+++++++++++++++++++++++++++++++++++
= මේ පිටුවේ සිරස්තල =
• ඇමති විමල් වීරවංශගේ පාර්ලිමේන්තු දිවියට විසි වසරයි (විඩියෝ)
• මන්ත්‍රී නවීන් නිසා නුවරඑළියේ උණුසුමක් (විඩියෝ)
• විදේශ ලේකම්, මානව හිමිකම් මණ්ඩලයේ සභාපතිනිය හමුවේ – සමඅනුග්‍රාහකත්වය ඉවත් කරගැනීම ගැනත් දැනුම් දෙයි
• මහ මැතිවරණයට අලුතින් ඡන්ද 270,000 ක් – 2019 ඡන්ද හිමි නාමලේඛණය සහතික කර අවසන්
• දක්ෂිණ අධිවේගයේ මාතර – බරවකුඹුක කොටස අද (23) විවෘත වේ
• පොලිස් කොස්තාපල් ඝාතනයට අනියම් බිරිඳ සහ ඩී.මංජුගේ බිරිඳත් අත්අඩංගුවට (විඩියෝ)
• “අපේ ලොකු අම්මා ෆන් ගන්නවා… දවසක සෙට් වෙමුද.?” – කඩවත රාජපක්ෂ රාලහාමිගේ අවසන් ගමන
• අස්වනු රැකගන්න කුඹුරක වුණත් පඹයෙක් හිටවන්න ඕනේ – ප්‍රසන්න රණතුංග
• යාපනය ගුවන්තොටුපල දියුණු කිරීමේ ගිවිසුමට කඩිනමින් අත්සන් තබනවා – ඇමති ප්‍රසන්න රණතුංග
• සතියකට වරක් පාස්කු ත්‍රස්ත ප්‍රහාර සම්බන්ධව වාර්ථාවක් ආරක්‍ෂක ලේකම්වරයාට
+++++++++++++++++++++++++++++++++++
ඇමති විමල් වීරවංශගේ පාර්ලිමේන්තු දිවියට විසි වසරයි
(22.02.2020 – 19:28 +0530 – hirunews.lk/sinhala)
අමාත්‍ය විමල් වීරවංශගේ පාර්ලිමේන්තු දිවියට විසි වසරක් සපිරීම නිමිත්තෙන් අද (22) කොළඹදී විශේෂ උත්සවයක් සංවිධාන කර තිබුණා.
ජනාධිපති ගෝඨාභය රාජපක්ෂ සහ අග්‍රාමාත්‍ය මහින්ද රාජපක්ෂගේ ප්‍රධානත්වයෙන් එය පැවැත්වුණේ නෙලුම් පොකුණ රඟහලේදීයි.
විසි වසරක වීරවංශය, ජාතිකවාදී දේශපාලනයේ පුනරාවලෝකනය ලෙස නම් කර තිබූ එම උත්සවයට පක්ෂ විපක්ෂ දේශපාලනඥයින් රැසක් සහභාගි වී සිටියා.
මෙහිදී විමල් වීරවංශගේ දේශපාලන දිවිය අලලා රචිත විමල් යුගකාරත්වයේ භූමිකාව මැයෙන් වූ කෘතිය මෙන්ම විමල් වීරවංශ සම්බන්ධව නිර්මාණය කෙරුණු ජංගම දුරකථන යෙදවුම ද එළිදැක්වුණා.
1988 වසරේදී ජනතා විමුක්ති පෙරමුණෙන් සිය දේශපාලන දිවිය ඇරඹූ අමාත්‍ය විමල් වීරවංශ වසර 20 කට පසුව එම පක්ෂයෙන් ඉවත්ව ජාතික නිදහස් පෙරමුණ නමැති නව පක්ෂයක් පිහිටුවා ගනු ලැබුවා.
අනතුරුව, එක්සත් ජනතා නිදහස් සන්ධානයේ සහෝදර පක්ෂයක් වූ ජාතික නිදහස් පෙරමුණ මේ වනවිට අග්‍රාමාත්‍ය මහින්ද රාජපක්ෂගේ නායකත්වයෙන් යුත් ශ්‍රී ලංකා නිදහස් පොදුජන සන්ධානයේ ද, සාමාජිකත්වය දරනවා.
අග්‍රාමාත්‍ය මහින්ද රාජපක්ෂ එහිදී අදහස් දක්වමින් කියා සිටියේ විමල් වීරවංශ යනු විරුද්ධවාදීන්ගේ ප්‍රහාරවලට ලක්වූවත්, තමන්ගේ යුතුකම අත්නොහළ දේශපාලන චරිතයක් බවයි.
+++++++++++++++++++++
***************************************
මන්ත්‍රී නවීන් නිසා නුවරඑළියේ උණුසුමක්
(22.02.2020 – 19:23 +0530 – hirunews.lk/sinhala)
නුවරඑළිය ග්‍රෙගරි වැව ආසන්නයේ පවත්වාගෙන ගිය ජංගම අවන්හලක් නාගරික සංවර්ධන අධිකාරිය විසින් ඉවත් කිරිමට යාමේදී ඊයේ (21) පස්වරුවේ උණුසුම් තත්ත්වයක් හට ගෙන තිබෙනවා.
ඒ එක්සත් ජාතික පක්ෂ ජාතික සංවිධායක පාර්ලිමේන්තු මන්ත්‍රී නවීන් දිසානායක එම ස්ථානයට පැමිණීමත් සමගයි.
නුවරඑළිය – ග්‍රෙගරි වැව ආසන්නයේ අවුරුදු තුනක කාලයක සිට පවත්වාගෙන ගොස් ඇති එම ජංගම අවන්හලේ බදු කාලසීමාව පසුගිය දෙසැම්බර් මාසයේදී අවසන් වී තිබෙනවා.
ඒ අනුව, අදාළ අවන්හල ඉවත් කර ගන්නා ලෙස අවස්ථා කිහිපයකදී දැනුම්දී තිබුණ ද එය ඉවත් කර නොගැනීම නිසා නාගරික සංවර්ධන අධිකාරියේ ප්‍රධාන කාර්යාලයේ අනවසර ඉදිකිරීම් ඉවත් කිරීමේ ඒකකයේ නිලධාරින් කණ්ඩායමක් එම ස්ථානයට පැමිණ ඇත්තේ එය ඉවත් කිරීම සඳහායි.
එහිදී එම ස්ථානයට එක්සත් ජාතික පක්ෂ පාර්ලිමේන්තු මන්ත්‍රී නවීන් දිසානායක පැමිණීමත් සමග උණුසුම් තත්ත්වයක් හට ගත්තා.
පසුව, එම ස්ථානයට නාගරික සංවර්ධන අධිකාරියේ නුවරඑළිය සහකාර අධ්‍යක්ෂවරයා පැමිණ ඇති වූ තත්ත්වය සම්බන්ධයෙන් සාකච්ඡාවක නිරත වුණා.
ඉන් අනතුරුව නිලධාරින් විසින් දැනුම් දෙනු ලැබුවේ අදාළ අවන්හල පැය 48 ක් ඇතුළත ඉවත් කර ගන්නා ලෙසටයි.
***************************************
විදේශ ලේකම්, මානව හිමිකම් මණ්ඩලයේ සභාපතිනිය හමුවේ – සමඅනුග්‍රාහකත්වය ඉවත් කරගැනීම ගැනත් දැනුම් දෙයි
(23.02.2020 – 07:31 +0530 – hirunews.lk/sinhala)
ජගත් මානව හිමිකම් මණ්ඩලයේ 43 වන සැසිවාරය හෙට ආරම්භ වන අතර, ඊට පෙර විදේශ ලේකම් රවිනාථ ආරියසිංහ මහතා මානව හිමිකම් මණ්ඩලයේ සභාපතිනි එලිසබෙත් ටිචි-ෆිස්ල්බර්ගර් ජිනීවා නුවරදී හමුවී තිබෙනවා.
ඒ, මානව හිමිකම් මණ්ඩලය ශ්‍රී ලංකාව සම්බන්ධයෙන් සම්මත කරගත් 30/1 දරන සහ 34/1 පූර්ව යෝජනා සම්මුති ඇතුළත්ව සකස් කරන ලද ශ්‍රී ලංකාවේ සංහිඳියාව, වගවීම සහ මානව හිමිකම් ප්‍රවර්ධනය කිරීම පිළිබඳ 40/1 දරන යෝජනාව සම්බන්ධයෙන් සම අනුග්‍රාහකත්වය ඉවත් කර ගැනීමට ලක් රජය ගත් තීරණය පැහැදිලි කිරීමටයි.
මේ වනවිට ජිනීවා නුවර සිටින විදේශ ලේකම් රවිනාථ ආරියසිංහ මහතා විදේශ සබඳතා අමාත්‍ය දිනේෂ් ගුණවර්ධන මහතා විසින් ඉදිරිපත් කරන ලද කැබිනට් පත්‍රයට අනුව අමාත්‍ය මණ්ඩලය විසින් අදාළ තීරණය පසුගිය බදාදා අනුමත කළ බව මානව හිමිකම් මණ්ඩලයේ සභාපතිනිය වෙත පෙරේදා දැනුම් දී තිබෙනවා.
මෙම තීරණය පසුගිය බ්‍රහස්පතින්දා පාර්ලිමේන්තුවටද ඉදිරිපත් කෙරුණා.
විදේශ ලේකම්වරයා ඇය වෙත වැඩිදුරටත් දන්වා ඇත්තේ විදේශ සබඳතා අමාත්‍ය දිනේෂ් ගුණවර්ධන මහතා මානව හිමිකම් මණ්ඩලයේ 43 වන සැසිවාරයට සහභාගි වන ශ්‍රී ලංකා දූත පිරිසට නායකත්වය දෙන අතර, සම අනුග්‍රාහකත්වය ඉවත් කර ගැනීමට රජය ගත් තීරණය පිළිබඳව මානව හිමිකම් මණ්ඩලයේ සාමාජිකයින්ට විධිමත් ලෙස දැනුම් දෙනු ඇති බවයි.
ලබන 27 වැනිදා ජගත් මානව හිමිකම් මණ්ඩලයේ මහ කොමසාරිස්වරිය ශ්‍රී ලංකාව පිළිබඳව වාචිකව කරුණු දැක්වීමට නියමිතව ඇති අතර, අමාත්‍ය දිනේෂ් ගුණවර්ධන මහතා ඊට ප්‍රතිචාර දක්වනු ඇති.
එමෙන්ම, අමාත්‍යවරයා ජගත් මානව හිමිකම් කොමසාරිස්වරිය ජිනීවා නුවරදී හමුවීමටද නියමිතයි.
විදේශ සබදතා අමාත්‍ය දිනේෂ් ගුණවර්ධන මහතා ජගත් මානව හිමිකම් මණ්ඩලය අමතන්නේ ලබන 26 වැනිදායි.
මීට පෙර ජිනිවා මානව හිමිකම් මණ්ඩල සැසි වාරයන් හිදී ශ්‍රී ලංකාව නියෝජනය කර ඇති රාජ්‍ය අමාත්‍ය මහින්ද සමරසිංහ මහතා ද දිනේෂ් ගුණවර්ධන අමාත්‍යවරයා සමඟ ලබන අඟහරුවාදා ස්විට්සර්ලන්තය බලා පිටත්ව යනු ඇති ෴
***************************************
මහ මැතිවරණයට අලුතින් ඡන්ද 270,000 ක් – 2019 ඡන්ද හිමි නාමලේඛණය සහතික කර අවසන්
(23.02.2020 – 07:23 +0530 – hirunews.lk/sinhala)
2019 ඡන්ද හිමි නාම ලේඛණය සහතික කිරීම අවසන් කර ඇති බව මැතිවරණ කොමිසම ප්‍රකාශ කළා.
ඒ අනුව, එළඹෙන මහ මැතිවරණය සඳහා 2019 ඡන්ද හිමි නාම ලේඛනය යොදා ගනු ඇති.
අදාළ ඡන්ද හිමි නාමලේඛනයට අනුව, 2018 ඡන්ද හිමි නාම ලේඛනය හා සැසඳීමේදී නව ඡන්දදායකයින් 270,000 ක් පමණ අලුතින් එක්ව ඇති බවයි මැතිවරණ කොමිසම සඳහන් කළේ.
මහමැතිවරණයකදී පාර්ලිමේන්තුවට තෝරා පත් කර ගනු ලබන මන්ත්‍රීවරුන් සංඛ්‍යාව 196 ක් වන අතර ජාතික ලැයිස්තුවෙන්ද මන්ත්‍රීවරුන් 29 දෙනෙකු තෝරා පත් කර ගැනෙනවා.
මහ මැතිවරණය පවත්වන දිනට යොදා ගනු ලබන ඡන්ද හිමි නාම ලේඛනයේ ලියාපදිංචි වී සිටින ඡන්දදායකයින් සංඛ්‍යාව සහ එක් එක් දිස්ත්‍රික්කයන්හි සිටින ඡන්දදායකයින් සංඛ්‍යාව අනුව, එම දිස්ත්‍රික්කවලින් පාර්ලිමේන්තුවට තෝරා පත් කර ගන්නා මන්ත්‍රීවරුන් සංඛ්‍යාව වෙනස් වනවා.
සමස්ත ඡන්දදායකයින් සංඛ්‍යාව පාර්ලිමේන්තුවට තෝරා පත් කර ගන්නා මන්ත්‍රීවරුන් 19 න් බෙදා දිස්ත්‍රික්ක මට්ටමින් එන ඡන්ද දායකයින් සංඛ්‍යාවෙන් ද බෙදීමෙන් අනතුරුවයි එක් දිස්ත්‍රික්කයට මන්ත්‍රීවරුන් කොපමණ ප්‍රමාණයක් ලබා දෙන්නේ ද යන්න තීරණය කරනු ලබන්නේ.
එමෙන්ම, මාර්තු පළමු වැනිදා පාර්ලිමේන්තුව විසුරුවා හැරීමට ජනාධිපතිවරයා කටයුතු කළහොත් අප්‍රේල් 23 සිට මැයි 6 දක්වා කාලසීමාව තුළ මහ මැතිවරණය පැවැත්වීමට හැකියාව පවතින බව මැතිවරණ කොමිසම ප්‍රකාශ කළා.
19 වන ව්‍යවස්ථා සංශෝධනයට අනුව, ජනාධිපතිවරයාට පාර්ලිමේන්තුව විසුරුවීමට බලය ඇත්තේ වසර හතරහමාරක් ගත වීමෙන් පසුවයි.
ඒ අනුව, පාර්ලිමේන්තුව විසුරුවා හැරීමට ජනාධිපතිවරයාට බලය ලැබෙනුයේ මාර්තු පළමුවන දිනයි.
කෙසේ වෙතත්, පසුගිය 20 වනදා පාර්ලිමේන්තුව කැඳවීමෙන් අනතුරුව එය මාර්තු 3 වන දින දක්වා කල් තැබීමට කතානායකවරයා පියවර ගනු ලැබුවා ෴
***************************************
දක්ෂිණ අධිවේගයේ මාතර – බරවකුඹුක කොටස අද (23) විවෘත වේ
(23.02.2020 – 06:38 +0530 – hirunews.lk/sinhala)
දක්ෂිණ අධිවේගී මාර්ගයේ සිව්වන අදියර වන මාතර – ගොඩගම සිට බරවකුඹුක දක්වා වන කිලෝමීටර් 96 ක කොටස අද විවෘත කෙරෙනවා.
ඒ ජනාධිපති ගෝඨාභය රාජපක්ෂ සහ අග්‍රාමාත්‍ය මහින්ද රාජපක්ෂගේ ප්‍රධානත්වයෙන්.
මේ අතර, දක්ෂිණ අධිවේගී මාර්ගයේ මත්තල දක්වා ගාස්තු අය කරන ආකාරය මේ වන විට ප්‍රකාශයට පත් කර තිබෙනවා.
ඒ අනුව සැහැල්ලු වාහන සඳහා හම්බන්තොට සිට කටුනායක දක්වා රුපියල් 1000 ක මුදලක් අය කරන බවයි මාර්ග සහ මහා මාර්ග අමාත්‍යාංශය සඳහන් කළේ.
මත්තල සිට කටුනායක දක්වා සහ පෑලියගොඩ සිට හම්බන්තොට දක්වා ගාස්තුව රුපියල් 950 ක් වනවා.
එමෙන්ම, මත්තල සිට කොට්ටාව දක්වා ගාස්තුව රුපියල් 750 ක් වන අතර, හම්බන්තොට සිට කඩවත දක්වා අය කෙරෙන ගාස්තුව රුපියල් 900 ක්.
කඩුවෙල සිට හම්බන්තොට දක්වා සහ අතුරුගිරියේ සිට හම්බන්තොට දක්වා රුපියල් 850 ක ගාස්තුවක් අය කෙරෙන අතර, කොට්ටාව සිට හම්බන්තොට දක්වා රුපියල් 800 ක් අය කෙරෙනු ඇති.
මාතර – ගොඩගම සිට හම්බන්තොට දක්වා රුපියල් 400 ක ගාස්තුවක් පනවා ඇති අතර, ගාල්ල – පින්නදූව සිට හම්බන්තොට දක්වා රුපියල් 500 ක ගාස්තුවක් නියම කර තිබෙනවා.
එමෙන්ම, පින්නදූව සිට මත්තලට අය කෙරෙන ගාස්තුව රුපියල් 450 ක් ෴
+++++++++++++++++++++
මාතර – හම්බන්තොට අධිවේගී මාර්ගයේ බස් ධාවනය හෙට සිට ඇරඹේ
(23.02.2020 – 11:10 +0530 – hirunews.lk/sinhala)
අද (23) දින විවෘත කෙරෙන මාතර – හම්බන්තොට අධිවේගී මාර්ගයේ බස් රථ ධාවනය හෙට (24) සිට ආරම්භ කරන බව ලංකා ගමනාගමන මණ්ඩලය පවසනවා.
ඒ අනුව පළමු අදියර යටතේ බස් රථ 10 ක් යෙදවීමටයි සැළසුම් කර ඇත්තේ.
පළමු ගමන් වාරය හෙට පෙරවරු 8.30 ට හම්බන්තොටින් ගමන් ඇරඹීමට නියමිතයි.
මේ අතර මාතර – හම්බන්තොට අධිවේගී මාර්ගයේ ධාවනය වන බස් රථ, මගීන්ගෙන් අය කරන ගාස්තු ගාස්තු ද ප්‍රකාශයට පත්කර තිබෙනවා.
ඒ අනුව හම්බන්තොට සිට පිටකොටුව දක්වා අධිවේගී මාර්ගයේ බස් රථයකින් මගියෙකුගෙන් අය කෙරෙන මුදල රුපියල් 880 ක්.
තංගල්ල සිට පිටකොටුව දක්වා රුපියල් 680 ක් අය කෙරෙනු ඇති.
හම්බන්තොට සිට මාකුඹුර (කොට්ටාව) දක්වා මගියෙකුගෙන් රුපියල් 810 ක් අය කෙරෙන අතර තංගල්ල සිට මාකුඹුර (කොට්ටාව) දක්වා රුපියල් 610 ක් අය කෙරෙනවා ෴
***************************************
පොලිස් කොස්තාපල් ඝාතනයට අනියම් බිරිඳ සහ ඩී.මංජුගේ බිරිඳත් අත්අඩංගුවට
(22.02.2020 – 16:22 +0530 – hirunews.lk/sinhala)
කඩවත පොලිස් කොස්තාපල් ඝාතන සිද්ධියට සම්බන්ධ තවත් කාන්තාවන් දෙදෙනෙකු පොලීසිය අද (22) අත්අඩංගුවට ගත්තා.
ඒ කොස්තාපල්වරයාගේ අනියම් බිරිඳ සහ ඇයගේ ඥාති දියණියක වන සංවිධානාත්මක අපරාධ කල්ලි සාමාජිකයෙකු වූ ඩී.මංජු නමැත්තාගේ බිරිඳයි.
මට්ටක්කුලිය සහ වත්තල ප්‍රදේශවලදී කැළණිය කොට්ඨාශ අපරාධ විමර්ශන ඒකකය මෙම සැකකාරියන් අත්අඩංගුවට ගනු ලැබූ අතර, හෙට (23) දිනයේදී මහර මහේස්ත්‍රාත් අධිකරණයට ඉදිරිපත් කිරීමට නියමිතයි.
මෙම කාන්තාවන් දෙදෙනා හෙරොයින් ජාවාරමේ නිරත වී ඇති බවට ද පොලීසිය සිදුකළ විමර්ශන වලදී අනාවරණ වී තිබෙනවා.
ඔවුන්ගෙන් සිදුකරන ප්‍රශ්න කිරීම් වලදී මෙම ඝාතනයේ සුලමුල හෙළි කර ගැනීමට හැකිවෙතැයි විශ්වාසය පළ කරන බව විමර්ශන සිදුකරන උසස් පොලිස් නිලධාරියෙකු සඳහන් කළා.
සිද්ධිය සම්බන්ධයෙන් කුරුණෑගල – මාකඳුර – එළිවිල ප්‍රදේශයේදී ඊයේ (21) අත්අඩංගුවට ගත් 20 හැවිරිදි බන්ටි නමැත්තා ඇතුළු සැකකරුවන් තිදෙනා අද (22) මහර මහේස්ත්‍රාත්වරයා හමුවට ඉදිරිපත් කිරිමෙන් අනතුරුව පැය 48 ක් රඳවාගෙන ප්‍රශ්න කිරීමට පොලීසිය අවසර ලබාගෙන තිබෙනවා.
එම සැකකරුවන් තිදෙනා අතර, මෙම ඝාතනයේ ප්‍රධාන සැකකරු බවට විශ්වාස කෙරෙන සුද්දා නමැත්තා ද සිටිනවා.
එසේම, වැඩිදුර විමර්ශනවලදී පොලිස් භාරයට ගත් කඩු දෙකක්, ජංගම දුරකථන 5 ක් ද අධිකරණයට ඉදිරිපත් කිරීමට නියමිතයි.
පසුගිය 17 වන දා මෙම පොලිස් කොස්තාපල්වරයා පැහැරගෙන ගොස් තිබූ අතර ඊයේ (21) ඔහුගේ මළ සිරුර පන්නල – වේරහැර – බුළුගොඩ ප්‍රදේශයේ ළඳු කැළෑවක තිබී පොලීසිය සොයා ගත්තා.
ඊට අමතරව පොලිස් නිලධාරියා පැහැරගෙන කිරිබත්ගොඩ සිට රැගෙන ගිය බවට සැක කෙරෙන ත්‍රිරෝද රථය ද එම ප්‍රදේශයේ තිබී පොලීසිය ඊයේ (21) සොයා ගනු ලැබුවා.
+++++++++++++++++++++
“අපේ ලොකු අම්මා ෆන් ගන්නවා… දවසක සෙට් වෙමුද.?” – කඩවත රාජපක්ෂ රාලහාමිගේ අවසන් ගමන
(23.11.2019 – webgossip.lk)
කඩවත පොලිසියට අනුයුක්තව පොලිස් කොස්තාපල් රියැදුරෙකු ලෙස සේවය කළ ජයන්ත රාජපක්ෂ නිලධාරියාගේ පැහැරගැනීම ගෙවී ගිය සතියේ අසන්නට ලැබුණු ශෝකීජනක පුවතකි. වීරකැටිය, කුඩා බිබුල ප්‍රදේශයේ විසූ 37 හැවිරිදි කොස්තාපල් රාජපක්ෂ සහෝදරයන් සිවුදෙනෙකුගෙන් යුත් පවුලේ තුන්වැනියායි. 2013 වසරේදී රාජපක්ෂ පොලිස් සේවයට එක්වූයේ විවාහකයන් මෙන්ම වෙනත් රැකියාවල නියුතුව සිටියවුන්ට පොලිස් රියැදුරන් ලෙස එක් වීමට ලැබුණු අවස්ථාවෙන් ප්‍රයෝජන ගනිමිනි.
අට හැවිරිදි සහ තුන් හැවිරිදි පුතුන් දෙදෙනෙකුගේ පියෙකු වන කොස්තාපල් රාජපක්ෂ පසුගිය 17 වැනිදා රාත්‍රියේ 1.20ට පමණ පැහැර ගැනිණි. ඒ, කිරිබත්ගොඩ හුනුපිටිය පාරේ පිහිටි හෝටලයක කාන්තාවක සමඟ සිට මාර්ගය අසලට පැමිණීමෙන් අනතුරුවය.
කොස්තාපල්වරයාගේ පැහැරගැනීම වූ මොහොතේම බස්නාහිර උතුර පළාත් බාර නියෝජ්‍ය පොලිස්පති වරුණ ජයසුන්දර මහතාගේ මෙහෙයවීමෙන් එහි විමර්ශන කටයුතු බාර කෙරුණේ පෑලියගොඩ කොට්ඨාස අපරාධ විමර්ශන ඒකකයටයි. පෑලියගොඩ කොට්ඨාස බාර පොලිස් අධිකාරි රොෂාන් ඩයස් මහතාගේ උපදෙස් මත එහි ස්ථානාධිපති පොලිස් පරීක්ෂක ලින්ටන් සිල්වා මහතා ප්‍රමුඛ කණ්ඩායමක් කොස්තාපල් රාජපක්ෂ සෙවීමේ සූක්ෂ්ම මෙහෙයුමක් ආරම්භ කෙළේය.
ඒ අනුව පසුගිය 21 වැනිදා පෙරවරුවේ කපාකොටා ඝාතනය කර තිබූ රාජපක්ෂගේ සිරුර පන්නල බුළුගොඩ ප්‍රදේශයේ ළඳු කැලෑවක තිබී සොයා ගැනීමට විමර්ශන නිලධාරිහු සමත් වූහ. රාජපක්ෂගේ පැහැරගැනීමත් සමඟ පෑලියගොඩ අපරාධ විමර්ශන ඒකකයේ බාරයට ගත් රාජපක්ෂ සමඟ සිටි පත්මිණි නමැති කාන්තාව සහ ඔවුනට කෑම රැගෙන පැමිණි පත්මිණිගේ ඥාති දියණියක වන කෝකිලාගේ පාපෝච්චාරණය අනුව රාජපක්ෂ පැහැර ගැනීමේ සිද්ධිය හෙළි කර ගැනීමට හැකි විය. එම කතාන්දරය පෙළ ගැසෙන්නෙ මෙලෙසිනි.
පත්මිණි අවුරුදු 47ක කාන්තාවකි. වත්තල ප්‍රදේශයේ වෙසෙන ඇය තරමක වත්කමක් සතු කාන්තාවකි. සුඛෝපභෝගි මෝටර් රථයක්ද හිමි ඇයගේ ස්වාමියා නිලන්ත බන්ධනාගාරගතව පසු වෙයි. ඒ, මත්ද්‍රව්‍ය ජාවාරමකටය. පත්මිණි සියලු වත්කම් උපයා ඇත්තෙ මත්ද්‍රව්‍ය ජාවාරමෙන් බවට හෙළි වේ. ඇයට දරුවන් දෙදෙනෙකි. 20 හැවිරිදි වැඩිමහල් පුත්‍රයා බන්ටි නමින් හඳුන්වයි. පත්මිණිගේ නිවෙසේම වෙසෙන සිය නැඟණියගේ පුත්‍රයා සුද්දාය. ඔහු 23 හැවිරිදි අයෙකි. සුද්දා සහ බන්ටි අයිස් මත්ද්‍රව්‍යවලට තදින් ඇබ්බැහි වූ දෙදෙනෙකි.
මීට වසර තුනකට පමණ පෙරදී සුද්දා රථවාහන වරදකට පොලිසියට හසු විය. එදින සුද්දා සහ රාජපක්ෂ රාලහාමි අතර මිත්‍රත්වයක් ගොඩනැඟිණි. නිලධාරියා සමඟ ඇති කරගත් එම මිත්‍රත්වය නිසා නඩු නිමිත්තකින් තොරව සුද්දා වරද ගොඩින් බේරාගෙන ඇති බවටද හෙළි වේ.
අනතුරුව රාජපක්ෂ රාලහාමි වත්තල පිහිටි සුද්දලාගේ නිවෙසට යෑමට-එමට පටන්ගත්තේය. සුද්දා පන්නල වෙසෙන අයෙකු වුවත් ඒ වන විට විසූවේ වත්තල පිහිටි සිය ලොකු අම්මා වූ පත්මිණිගේ නිවෙසේයි.
සුද්දාගේ ලොකු අම්මාද විනෝදයට බර මත්පැනටද ලොල් කාන්තාවකි. දිනක් නිවෙසට පැමිණි පොලිස් නිලධාරියා අමතා සුද්දා පවසා ඇත්තෙ, “අපේ ලොකු අම්මා ෆන් ගන්නවා… දවසක සෙට් වෙමුද…” කියාය.
ඒ අනුව දිනක් සුද්දා, රාජපක්ෂ, පත්මිණි සහ බන්ටි ඇතුළු පිරිස මත්පැන් සාදයක් පවත්වා තිබිණි. එම සාදයෙන් රාජපක්ෂ සහ පත්මිණි අතර කිසියම් සබඳතාවක් ගොඩ නැඟිණි. එලෙස දෙදෙනා අතර ගොඩනැඟුණු සබඳතාව මත පත්මිණි සිය මත් ජාවාරමට රාජපක්ෂ රාලහාමිගේ ද සහාය ලබාගෙන ඇත. ඒ අනුව රාජපක්ෂ, පත්මිණිගේ මුදල් පරිපාලන කටයුතුවලටද අත ගසා ඇත්තේ පවුලේම කෙනෙකු ආකාරයකටය.
ඒ වන විට පත්මිණිගේ ස්වාමියා නිලන්ත මත් ජාවාරමකට වරදකරු වී බන්ධනාගාරගතව සිටියේය.
එසේ කල් ගෙවෙද්දී දිනක් බන්ටි සහ සුද්දා මත්ද්‍රව්‍ය පානයට අවැසි මුදල් පත්මිණිගෙන් ඉල්ලූ විට ඔවුන් දෙදෙනාට මුදල් ලබා දී ඇත්තේද රාජපක්ෂගේ අනුදැනුම මතයි. ඒ හේතුවෙන් සුද්දා සහ බන්ටිට මුදල් ප්‍රශ්නද මතු විණි.
නිවෙසේ තිබූ මෝටර් රථය එතෙක් පාවිච්චි කළේ බන්ටි විසිනි. එහෙත් පසුව එම රථයද රාජපක්ෂ රාලහාමිගේ බාරයට පත් විය.
ඒ අතරේ රාජපක්ෂට අධික මිලකින් යුත් යතුරුපැදියක්ද පත්මිණි මිලදී ගත්තාය. එසේ පොලිස් නිලධාරියා සුරසැප ලබද්දී බන්ටි සතුව තිබූ ත්‍රීරෝද රථයේ ලීසිං වාරිකද නොගෙවීම නිසා හිඟ වාරික කිහිපයක්ම එකතු වීමෙන් බන්ටි මහත් ගැටලුවකට මුහුණ දී සිටියේය.
එවැනි සිදුවීම් සමඟ සුද්දා, බන්ටි දෙදෙනා රාජපක්ෂ රාලහාමි සමඟ විරසකයකට මුල පිරීය.
නිවෙසේ වන සිදුවීම් අකුරක් නෑර බන්ටි බන්ධනාගාරයේ පසුවන පියාට පැවසීය. අනතුරුව පියා පවසා තිබුණේ,
“යකෝ… උඹලා පිරිමි ද? ඕකව ගෙදරට ගන්නෙ ඇයි… එළවලා දාපන්…”
ඒත් සමඟ බන්ටි සහ සුද්දා පොලිස් නිලධාරියාට එරෙහිව නැඟි සිටින්නට වූහ. එසේ හැළහැප්පිලි මැද කාලය ගත වෙද්දී පසුගිය 16 වැනිදා ගැටුමක් ඇති වී තිබුණේ බන්ටි සහ සිය මව පත්මිණි අතරයි. ඒ පත්මිණිට පහරදීමට බන්ටි පැමිණීමත් සමඟයි. 16 වැනිදා රාත්‍රියේ වූ එම ගැටුම ගැන පත්මිණි ඇමැතුමක් ගෙන දන්වා සිටියේ රාජපක්ෂ රාලහාමිටය.
ඒ අවස්ථාවේ පොලිස් නිවස්නයේ විවේකී සුවයෙන් කල් ගෙවූ රාජපක්ෂ ක්ෂණයෙන් ගොස් තිබුණේ පත්මිණි විසූ වත්තල නිවෙසකටයි. එම නිවෙස ඩී. මංජු නමින් ප්‍රකටව සිටි වත්තල ප්‍රදේශයේ ප්‍රබල පාතාල අපරාධකරුවාගේ නිවෙසයි. 2018 වසරේ පෙබරවාරි 23 වැනිදා ඩී. මංජු පොලිස් විශේෂ කාර්ය බළකා ප්‍රහාරයකින් මරණයට පත්වීමෙන් පසු එම නිවෙසේ වෙසෙන්නෙ ඔහුගේ බිරිය කෝකිලායි. ඇයට, පත්මිණි ඥාතිකමින් නැන්දණියයි. පොලිස් නිලධාරියා සහ පත්මිණි නිවෙසේ වූ මොහොතේ පැමිණි තිබුණේ බන්ටි සහ සුද්දායි. පත්මිණි සහ පොලිස් නිලධාරියා නිවෙසේ සැඟවී සිටියදී පුතුන් දෙදෙනා කෑකෝගසා මඳ වේලාවකින් යන්නට ගොසිනි. එසැණින් කෝකිලා සිය නැන්දණියට කියා ඇත්තේ, “නැන්දෙ… දැන් මෙහෙන් යන්න නැත්නම් අරුන් ආයෙත් ඇවිත් ලොකු ප්‍රශ්නයක් වෙන්න පුළුවන්…” කෝකිලා එසේ කීමත් සමඟ පත්මිණි, රාජපක්ෂ සමඟ රාත්‍රී එකට පමණ කිරිබත්ගොඩ, හුනුපිටිය මාර්ගයේ හෝටලයකට ගොස් නතර වී තිබේ. හෝටලයට ගොස් මඳ වෙලාවකින් පත්මිණි ඇමැතුමක් ගෙන කෝකිලාට කීවේ,
“දුවේ… හරිම බඩගිනියි… මේ හරියේ කෑමට දෙයක් ගන්න තැනක් නෑ… ඔයාට පුළුවන්ද මොනවහරි ගෙනත් දෙන්න…”
ඊට ප්‍රතිචාර දක්වමින් රොටි වැනි ආහාරයක් ගෙන කෝකිලා සිය බාල සොහොයුරා සමඟ ස්කූටි යතුරුපැදියක නැඟී දෙදෙනා නැවතී සිටි හෝටලය කරා ගොස් ඇත. ඒ අතරේ පත්මිණි, රාලහාමිට කියා ඇත්තෙ,
“දැන් දුව කෑම අරන් එනවා කීවා…. ඔයා හෝටලේ ළඟින්ම කෑම ගත්තොත් පුතාලා අපි ඉන්න තැන දැනගනිවී… ඒක නිසා ටිකක් ඉස්සරහට ගිහින් කෑම ටික ඉල්ලගන්න..”
ඒ අනුව නැවතී සිටි හෝටලයේ සිට මීටර් සියයක් පමණ ඉදිරියට පයින් ගමන් කරමින් සිටියදී කෑම රැගෙන පැමිණි කෝකිලා හමුවී කෑම ලබාගත් රාජපක්ෂ නැවතත් හෝටලයට ගමන් කිරීමට සැරැසුණා පමණි. ක්ෂණයකින් පැමිණියේ ත්‍රිරෝද රථයකි. ඊට මාර්ගයේ ගමන් කරමින් සිටි රාජපක්ෂව බලෙන්ම නංවාගෙන යන ආකාරය අසල සීසීටීවී කැමරාවකද සටහන් වී ඇති බව පොලිස් විමර්ශනවලදී හෙළි විණි.
17 වැනිදා පාන්දර 1.20 ට පමණ එසේ පස්දෙනෙකුගෙන් පමණ යුත් පිරිසක් විසින් පැහැරගත් රාජපක්ෂ ගැන පරීක්ෂණ කළ නිලධාරින්ට පොලිස් බාරයට ගැනුණු පත්මිණි හෙළිදරව්වක් කළාය. දිනක් සුද්දා පවසා ඇත්තෙ, “ලොකු අම්මෙ… ඔය රාලහාමි මට පාට් එකක් දැම්මොත්…. දන්නවනේ මගේ හැටි… මං නම් කරන්නෙ පන්නල පැත්තට අරන් ගිහින් කැලේකට දානවා… ආයෙත් ජීවිතේට එන්න බැරි වෙන්න…”
පොලිස් බාරයේ පසු වන පත්මිණි ඒ බව පොලිසියට පැවැසීමත් සමඟ රාජපක්ෂ පැහැරගෙන පන්නල ප්‍රදේශයට රැගෙන යන්නට ඇති බව සැක පළ වීමත් සමඟ පොලිස් නිලධාරීහු පන්නල සුද්දාගේ නිවෙසටද ගියහ. ඒ අනුව පසුගිය දින කීපයේම පෑලියගොඩ කොට්ඨාස අපරාධ විමර්ශන නිලධාරින් සහ කුලියාපිටිය පොලිස් නිලධාරීන් දිවා රෑ වෙහෙසුණේ රාජපක්ෂ ගැන හෝඩුවාවක් සොයා ගැනීමටයි. ඒ පන්නල කංකානියමුල්ල රක්ෂිතය සහ ඒ අවට පොල් වතු පීරමිනි. එහෙත් ඔවුනට සොයාගැනීමට හැකි වූයේ රාජපක්ෂ පැලඳ සිටි බවට සැක කළ පාවහන් යුගලය සහ මිනිස් ලේ පැල්ලම් කීපයක් පමණි. කුලියාපිටිය පොලිස් නිල සුනඛ විකී සහ ප්ලෑෂ්ද යොදවා විමර්ශන සිදු කළත් කිසිදු හෝඩුවාවක් නොවිණි.
ඒ අතරේ පොලිස් නිලධාරින් රාජපක්ෂ පැහැරගත් දින රාත්‍රියේ සුද්දා සමඟ දුරකකන සංවාදයක් කළ කඳානේ නාගොඩ වෙසෙන සුද්දාගේ බාප්පාගේ පුත්‍රයා පොලිස් බාරයට ගනු ලැබීය. නිලධාරින් ඔහුට කීවේ සුද්දාට ඇමැතුමක් ගන්නා ලෙසයි. ඒ අනුව සුද්දා එම ඇමැතුමට කීවේ,
“මගේ අතේ සල්ලි නෑ බං… දහයක් හෝ පහළොවක් දාපන්… මං එකවුන්ට් නම්බර් එකක් එවන්නම්…”
සුද්දා එවූ එම ගිණුම් අංකයට අදාළ පදිංචි ලිපිනය සොයා ගැනීමට පොලිසිය සමත් විය. ඒ රාජපක්ෂ ඝාතනය කොට තිබූ පන්නල, බුළුගොඩ ප්‍රදේශයේ නිවෙසකි. එම නිවෙස සුද්දාගේ මිත්‍රයෙකු වන සංජුගේ නිවෙසයි. සංජුද මත්කුඩු ජාවාරම්හි නිරත අපරාධකාරයෙකි. 20 වැනිදා හඳුනාගත් එම නිවෙසට 21 වැනිදා පාන්දර පහට පමණ පොලිසිය කඩා පැන්නේය. ඒ මොහොතේ සුද්දා සහ සංජු නිවෙසේ සිටියහ.
දෙදෙනාගෙන් කළ ප්‍රශ්න කිරීම් හමුවේ සංජුගේ නිවෙසේ සිට මීටර් 750 ක් පමණ දුරින් පිහිටි ලඳු කැලෑවක තිබී කපාකොටා ඝාතනය කළ රාජපක්ෂගේ සිරුර සොයා ගැනීමට හැකි විය. විමර්ශන සිදුකරන පොලිස් නිලධාරියෙක් කීවේ, එකී ඝාතනය පත්මිණිගේද අනුදැනුම මත සිදු කළ ඝාතනයක් ලෙස සැක කෙරෙන බවත් ඉදිරි විමර්ශන අනුව සියලු තතු හෙළි කරගැනීමට හැකි වන බවයි ෴
***************************************
අස්වනු රැකගන්න කුඹුරක වුණත් පඹයෙක් හිටවන්න ඕනේ – ප්‍රසන්න රණතුංග
(23.02.2020 – 10:25 +0530 – sinhala.adaderana.lk)
අස්වැන්න ආරක්ෂා කිරීමට කුඹුරේ පඹයන් සිටවන්නාක් මෙන් ඡන්ද ආරක්ෂා කිරීමට ද පඹයන් අවශ්‍ය විය හැකි බව අමාත්‍ය ප්‍රසන්න රණතුංග මහතා පවසා ඇත.
නව සන්ධානයේ සභාපතිවරයා පත් කිරීමද එවැනි අරමුණකින් සිදූවූවක් විය හැකි බවයි අමාත්‍යවරයා පවසා ඇත්තේ.
‘අද සුදනන් ලෙස පෙනී සිටින ඇතැමුන් පොහොට්ටුවෙන් ජයග්‍රහණයකර පාවා දීමට ඉඩ ඇති බැවින් ඒ පිළිබදව අවධාරණයෙන් කටයුතු කරන්න’ යැයි තමන් ජනතාවගෙන් ඉල්ලා සිටින බවද ඇමතිවරයා වැඩිදුරටත් පවසා ඇත.
දොම්පේ කෑරගල පරකඩමුල්ල ප්‍රදේශයේ පුරන් කුඹුරු අස්වැද්දවීමේ වැඩසටහනකට සහභාගීවීමෙන් අනතුරුව මාධ්‍යවේදීන්ගේ ප්‍රශ්ණ වලට පිලිතුරු දෙමින් ප්‍රසන්න රණතුංග ඇමතිවරයා මේ අදහස් පල කර තිබේ.
සන්ධානයේ සභාපතිවරයා ලෙස මෛත්‍රීපාල හිටපු ජනාධිපතිවරයා පත්කිරීම පිළිබඳ විරෝධයක් තිබේදැයි මාධ්‍යවේදියෙක් නැඟූ ප්‍රශ්නයකට පිළිතුරු දෙමින් ඒ මහතා මෙසේ පවසා ඇත.
“ඔව් මම විරුද්ධයි. පැහැදිලිවම මෛත්‍රීපාල සිරිසේන ජනාධිපතිවරයා ගැන රටේ ජනතාවගේ ලොකු විරෝධයක් තියෙනවා.
මම පහුගිය කාලෙම සටන් කලේ අපි පොහොට්ටුවෙන් ඉල්ලන්න ඕන කියලා. මොන සන්ධාන හැදුවත් සම නායකයෝ ඉන්න බෑ. අසම සම නායකයා මහින්ද විතරයි කියලයි. ඒ දෙකම හරි ගියා.
අද රටේ මතයක් හැදීලා තියෙනවා මෛත්‍රීට සන්ධානයේ සභාපතිකම දුන්නට මේ සභාපතිකම නිකං පියන් කමක් වගේ කියලා.
මේ සන්ධානයේ නායකයා මහින්ද මහත්තයා. අස්වනු රැක ගන්න කුඹුරක පඹයෙක් හිටවන්න ඕන. අපේ ඡන්ද ප්‍රමාණය රැකගන්න නම් සමහර විට පඹයෙක්ව හිටවන්නත් වෙයි මේ උනෙත් ඒක වෙන්න පුලුවන්.
කොහොම වුනත් අපිට ශ්‍රීලනිපය එක්ක ප්‍රශ්ණයක් නෑ. අපිට සන්ධාන ගහන්න පුලුවන්. හැබැයි 2015 රටම පාවා දුන්න නායකයෙක් අද සුදන වගේ මේකට එන්න හදන කොට ඒකට විරෝධයක් තියෙනවා.
මේකෙදි අපට සාධාරණ සැකයක් තියෙනවා සන්ධානයට ඇවිල්ලා ආණ්ඩුව පිහිටෙව්වාම කඩාගෙන යයිද කියලා. ඒ නිසා ජනතාව බුද්ධිමත්ව කටයුතු කළ යුතුයි.”
***************************************
යාපනය ගුවන්තොටුපල දියුණු කිරීමේ ගිවිසුමට කඩිනමින් අත්සන් තබනවා – ඇමති ප්‍රසන්න රණතුංග
(23.02.2020 – 15:03 +0530 – sinhala.adaderana.lk)
යාපනය පලාලි ගුවන් තොටුපල වැඩි දියුණු කිරීම සදහා ඉන්දියාව සමඟ අවබෝධතා ගිවිසුම කඩිනමින් අත්සන් කිරීමට අපේක්ෂා කරන බව කාර්මික අපනයන, ආයෝජන ප්‍රවර්ධන, සංචාරක හා ගුවන්සේවා ඇමති ප්‍රසන්න රණතුංග මහතා පවසයි.
මෙම අවබෝධතා ගිවිසුමට අත්සන් තැබීමට කැබිනට් මණ්ඩලය විසින් අනුමත කර තිබේ.
යාපනය පලාලි ගුවන් තොටුපල සංවර්ධනය කිරීම සඳහා ඉන්දියානු රජය ශ්‍රී ලංකා රුපියල් මිලියන 300 ක ආධාරයක් ලබා දීමට එකඟ වී තිබේ.
මෙම මුදලින් සැහැල්ලු ගමන් මළු හැසිරවීමේ පද්ධතිය, පිටත්වීමේ පාලන පද්ධතිය, ජල සම්පාදන, අප ජල ප්‍රවාහන පද්ධතිය හා ඝණ අපද්‍රව්‍ය අපවහන පද්ධතිය සැකසීමට අපේක්ෂිතයි.
මේ වන විට යාපනය පලාලි ගුවන් තොටුපලේ තාවකාලික ගුවන් ගමන් පාලන කුළුණක් ඉදිකර තිබේ.
ගුවන් ධාවන පථ ආලෝකකරණ පද්ධතිය ද සැකසීම සඳහා මේ වන විට ප්‍රසම්පාදන කටයුතු සිදුකෙරෙමින් පවතී.
මෙහි වාණිජ ගුවන් යානා හා ජාත්‍යන්තර මගීන් හැසිරවීමේ දී වැඩි පහසුකම් අවශ්‍ය වෙනු ඇතැයි ඇමති ප්‍රසන්න රණතුංග මහතා පෙන්වා දෙයි.
මෙම අවබෝධතා ගිවිසුම අත්සන් කිරීම සඳහා ශ්‍රී ලංකා රජය වෙනුවෙන් සංචාරක හා ගුවන් සේවා අමාත්‍යංශයේ ලේකම්වරයාට බලය පැවරෙන අතර ඉන්දියානු රජය විසින් ලබා දෙන රුපියල් මිලියන 300 ක ප්‍රදානය භාවිතා කිරීමට ගුවන් තොටුපළ හා ගුවන් සේවා සමාගමට බලය පැවරේ.
යාපනය පලාලි ගුවන්තොටුපල ජාත්‍යන්තර ගුවන් තොටුපලක් ලෙස සංවර්ධනය කිරීම රජයේ අපේක්ෂාව බව ඇමති ප්‍රසන්න රණතුංග මහතා පෙන්වා දෙයි ෴
***************************************
සතියකට වරක් පාස්කු ත්‍රස්ත ප්‍රහාර සම්බන්ධව වාර්ථාවක් ආරක්‍ෂක ලේකම්වරයාට
(23.02.2020 – 14:42 +0530 – sinhala.adaderana.lk)
250 දෙනෙකුට වැඩි පිරිසක් ජීවිතක්‍ෂයට පත් කළ පසුගිය වසරේ පාස්කු ඉරිදා ත්‍රස්ත ප්‍රහාර මාලාව සම්බන්ධයෙන් අපරාධ විමර්ශණ කොට්ඨාශය (සී.අයි.ඩී) විසින් කරගෙන යනු ලබන විමර්ශණ වල ප්‍රගතිය සොයා බැලීම පිණිස ආරක්‍ෂක අමාත්‍යාංශය විසින් කාර්ය සාධක බලකායක් පිහිටුවා තිබේ.
සාමාජිකයින් හය දෙනෙකුගෙන් සමන්විත කාර්ය සාධක බලකායට විවිධ බුද්ධි අංශවල ජ්‍යෙෂ්ඨ නිලධාරීන් ඇතුළත් වන අතර ජාතික බුද්ධි ප්‍රධානී මේජර් ජෙනරාල් ජගත් අල්විස් මහතා එහි ප්‍රධානත්වය උසුලයි.
ඒ සම්බන්ධව වාර්ථාවක් සතියකට වරක් ආරක්‍ෂක ලේකම් මේජර් ජෙනරාල් (විශ්‍රාමික) කමල් ගුණරත්න මහතා වෙත ඉදිරිපත් කල යුතු වේ.
කොළඹ, මීගමුව හා මඩකලපුව ප්‍රදේශය වල ප්‍රධාන කිතුනු දේවස්ථාන හා හෝටල් ඉලක්ක කර ගනිමින් එල්ලවූ ප්‍රහාර පිළිබඳ විමර්ශණ කඩිනම් කිරීම පිණිස ජනාධිපති ගෝඨාභය රාජපක්ෂ මහතාගේ උපදෙස් මත මෙම කාර්ය සාධක බලකාය පිහිටවූ බව මේජර් ජෙනරාල් ගුණරත්න මහතා පැවසීය.
පසුගිය පාලන සමයේ මේ සම්බන්ධ අපරාධ විමර්ශණ පලදායී ලෙස සිදු නොවුණු බවත් මේ සම්බන්ධයෙන් සාධාරණ පරීක්‍ෂණයක් සිදුකිරීමට අප අපොහොසත් වුවහොත් එම බෝම්බ ප්‍රහාරවලින් ජීවිත අහිමි වූ සහ ජීවිතාන්තය දක්වා තුවාල හා වේදනාවන් සමග ජීවත්වන 500 ක් පමණ පුද්ගලයින් හට සාධාරණය ඉටු නොවන බවත් ආරක්‍ෂක ලේකම්වරයා පැවසීය.
ආරක්‍ෂක අමාත්‍යාංශයට අයත් සියලුම බුද්ධි අංශවල දායකත්වය ලබාගෙන ප්‍රහාරයන්ට අදාළ සත්‍ය තොරතුරු හඳුනා ගැනීම, සත්‍ය තොරතුරු රැස් කිරීම සහ නව තොරතුරු හා සාක්ෂි එක්රැස් කිරීම මගින් එම ප්‍රහාරයන්ට අදාල අන්තවාදී පිරිස් නීතිය හමුවට ගෙන එන ලෙස ජනාධිපතිවරයා උපදෙස් දී ඇති බවද ඒ මහතා ප්‍රකාශ කරයි.
පාස්කු ඉරිදා ප්‍රහාරය විමර්ශණය කිරීම සඳහා හිටපු ජනාධිපති මෛත්‍රීපාල සිරිසේන මහතා විසින් පත් කරන ලද පස් දෙනෙකුගෙන් යුත් කොමිසම විසින් සිදුකරනු ලබන විමර්ශණය පිළිබඳව කතෝලික ප්‍රජාව සෑහීමකට පත් නොවන බව පසුගිය සතියේ කාදිනල් මැල්කම් රංජිත් කොළඹ අගරදගුරුතුමා ප්‍රකාශ කර තිබිණි.
නිසි විමර්ශණයක් පිළිබඳ සහතික වෙමින් ආරක්‍ෂක ලේකම්වරයා පවසා සිටියේ මෙම විමර්ශණ සඳහා බුද්ධි අංශ වල සහාය අවශ්‍ය බැවින් නිවැරදි තොරතුරු ලබාගැනීම පිණිස මෙම නව කාර්ය සාධක බලකාය අපරාධ විමර්ශණ කොට්ඨාශය මගින් සිදුකර ගෙන යනු ලබන විමර්ශණ සඳහා තොරතුරු ලබාගැනීමේ මෙහෙවරක් වන බවයි.
“මෙම කාර්ය සාධක බලකාය පිහිටුවීමේ අපගේ ප්‍රධාන අභිප්‍රාය වනුයේ අනාගතයේදී මහජන ආරක්‍ෂාව සහ ජාතික ආරක්‍ෂාව සහතික කිරීමයි”, ඔහු වැඩිදුරටත් පැවසීය ෴
********************* ( නැවත මුල් පිටුවට ….. ) –ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴