන්ධයෙන් නීතිය ක්‍රියාත්මක කරන ලෙස ඉල්ලා ලංකා ස්වයංරැකියා වෘත්තීයකයින්ගේ ජාතික ත්‍රිරෝද රථ සංගමයේ සභාපති සුනිල් ජයවර්ධන සහ ආපනශාලා හිමියන්ගේ සංගමයේ ජාතික සංවිධායක අසේල සම්පත් අපරාධ පරීක්ෂණ දෙපාර්තමේන්තුවට අද පැමිණිලි කළා.

රත්නපුර, ජා-ඇල, බොරලැස්ගමුව සහ නිට්ටඹුව නගර වලදී ද අද විරෝධතා පැවති අතර, එහිදී විරෝධතාකරුවන් මැතිවරණයක් පවත්වන ලෙසට මෙන්ම කතානායකවරයාගේ ක්‍රියා කලාපයට විරෝධය පළ කර තිබෙනවා.

මේ අතර, නොච්චියාගම නගරයේදී සහ තඹුත්තේගම නගරයේදී අද විරෝධතාවයක් සංවිධාන කර තිබූ අතර, අනුරාධපුර නගරයේදී ද විරෝධතාවයක් පැවැත්වුණා.

එහිදී කතානායකවරයාගේ අනුරුවකට ගිනි තබමින් විරෝධතාකරුවන් සිය විරෝධය පළ කළ බවයි අප වාර්තාකරුවන් සදහන් කළේ.

+++++++++++++++++++++++++++++++++++++

කථානායක ධූරය අද තරම් හැල්ලුවුණු යුගයක් ඉතිහාසයේ දැක නෑ – කෘෂිකර්ම අමාත්‍ය මහින්ද අමරවීර

(16.11.2018 – 20:59 +0530 – lankadeepa.lk)

කථානායක ධූරය අද තරම් හැල්ලුවුණු යුගයක් ඉතිහාසයේදී දැක නොමැති බවද පාර්ලිමේන්තුව පිළිබඳව විශ්වාසයක් නොමැති වූ දිනයට රටේ දැවැන්ත කැරැළි නිර්මාණය වන බවද කෘෂිකර්ම අමාත්‍ය මහින්ද අමරවීර මහතා කියයි.

අමාත්‍යවරයා මෙසේ පැවසූයේ කසාගල පුරාණ රජමහා විහාරයේ පැවැති පූජෝත්වසයකට අද (16) සහභාගී වෙමිනි.

“මම පාර්ලිමේන්තුවට ගියේ 1994 වර්ශයේදී. මම ඊට පෙර අහල තියෙනවා මොලමුරේ මැතිතුමාගෙන් ආරම්භ වූ පාර්ලිමේන්තුවේ කථානායක ධූරය අද තරම් හෑල්ලු වුණු යුගයක් මේ ඉතිහාසයේදී මම දැකල නැහැ.

ගරු අග්‍රාමාත්‍යතුමා පත්වීම පිළිබඳව සම්පූර්ණයෙන් ව්‍යවස්ථාවට අනුවයි ඒ කටයුත්ත සිදු වුණේ. ජාතික ආණ්ඩුවක් තිබුණා. කැබිනට් මණ්ඩලය හතලිස් පහක් හිටියා. එක්සත් ජනතා නිදහස් සන්ධානය ජාතික ආණ්ඩුවෙන් ඉවත් වුණා. මම ලිපියක් ඉදිරිපත් කරල ගත්ත තීන්දුව අනුව රටේ ඇති වුණු අරාජිකත්වය, රාජ්‍ය දේපල විකිණීම, රට විදේශීයකරණය, නීතිය ක්‍රියාත්මකවීම පිළිබඳව තිබුණු ගැටළු නිසායි අපි ඒ තීන්දුව ගත්තේ.

ඒ ලිපිය මම ඉදිරිපත් කරනවාත් සමඟම ජාතික ආණ්ඩුව අවසන් වෙනවා. අගමැතිවරයා ප්‍රමුඛ කැබිනට් මණ්ඩලය විසිරෙනවා. ඒකයි නීතිය. ඒ අනුව නව අග්‍රාමාත්‍යවරයා විදියට මේ රට බේරගත්ත, මේ රටේ වැඩිම ජනතා ප්‍රසාදය හිමිවුණ නායකයා විදියට මහින්ද රාජපක්ෂ මැතිතුමා දිවුරුම් දෙනවා. ඒ දිවුරුම් දීම සම්පූර්ණයෙන් ව්‍යවස්ථාවට එකඟයි. සම්පූර්ණයෙන් රටේ නීතියට එකඟයි. ඒ පිළිබදව හිටපු අග්‍රාමාත්‍යවරයාත් දන්නවා. ඒ නිසායි එතුමන්ලා අධිකරණයට ගියේ නැත්තේ. නැත්නම් ඒකට අධිකරණයට යන්න තිබුණා. ඕනෑම කෙනෙකුට අධිකරණයට යන්න පුළුවන්. නමුත් එහෙම ගියේ නැහැ. අධිකරණයෙන් විවිධ පුද්ගලයින් අර්ථ නිරූපන ඉල්ලා සිටියත් ඒවා වැඩක් වුනේ නැහැ කියල අපි දන්නවා. මේ ප්‍රශ්නය පිළිබඳව කටයුතු කිරීම සම්බන්ධයෙන් එතුමා ඇතුළු ඇමති මණ්ඩලයට පැවරිලා තිබුණා.

පාර්ලිමේන්තුවේදී කතානායකවරයාගේ හැසිරීම පිළිබඳව ගැටළුවක් තිබුණා. ජනාධිපතිවරයාට පැවරිලා තිබුණු බලතල අනුවයි පාර්ලිමේන්තුව කල් තිබ්බේ. ඒ කල් තිබ්බම නැවැත ජනාධිපතිවරයා කථානායකවරයා එක්ක කළ සාකච්ඡාවට පක්ෂ නායක සාකච්ඡාවට මම පළමු වතාවට ගියා. එහිදී එතුමා අග්‍රාමාත්‍ය ධූරය පිළිගත්තා. ආසන පනවන්න කාර්යාලය දෙන්න. ඒ කටයුතු කරන්න එකඟ වුණා. නමුත් දවස් හතරක් යද්දී එතුමා සම්පූර්ණයෙන් වෙනස් වුණා.

අපිට හිතාගන්න බැරිවුණා අපිත් එක්ක කථා කළ ඒ කරු ජයසූරිය මහත්තයත් ඊට පස්සේ කථා කළේ කියලා. ඊට පස්සේ වෙනම මාධ්‍ය නිවේදනයක් නිකුත් කරනවා. එතුමා සුපුරුදු පරිදි කටයුතු කරන්නේ නැතුව සම්ප්‍රදායට පිටින් ගිහිල්ලා එක්සත් ජාතික පක්ෂයේ මන්ත්‍රීවරයෙක් කියන හැඟීමෙන් කටයුතු කරන්න පටන් ගන්නවා. එතන ඉඳලා තමයි ජනාධිපතිතුමාට දැනුනේ පාර්ලිමේන්තුවේ ගාලගෝට්ටියක් ඇති වෙනවා කියලා.

මොකද සම්පූර්ණයෙන් ව්‍යාවස්ථාවට පිටින් පාර්ලිමේන්තු සම්ප්‍රදායට පිටින් කටයුතු කරන බව පෙනී ගියා. ඒ නිසායි ජනාධිපතිතුමා පාර්ලිමේන්තුව විසිරුවන්න කටයුතු කළේ. සම්පූර්ණ ව්‍යාවස්ථාවට අනුවයි ඒ තීන්දුව ගත්තේ. නමුත් අධිකරණයට තාවකාලියකව අත්හිටුවීමක් කළේ. ඒකෙන් හැඟවෙන්නේ නැහැ නැවත පාර්ලිමේන්තුව කැඳවන්න බලයක්. අග්‍රාමාත්‍යවරයාගේ විශ්වාසභංගයක් ගැන කතා කරන්න. එහෙම අවකාශයක් දුන්නේ නැහැ පාර්ලිමේන්තුවේදී. අධිකරණ නියෝගයේ කිසිම තැනක තිබුණේ නැහැ නැවත පාර්ලිමේන්තුව කැඳවන්න අග්‍රාමාත්‍යතුමාට විශ්වාසභංගයක් ගේන්න කථාවක්. තාවකාලිකව අත්හිටුවීමක් කලා පමණයි. අධිකරණ නියෝගයටත් එහා ගිහිල්ලා කථානායකවරයා පාර්ලිමේන්තුව කැඳවන්න තීරණය කළා. ඒකත් කැඳවලා සම්ප්‍රදායට පිටින් විශ්වාසභංග යෝජනාවක් භාරගන්නවා. පාර්ලිමේන්තුව රැස්වුණාටත් පස්සේ විජිත හේරත් මන්ත්‍රීවරයා ඇවිල්ලා ගේනවා විශ්වාසභංග යෝජනාවක්.

මම දැකල තියෙනවා අනූගණන් වල විශ්වාසභංග යෝජනා ගෙනාවා. විශ්වාසභංග යෝජනා ගෙනත් භාර දීලා පක්ෂ නායක රැස්වීම් කැඳවලා ඊළගට දින නියම කරලා ඊටත් පස්සේ දවසක විවාදයක් තිබ්බා. දැන් මේ මොකක්ද. අපි දැක්කෙත් නැහැ ඒ ලියවිල්ල. විවාදයක් තිබුනෙත් නැහැ. යෝජනාව සම්මත කරන්න යනවා.

මේක පාර්ලිමේන්තුවක්ද මාළු කඩයක්ද කියල හිතාගන්න බැහැ. මෙතන කථානායකවරයා ලියවිල්ලක් දුන්නා කිව්වා. ඊට පස්සේ යෝජනා සම්මත කරනවා. සම්පූර්ණයෙන් එය නීත්‍යානූකූල නොවන අයුරින් එය කළේ. ඊට පස්සේ සද්දෙට අනුව සම්මත කරන්න හැඳුවා. අද ශබ්දය බැලුවා නම් අපේ පැත්තයි වැඩි. ආණ්ඩු පක්ෂයේ තමයි අද ශබ්දය වැඩි. ශබ්දයට යෝජනා සම්මත කරනවා. මේව මහ විහිළු.

පාර්ලිමේන්තුව ගැන විශ්වාසයක් නැති වුණු දවසට රටේ ඊළගට දැවැන්ත කැරැළි නිර්මාණය වෙනවා. ජනාධිපතිතුමා මේ අනතුර දැක්කා. මේ ලේ හැලීම් දැක්කා. ඊයේ අපේ හතරදෙනෙක් තුවාල වුණා. පිහි අරගෙන දෙන්නෙක් ආවා.

මම දැක්කා ෆේස්බුක් වල දාලා තියෙනවා තෙවරක් නෙවෙයි සියවරත් පෙරුවත් මේ වගේ මිනිහෙක් හොයාගන්න නැහැ කියලා. ඇත්ත මේ වගේ පිස්සෝ හොයාගන්න අමාරුයි සියවරක් පෙරුවත්. මම නම් හිතන්නේ මොළය පරික්ෂා කරන්න ඕන. හැමදාම ඒ වගේ දේවල් කරන අයයි අද පාර්ලිමේන්තුවට ඇවිත් තියෙන්නේ.

මමත් ගියා පක්ෂ නායක රැස්වීමට. එතනදී පැහැදිලිව කථා වුණා මේව ව්‍යාවස්ථාවට පටහැනියි. අපි මුහුණ දෙන්න සූදානම්. මන්ත්‍රීවරු සල්ලි වලට විකිණුනා. වෙන්දේසි වුණා. නමුත් නීත්‍යානූකූල ක්‍රමයට මෙය එනවා නම් අපි කවුරුවත් අකමැති නැහැ. නව අග්‍රමාත්‍යතුමා එය පැහැදිලිව කිව්වා.

සමාන්‍යයෙන් කියනවා පාර්ලිමේන්තුව හෙටට කල්තිබ්බා කියලා. ඒ කියන්නේ ඊළග පාර්ලිමේන්තු දිනයට කියන එක. පාර්ලිමේන්තුවේ කල් ඉල්ලුවම සති දෙකකින් කල් දෙනවා. ඒ කියන්නේ ගොඩක් කල්. මම දන්නේ නැහැ. මෙහෙම පාර්ලිමේන්තුවක් නම් මම දැකලත් නැහැ අහලත් නැහැ. මේක අරගනෙ හෙට තියෙනවා. ජනාධිපතිතුමා පිළිගත්තේ නැහැ ඒ ඊයේ ඉදිරිපත් කළ ලියුම. එතුමා තව එකක් කියනවා; මම මේ අග්‍රාමාත්‍යවරයත් ඇමති මණ්ඩලයත් පිළිගන්නම් කියලා. මම දන්නේ නැහැ කොහේ තියන බලයක්ද කියලා. කථානායකවරයා මොනවහරි බීල ඇවිල්ලද කියලත් මට සැකයි. එවන් තත්වයක් තුලයි මේ ගැටුම ඇති වුනේ.

එකසැරේටම පොලිසියේ හතලිහක් පනහක් වැටක් බැඳගෙන එනවා. මම මෙලො දෙයක් දැක්කේ නැහැ. කථානායකවරයෙක් මගේ ඇහැට දැක්කේ නැහැ. මමත් එබි එබී බැලුව කොහේහරි මුල්ලකවත් ඉන්නවද කියලා. එහෙමවත් හිටියේ නැහැ. මම ඊළගට කනේ ගහගත්තා. ඒකෙන් සද්දයක් ආවා. මම හිතුවේ කථානායකවරයා කාර්යාලයේ ඉදල මොනවහරි කියනවා කියලා.

මොනවද කියාගෙන කියාගෙන ගියා. කාටවත් තේරුණේ නැහැ කිව්ව දේ. මේක විගඩමක්. අපි හැමෝම ගරු කලා කථානායකවරයාට. හොද බෞද්ධයෙක් විදියට පිළිගැනීමක් තිබුණා. එතුමා අද ඒක අමතක කරලා බටහිර මිතුරන්ට ඕන විදියට ඉටු කරන්න යනවා කියලයි මට නම් පේන්නේ. සුද්දෝ ටිකක් ඇවිත් ඉන්නවා පාර්ලිමේන්තුව බලන්න මේ දවස් වල. ඒ අයටයි පාර්ලිමේන්තුව තියෙන්නේ.

අපි මේ පිළිබඳව කණගාටු වෙනවා. අපි දන්නවා රටේ ජනමතය තියෙන්නේ මහින්ද රාජපක්ෂ මැතිතුමාට. අගමැතිවරයා මේක පැහැදිලිව කිව්වා මේක දෙසිය විසිපහට නෙවෙයි රටේ ජනතාවට දෙන්න කියලා. කවුද ඡන්ද වලට බය. මේ විරුද්ධ පක්ෂය ඡන්ද වලට බයයි. ඡන්දයකට යෑමයි වඩාත් සුදුසු. එතකල් ගරු අග්‍රාමාත්‍යතුමා අග්‍රාමාත්‍යධූරයේ කටයුතු කරනවා.”

+++++++++++++++++++++++++++++++++++++

කථානායකයාගේ සැබෑ සැලසුම නියෝජ්‍ය අමාත්‍යවරයෙක් හෙළි කරයි

(17.11.2018 – nethnews.lk)

කතානායක කරූ ජයසූරිය මහතා සිය බෑනනුවන් වන නවීන් දිසානායක එක්සත් ජාතික පක්‍ෂයේ ඉහළ තනතුරකට ගෙනඒමේ සූදානමක පසු වන බව නියෝජ්‍ය අමාත්‍ය ආනන්ද අලුත්ගමගේ මහතා අද (17) ප‍්‍රකාශ කළා. ඒ, අග‍්‍රාමාත්‍ය කාර්යාලයේ ආණ්ඩු පක්‍ෂය කැදවූ මාධ්‍ය හමුවකට එක්වෙමින්.

“දුර්වල බව මුළු රටම දැනගෙන හමාරයි. කරු ජයසුරිය හදන්නේ තමන්ගේ බැණා වන නවින් දිසානායක පක්ෂයේ ඉහළට ගෙන එන්නයි මේ දුෂ්කර ක්‍රියාව කරන්නේ. ඔහු මේ සෑමදේම විඳගෙන ඉන්නේ ඒ නිසයි”, නියෝජ්‍ය අමාත්‍යවරයා ප්‍රකාශ කර සිටියා.

මෙම මාධ්‍ය හමුවට එක්වූ අමාත්‍ය මහින්ද යාපා අබේවර්ධන මහතා ද අදහස් පළ කළා :

“මේ කථානායකයා රටේ කථානායක ධුරයට සුදුසු නැහැ. අමරපුර නිකායේ බෞද්ධ නායකයෙක් කියලා කියන්න බැහැ. එතුමා වංචාකාරයෙක්, කුඨ ලේඛණ සකස් කරලා තියෙනවා එතුමා. අපි අධිකරණයෙන් ඉල්ලා සිටින්නේ ඉක්මනින්ම මැතිවරණයක් තැබීමට අවසර දෙන්න කියලා, මෙහිදී අමාත්‍යවරයා කියා සිටියා” ෴

********************* ( නැවත මුල් පිටුවට ….. )

ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴

ප්‍රතිචාරයක් ලබාදෙන්න

ඔබගේ ඊමේල් ලිපිනය ප්‍රසිද්ධ කරන්නේ නැත. අත්‍යාවශ්‍යයය ක්ෂේත්‍ර සලකුණු කොට ඇත *