ශ්‍රේෂ්ඨාධිකරණ මතය ප්‍රකාශ වන තුරු, ජාතික ආණ්ඩුව අඛණ්ඩව

(19.02.2018 – 21:11 +0530 – hirunews.lk/sinhala)

ජනාධිපතිවරයා ශ්‍රේෂ්ඨාධිකරණය වෙතින් සිදුකළ විමසීමට අනුව එහි මතය ප්‍රකාශ කෙරෙන තුරු ජාතික ආණ්ඩුව තවදුරටත් පවත්වාගෙන යාමට නිදහස් පක්ෂ මන්ත්‍රී කණ්ඩායම තීරණය කර තිබෙනවා.

ජාතික රජයෙන් ඉවත් වන ලෙස ජනාධිපතිවරයා සමඟ ඊයේ රාත්‍රියේ පැවැති සාකච්ඡාවේදී මන්ත්‍රී කණ්ඩායම ඉල්ලා ඇති බව සඳහන්.

කෙසේ නමුත්, ජනාධිපතිවරයා ඒ සඳහා පවතින ව්‍යවස්ථාමය ඉඩකඩ පිළිබදව නීතිපතිවරයාගෙන් විමසීමක් කර ඇති අතර, ඔහු සඳහන් කර ඇත්තේ ඒ සඳහා ශ්‍රේෂ්ඨාධිකරණයේ මතය විමසිය යුතු බවයි.

එමෙන්ම, එක් කණ්ඩායමක් ලෙස සිටිමින් ජනාධිපතිවරයා වෙත අඛණ්ඩව සහය දැක්වීමට ශ්‍රී ලංකා නිදහස් පක්ෂ පාර්ලිමේන්තු කණ්ඩායම අද ඒකමතිකව තීරණය කළා.

ඒ, ජනාධිපති මෛත්‍රීපාල සිරිසේන මහතා සහ නිදහස් පක්ෂ මන්ත්‍රීවරුන් අතර අද දහවල් ජනාධිපති ලේකම් කාර්යාලයේදී පැවති සාකච්ඡාවකදීයි.

පැය දෙකකට අධික කාලයක් පැවැත්වූ මෙම සාකච්ඡාවට මහින්ද අමරවීර, සුසිල් ප්‍රේමජයන්ත, ඩිලාන් පෙරේරා, අනුර ප්‍රියදර්ශන යාපා යන ජ්‍යෙෂ්ඨ අමාත්‍යවරුන් ඇතුළු නිදහස් පක්ෂ මන්ත්‍රීවරුන් රැසක් මෙම සාකච්ඡාවට එක්ව සිටියා.

දේශපාලන ආරංචි මාර්ග ප්‍රකාශ කළේ සාකච්ඡාව ආරම්භයේම සුසන්ත පුංචිනිලමේ නියෝජ්‍ය අමාත්‍යවරයා ජනාධිපතිවරයාගෙන් විපක්ෂයේ අසුන් ගැනීමට අවසර ලබාදෙන ලෙස ඉල්ලීමක් කර ඇති බවයි.

කෙසේ වෙතත්, ජනාධිපතිවරයා විසින් පවතින වාතාවරණය පිළිබදව ඉදිරියේදී නිරීක්ෂණය කර මසක් තුළ සියල්ල එක්ව අවසන් තීන්දුවක් ගත යුතු බව ප්‍රකාශ කර තිබෙනවා.

මීට අමතරව ආණ්ඩුව ඉදිරියට ගෙන යාම සඳහා විකල්ප කිහිපයක් ද මෙහිදී යෝජනා වී ඇති බව දේශපාලන ආරංචි මාර්ග කියා සිටියා.

එක්සත් ජාතික පක්ෂ නව අග්‍රාමාත්‍යවරයෙකු යටතේ ආණ්ඩුව ඉදිරියට ගෙන යාම හෝ නිදහස් සන්ධාන අග්‍රාමාත්‍යවරයෙකු යටතේ ආණ්ඩුව ඉදිරියට පවත්වාගෙන යාම එම යෝජනා අතර වනවා ෴

++++++++++++++++++++++++++++++

හිටපු ජනපතිගේ ඉල්ලීම
(19.02.2018 – 19:45 +0530 – hirunews.lk/sinhala)

ඒකාබද්ධ විපක්ෂය, විපක්ෂ නායක ධුරය ඉල්ලා සිටින බව හිටපු ජනාධිපති මහින්ද රාජපක්ෂ පවසනවා.

අද පැවැති පාර්ලිමේන්තු සභා වාරය සඳහා පැමිණි අවස්ථාවේදී මාධ්‍යවේදීන් නැගූ ප්‍රශ්න කිහිපයකට පිළිතුරු ලබාදෙමින් හිටපු ජනාධිපතිවරයා මේ බව කියා සිටියා.

ප්‍රශ්නය – සර්, දැන් අලුත් අගමැති කෙනෙක් පත්වෙනවාද? ඔබතුමාට විපක්ෂනායකකම දෙයිද? කොහොමද?

– අපි විපක්ෂනායක කම ඉල්ලනවා. අගමැතිවරයා එම පුද්ගලයාම බවට පත්වෙයි මම හිතන්නේ. ඒක එක්සත් ජාතික පක්ෂයයි, මෛත්‍රීපාල සිරිසේන ජනාධිපතිතුමායි අතර තියෙන ගනුදෙනුවක්නේ. අපි එයාලට කිව්වේ ශ්‍රී ලංකා නිදහස් පක්ෂයේ මන්ත්‍රීවරයෙක් එනවා නම් අපි අපේ සහයෝගය එළියෙ ඉඳලා දෙනවා කියලා. ඉතින් අපි එක්සත් ජාතික පක්ෂ මන්ත්‍රීවරයෙකුට ඒක දෙන්නෙ නැහැ. ඒ අනුව අපි විපක්ෂයේ ඉන්නවා. අපි විපක්ෂය වශයෙන් බලාපොරොත්තු වෙනවා අපිට සුදුසු ස්ථානය අපිට දෙයි කියලා.

ප්‍රශ්නය – එතකොට මේ අවුරුදු දෙකත් යහපාලන ආණ්ඩුව ඉදිරියට යයිද සර්.

– ඒවා ඉතින් කියන්න බැහැ. ආණ්ඩු තියෙනවා නැතිවෙනවා. තව වෙසක් පෝය දෙකයි.

ප්‍රශ්නය – සර් දැන් ජනාධිපතිතුමා කිව්වානේ සර්, නීතිපතිගේ උපදෙස් අරගෙන අගමැතිතුමා ඉවත්කරන්න හැකියාවක් තියෙනවා ද කියලා බලනවා කියලා.?

– නීතිපති උපදෙස් ඕනේද? ජනාධිපති විධායක විත්තිය අමතක කරන්න එපා.

ප්‍රශ්නය – ජනාධිපතිතුමා අගමැතිතුමාව රකිනවා කියලද ඔබතුමා චෝදනා කරන්නේ.

– අනිවාර්යයෙන් වෙන මොකක්ද?

ප්‍රශ්නය – ඔබතුමාලා දැන් ඉදිරියේදී මොනවගේ තීන්දුවක්ද ගන්න ඉන්නේ.?

– පෙනෙයි පෙනෙයි පොඩ්ඩක් ඔහොම ඉන්න ෴

+++++++++++++++++++++++++++++++

********************* ( නැවත මුල් පිටුවට ….. )

ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴

ප්‍රතිචාරයක් ලබාදෙන්න

ඔබගේ ඊමේල් ලිපිනය ප්‍රසිද්ධ කරන්නේ නැත. අත්‍යාවශ්‍යයය ක්ෂේත්‍ර සලකුණු කොට ඇත *