ළමුන් 12 ක් අපයෝජනය කළ හිමිවරුන් 2 ක් සමඟ තවත් 6 ක් අත්අඩංගුවට

(24.02.2018 – 21:20 +0530 – sinhala.adaderana.lk)

නිකවැරටිය රස්නායකපුර ප්‍රදේශයේ ළමා නිවාසයක ළමුන් දොලොස් දෙනෙකු අපයෝජනය කිරීමට සැකපිට එම ළමා නිවාසයේම හිමිවරුන් දෙපලක් සමඟ ගිහි නේවාසිකයින් හය දෙනෙකු අත්අඩංගුවට ගෙන තිබේ.

නිකවැරටිය කොට්ඨාස භාර පොලිස් අධිකාරී සංජීව බංඩාර මහතාට ලැබුණ තොරතුරක් මත පරීක්ෂණ සිදු කිරීමේ දී බාල වයස්කාර ළමුන් දොලොස් දෙනා අවස්ථා තිස් දෙකක දී අපයෝජනයට ලක්ව ඇති බව මේ වනවිට හෙලිව තිබේ.

ඒ අනුව අත්අඩංගුවට ගත් සැකකරුවන් හත් දෙනෙකු 23 දින නිකවැරටිය මහේස්ත්‍රාත් අධිකරණයට ඉදිරිපත් කිරීමෙන් පසු රක්ෂිත බන්ධනාගාර ගතකර තිබේ.

සැකකාර එක් හිමි නමක් 24 දින මහෙස්ත්‍රාත් හමුවට පැමිණවීමට නියමිත බව රස්නායකපුර පොලීසිය පවසයි.

පරීක්ෂණ අවසන් වනතෙක් අගතියට පත් සිසුන් වෙනත් ළමා නිවාසයක රැඳවීමටත් ඒ පිළිබඳව පරිවාස වාර්තාවක් කැඳවීමටත් අධිකරණය පොලිසියට නියමකර තිබේ.

මෙම ළමා නිවාසය 1998 සිට ළමාරක්ෂක අධිකාරිය යටතේ පාලනය වන ආයතනයකි.

නිකවැරටිය කොට්ඨාස භාර පොලිස් අධිකාරී සංජීව බණ්ඩාර මහතාගේ උපදෙස් මත කොට්ඨාස ළමා හා කාන්තා කාර්යාංශය, කොට්ඨාස අපරාධ අංශය සහ රස්නායකපුර පොලිසිය පරීක්ෂණ මෙහෙයවයි ෴

****************************************

තවත් නොහික්මුනු බස් රියදුරෙක්
(24.02.2018 – 18:38 +0530 – hirunews.lk/sinhala)

පෞද්ගලික බස් රථ රියදුරන් හා කොන්දොස්තරවරුන් මගීන්ට රළු පරළු ලෙස සලකන අවස්ථාවන් පිළිබඳව අපට නිරන්තරයෙන් වාර්තාවනවා.

පසුගිය සතියේත් අප සී.අයි.ඒ. ඔස්සේ වාර්තා කළේ බස් රථ රියදුරෙකු හා කොස්දොස්තරවරයෙකු බස් රථය ගමනාන්තය දක්වා ධාවනය නොකර සිය අභිමතය පරිදි මගීන් අතරමග බස්සන ආකාරයයි.

එවැනිම ආකාරයේ තවත් සිදුවීමක් හිරු සී.අයි.ඒ. අදිසි කැමරා නෙතට හසුවුණේ ඉංගිරිය සිට පිටකොටුව දක්වා ධාවනය වූ බස් රථයකයි.

මේ, මෙරට පෞද්ගලික මගී ප්‍රවාහන සේවාවේ ප්‍රමිතිය පිළිබඳව කදිම නිදර්ශනයක්.

මාර්ග අංක 125 ඔස්සේ ධාවනය වන ඉංගිරිය – පිටකොටුව බස් රථයේ සිටි සියලු මගීන් මරදාන ඩාර්ලි පාර ආසන්නයේදී වෙනත් බස් රථයකට බලහත්කාරයෙන් මාරු කරන්නේ නියමිත මාර්ගයේ ධාවනය කළහොත් සිය ඊළඟ ගමන්වාරය මඟ හැරෙන බව පවසමින්.

මෙයට විරුද්ධ වූ එම බස් රථයේ පැමිණි මගියෙකුට බස් රථයේ රියදුරුගෙන් හිමිවන්නේ රළු ප්‍රතිචාරයක්.

මෙම ප්‍රතිචාරය මෙරට පෞද්ගලික බස් මගීන්ට නුහුරු දෙයක් නොවේ.

ගමනාන්තය දක්වා මුදල් ගෙවා ප්‍රවේශ පත්‍රයක් ලබා ගන්නා මගීන් මෙලෙස තැන තැන දමා යෑමට පෞද්ගලික බස් රථ රියදුරන්ට හෝ කොන්දොස්තරවරුන්ට බලය ලබා දී තිබේද?

මෙය සහමුලින්ම මගීන්ගේ අයිතිවාසිකම් උල්ලංඝනය කිරීමක් නොවන්නේද?

අප දිගින් දිගටම මෙවැනි සිදුවීම් වාර්තා කළද මෙම ප්‍රවණතාවයේ අඩුවීමක් දක්නට නොලැබෙන අතරම මෙම ක්‍රියාවන් පාලනයට බලධාරීන් ක්‍රියාත්මක නොවීමත් බස් මගීන්ගේම අවාසනාව නොවේද?

********************* ( නැවත මුල් පිටුවට ….. )

ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴

ප්‍රතිචාරයක් ලබාදෙන්න

ඔබගේ ඊමේල් ලිපිනය ප්‍රසිද්ධ කරන්නේ නැත. අත්‍යාවශ්‍යයය ක්ෂේත්‍ර සලකුණු කොට ඇත *