ලසන්ත ඝාතන නාටකයේ තිරෙන් පිටුපස

(22.02.2018 – 21:34 +0530 – lankadeepa.lk)

‘‘බයික්වලින් ආපු කට්ටියක් කූරු දෙකකින් වගේ අනිනවා දැක්කා. ඉන් පස්සේ එයාලා ගියා.’’

සන්ඩේ ලීඩර් පුවත්පතේ හිටපු කර්තෘ ලසන්ත වික්‍රමතුංග මහතාගේ ඝාතනයේ සාක්කි වසන් කළේයැයි කියන සිද්ධියට හිටපු පොලිස් ලොක්කන් කිහිප දෙනකුට මාංචු වැටෙන අයුරු පසුගිය සති දෙකේ දක්නට ලැබිණි. ඒ අතර නියෝජ්‍ය පොලිස්පතිවරයෙක් ද විය. ඒ සමඟ ‘ලසන්තගේ සැකකරුවන් අල්ලලා.‘ යැයි කියමින් සමහරු කතා බහ කරනු පෙනිනි.

ලසන්තගේ මරණය සම්බන්ධයෙන් මේ ලිපිය ලියන මොහොත වන තෙක් එකදු සැකකරුවකු හෝ අත්අඩංගුවට ගෙන නැත. කිසිවකු අත්අඩංගුවට ගෙන ඇත්තේ නම් ඒ ඝාතනයෙන් පසු එහි සාක්කි විනාශ කිරීම සම්බන්ධයෙන් පමණි.

මෙවර සත්‍ය ගවේෂණ විශේෂාංගයෙන් ඉදිරිපත් කරනුයේ ලසන්ත වික්‍රමතුංග මහතාගේ ඝාතනය ගැන සහ මෙතක් විමර්ශන අනුව රහස් පොලිසිය අධිකරණයට කළ කරුණු වාර්තාකිරීම් සම්බන්ධවයි.

2009 වන විට ලීඩර් පබ්ලිකේෂන් ආයතනයේ පුවත්පත් දෙකක් මුද්‍රණය විය. එකක් ඉරුදින පුවත්පතයි. අනෙක් පුවත්පත වූයේ සන්ඩේ ලීඩර් පුවත්පතයි.

සන්ඩේ ලීඩර් පුවත්පතේ කතුවරයා වූයේ ලසන්ත වික්‍රමතුංග මහතා ය. ඒ වන විට ඔහු සිය පුවත්පත මගින් ආණ්ඩුවේ වංචා දූෂණ සම්බන්ධයෙන් හෙළි කරමින් සිටියේය. මිග් ගුවන් යානා ගනුදෙනුව සම්බන්ධයෙන් ඔහු කළ හෙළිදරව්වකට නඩුවක් ද වැටී තිබුණු අතර ජනවාරි මස දෙවැනි සතියේ එළඹෙන නඩු දිනයක දී එම ගනුදෙනුව ගැන වැදගත් තොරතුරු හෙළි කරන බවට ඔහු සිය සගයන් සමඟ කියා තිබිණි.

ලසන්ත ඝාතනය

එදා 2009 ජනවාරි අට වැනි දා ය. වේලාව උදේ 8.10ට පමණ ඇත. පූර්වාරාම පාරේ කන්දේවත්ත ටෙරන්ස් පාරේ ලසන්තගේ නිවසට මදක් නුදුරින් පිහිටි සිල්ලර බඩු කඩයක් අසල ත්‍රීරෝද රියක් නතර කර තිබිණි.

එය එහි නිතර තිබෙන ත්‍රීරෝද රථයකි. රියදුරු පත්තරයක් බලමින් සිටියේය. ත්‍රිරෝද රියට ඉදිරියෙන් යතුරුපැදියක් නතර කර තිබුණු අතර ෆුල්ෆේස් හෙල්මට් පැළැඳි පුද්ගලයෙක් යතුරුපැදියටම වී සිටියේය. තවත් පුද්ගලයෙක් හිස් ආවරණය අතට ගෙන සිගරට්ටුවක් බොමින් පාර දෙස බලා සිටියේය.

උදෑසන 8.20 ට පමණ ලසන්ත වික්‍රමතුංග මහතා ටෙරන්ස් පාරේ නිවසින් පිටත් විය. වංගුව හැරී කඩය පාස් වෙනවාත් සමඟම ‘අන්න එනවා.. අන්න එනවා..‘ යැයි සිගරට්ටුව අතේ තියාගෙන සිටි පුද්ගලයා කී අතර ඒ සමඟම ඔහුද යතුරු පැදියට නැඟ වික්‍රමතුංග මහතාගේ වාහනය පසුපස යන්න විට. මෙම සිදුවීම ගැන සැක සිතුණු ත්‍රීරෝද රියේ රියදුරා ඒ ගැන කඩයේ සිටි පිරිසට දැන්වීය. ලසන්තගේ රියදුරු එම කඩයට නිතර ආව ගිය නිසා රියදුරුගේ අංකය කඩයේ මුදලාලි ළඟ විය. ඔහු රියදුරට ඇමතුමක් ගත්තත් ප්‍රතිචාරයක් නොලැබිණි. ඒ වන විට රියදුරුගේ ජංගම දුරකතනය තිබුණේ ලසන්තගේ වාහනයේය. රියදුරු නිවසේ සිටියදී වාහනය පදවාගෙන ගියේ වික්‍රමතුංග මහතාමය.

ඉන් මිනිත්තු කිහිපයකට පසු යමක් ගැනීමට ලසන්තගේ රියදුරා කඩයට පැමිණියේය. කඩයේ පිරිස සිද්ධිය විස්තර කළ පසු ඔහු වහාම වික්‍රමතුංග මහතාගේ සන්ඩේ ලීඩර් ආයතනයට ගියත් ඔහු පැමිණ සිටියේ නැත. වාහම ඔහු සිද්ධිය ආයතනයේ කළමනාකරුවකුට කීවිට ඔහු ලසන්තට දුරකතන ඇමතුමක් ගෙන රියදුරාට දුන්නේය. ‘බයික්එකේ අංකේ හොයා ගන්න බලන්න.‘ ලසන්ත රියදුරට කීවේය.

ලසන්ත වික්‍රමතුංග මහතා ගියේ බත්තරමුල්ලේ නිවසටය. එම නිවසේ සේවකයකුට අසනීප වි තිබුණු අතර ලසන්ත හිතවත් වෛද්‍යවරයකුගෙන් බෙහෙත් අහගෙන බිරිය සමඟ බෙහෙත් මිලදී ගැනීමට ගියේය. යද්දී සහ එද්දී යතුරු පැදි හඹා එන අයුරු ඔවුහු දුටහ. වහාම වාහනය ගේට්ටුවෙන් ඇතුළට දැමූ අතර යතුරු පැදි ලසන්තගේ ගේට්ටුව පසුකරගෙන ගියේය. මද වේලාවක් එහි සිටි ලසන්ත යළි වාහනයට නැංගේ සන්ඩේ ලීඩර් ආයතනයට යෑමටය. ඒ අතර මඟ දී අසාත් සාලි, මලික් සමරවික්‍රම ඇතුළු පුද්ගලයන් විවිධ වැඩ සඳහා ලසන්තට ඇමතුම් ගත් අතර තමා පසු පස යතුරු පැදි ලුහුබඳින බව ඔහු කීවේය. වහාම ආරක්ෂිත ස්ථානයකට යන ලෙස දුරකතන ඇමතුම් දුන් පුද්ගලයෝ ලසන්තට දැනුම් දුන්හ.

සන්ඩේ ලීඩර් ආයතනයට යන අතරතුර ජපන් මිත්‍රත්ව පාරට ගොස් නීතීඥවරයෙකු හමු වූ වික්‍රමතුංග මහතා ඉන් පිටත්වී ආපසු යද්දී සුපුරුදු පරිදි යතුරු පැදි දෙකක් ඔහු ලුහුබැඳ එනු දැක්කේය. ලසන්ත පසුපස යතුරු පැදි ලුහු බඳින බව කී නිසා මලික් සමරවික්‍රම මහතා වරින් වර ඔහුට කතා කරමින් ආරක්ෂිත ස්ථානයකට යන ලෙස දැනුම් දුන්නේය. උදේ 10.21ට පමණ ලසන්තට යළිත් කතා කළ මලික් සමරවික්‍රම මහතාට තමා පසුපස ලුහු බදින යතුරු පැදි ගැන ලසන්ත දැනුම් දුන් අතර ලසන්ත, සමරවික්‍රම මහතා සමඟ කතා කරමින් වාහනය පදවාගෙන ගියේය.

අත්තිඩිය මලගල කණිෂ්ඨ විද්‍යාලය අසල කහඉරට ඔබ්බෙන් බස් රථයක් කතර කළේය. එනිසා ලසන්තගේ වාහනයද එතැන මඳක් නතර කරන්න සිදු විය. මාරයාගේ හෝරාව එළඹ තිබිණි. යතුරු පැදි දෙකක් ලසන්තගේ වාහනය හරස් කර නතර විය. තවත් යතුරු පැදි දෙකක් පැත්තෙන් නතර විය. ඉන් බැසගත් පිරිස ලසන්ත වෙත ගොස් යමකින් ඇන පළා ගියහ. ඒ සමගම ලසන්ත හා මලික් සමරවික්‍රම අතර දුරකතන සංවාදයද නිමා විය. යතුරු පැදි දෙකක් මලගලින් පිළියන්දල දෙසටත් අනිත් යතුරු පැදි දෙක ගල්කිස්ස දෙසට විදුලි වේගයෙන් ගොස් නොපෙනී ගියේය.

‘බයික්වලින් ආපු කට්ටියක් කූරු දෙකකින් වගේ අනිනවා දැක්කා. ඉන් පස්සේ එයාලා ගියා.‘ එලෙස කීවේ සිද්ධිය ඇසින් දුටුවෙකි. ඉන් පසු ඒ අසල මුද්‍රණ ආයතනයක පුද්ගලයෙක් හා තවත් පුද්ගලයෙක් පැමිණ වෑන් රථයක් නවත්වාගෙන ලසන්ත ඊට පටවා ගත්තේය. මුද්‍රණ ආයතයේ පුද්ගලයා වාහනයේ ඇතුළේ සිටි අතර අනිත් පුද්ගලයා ලසත්නව තම ඔඩොක්කුවේ තබාගෙන පිටුපස සිටියේ.

මද දුරක් වාහයෙන් ලසන්ත ගෙනයද්දී ලසන්තගේ දුකරකතනය යළින් නාද වූ අතර ලසන්ත ඔඩොක්කුවේ තබාගෙන සිටි පුද්ගලයා ඊට ප්‍රතිචාර දැක්වීය. ලසන්තට වූ දේ ඔහු ඇමතුම දුන් පුද්ගලයාට විස්තර කළේය. ඇමතුම දී තිබුණේ මලික් සමරවික්‍රම මහතාය. ‘වහාම කළුබෝවිලට මෙයාව ගෙනියන්න.‘ යැයි උපදෙස් දුන් මලික් සමරවික්‍රම අනිත් අයට පණිවිඩය ලබා දුන්නේය. එහි ප්‍රතිඵලයක් ලෙස මහාචාර්ය මොහාන් සිල්වා ප්‍රමුඛ වෛද්‍ය කණ්ඩායමක් ඒ මොහොතේම කළුබෝවිල රෝහලට පැමිණි අතර ලසන්ත ගෙන ආ ගමන් ප්‍රතිකාර ආරම්භ කළේය. තත්ත්වය දරුණු නිසා මහාචාර්යවරයා ප්‍රමුඛ කණ්ඩායම ශල්‍යකර්මයක් ද සිදු කළත් සාර්ථක වූයේ නැත. එදින දහවල් ලසන්ත වික්‍රමතුංග මහතා මිය ගියේය.

වෙඩි තැබීම සහ ඇනීම

ලසන්තගේ ශල්‍ය කර්මය කළ මහාචාර්යරවයා සිය මතය සඳහන් වාර්තාවක් 2009 ජනවාරි 12 වැනි දා පශ්චාත් මරණ පරීක්ෂණය සිදු කළ අධිකරණ වෛද්‍යවරයාට යොමු කළේය. එමගින් මහාචාර්යවරයා ප්‍රකාශ කර තිබුණේ ශරීරයේ උණ්ඩ කොටස් තිබුණේ නැති බවයි. වෙඩි පිටවූ තැනක් ද නොතිබූ බවත්, වෙඩි තැබීමක සලකුණක්වත් නැති බවත් සඳහන් කළ මහාචාර්යවරයා මෙය වෙඩිතැබීමකින් සිදුවී නැති බව සිය වාර්තාවේ සඳහන් කළේය.

එම ස්ථානයට රජයේ රස පරීක්ෂකද පැමිණ පරීක්ෂණයක් සිදු කළ අතර ඔහුද වාර්තා කළේ මෙය වෙඩි තැබීමක් නොවන බවයි. මේ දෙදෙනාම මෙය වෙඩි තැබීමක් නොවන බව කියද්දී සහ ලසන්තට යමකින් අනින බව ඇසින් දුටුවන් කියද්දී පශ්චාත් මරණ පරීක්ෂණයේ වාර්තාව ලැබුණේ මෙය වෙඩි තැබීමකින් වූ මරණයක් ලෙසයි. ඒ අතරතුර කාලයේ එම වාර්තාව දුන් අධිකරණ වෛද්‍යවරයාට පැමිණි දුරකතන ඇමතුම් ගැන මෙහි සඳහන් නොකරමු. මෙම පශ්චාත් මරණ පරීක්ෂණයත් සමඟ වාර්තා පරස්පර වීම නිසා පරීක්ෂකයෝ අවුලෙන් අවුලට පත්වූහ.

විමර්ශන ආරම්භය

ලසන්ත ඝාතනය වූ ස්ථානයෙන් වෙනත් රාජකාරියකට යමින් සිටි බොරලැස්ගමුව ස්ථානාධිපති ඇපලකොටුව මහතා මෙය දැක වහාම ගල්කිස්ස පොලිසිය දැනුම්වත් කළේය. එවකට පොලිස්පතිවරයා ලෙස කයුතු කළේ ජයන්ත වික්‍රමරත්න මහතාය.

ගල්කිස්ස දිසාව භාර නියෝජ්‍යෙ පොලිස්පති ලෙස කටයුතු කළේ ප්‍රසන්න නානායක්කාර මහතාය. ගල්කිස්ස ජ්‍යෙෂ්ඨ පොලිස් අධීකාරී ලෙස හේමන්ත අධිකාරී මහතා කටයුතු කරද්දී සහකාර පොලිස් අධිකාරී එල් සී ගුණවර්ධන මහතා ගල්කිස්ස පොලිසිය අධීක්ෂණය කළේය. ගල්කිස්ස මූලස්ථාන පොලිස් පරීක්ෂක ලෙස ප්‍රධාන පොලිස් පරීක්ෂක මහේෂ් පෙරේරා මහතා ද ගල්කිස්ස පොලිසියේ අපරාධ අංශයේ ස්ථානාධිපති ලෙස හෙට්ටිආරච්චිගේ තිස්සසිරි සුගතපාල මහතා කටයුතු කළහ.

ලසන්ත වික්‍රමතුංග මහතා ඝාතනය කරන ලද ස්ථානය අයත් වන්නේ ගල්කිස්ස පොලිස් බල ප්‍රදේශයට බැවින් එහි අපරාධ අංශයේ ස්ථානාධිපති සිත්තසිරි සුගතපාල මහතා විමර්ශන ආරම්භ කළේය. ඔහු එම ස්ථානයට ගොස් පරීක්ෂණ සිදු කළ අතර පොලිස් පරීක්ෂක ලලිත් වීරසිංහ මහතා ද සාක්කි සටහන් කර ගනිමින් විමර්ශනයට සම්බන්ධ විය. ලසන්ත වික්‍රමතුංග මහතාගේ වාහනයේ තිබූ ඔහු භාවිත කරන ලද ක්ෂේත්‍ර සටහන් පොත ඇතුළු දේපොළ සොයා ගත් පොලිස් පරික්ෂක වීරසිංහ සකකරු දේපොළ කුවිතාංසි අංත 101/09 යටතේ එය ඇතුළත් කළේය.

උප පොලිස් පරීක්ෂක තිස්ස සුගතපාල මහතා එම සටහන් පොත පරීක්ෂා කිරීමේදී පෙනී ගොස් ඇත්තේ එම සහන් පොතේ පිටු 160කින් පිටු 126කම ලසන්ත වික්‍රමතුංග මහතා ඉංග්‍රීසියෙන් යම් යම් දේ සටහන් කර ඇති බවයි. පොතේ ඉස්සරහ පිටුවේ සහ පසුපස පිටුවේ වාහන අංක දෙකක් තිබූ අතර පවුලේ උදවියගෙන් කියැවුණු දෑ සමඟ මෙම අංක දෙක ලසන්ත ලුහු බැඳ ආ යතුරුපැදි අංක බවට සුගතපාල මහතා සැක කළේය. ඒ අනුව පොලිස් බල අපරාධ තොරතුරු පොතේ ඒ බව සටහන් තබීය. ඉන් පසු නඩු භාණ්ඩ කුවිතාංසි ලේඛණයට අංක 154/09 යටතේ සටහන් පොත ඇතුළත් කළ සුගතපාල මහතා මෝටර් රථ ප්‍රවාහන දෙපාර්තමේන්තුවෙන් එම අංක ගැන විමසීය. ඉන් එක යතුරු පැදි අංකයක් බොරලැස්ගමුවේ බවත් අනික ජා-ඇල බවත් තහවරු කර ගත් සුගතපාල මහතා මුලින්ම බොරලැස්ගමුවට ගියේය.

සටහන් විනාශ කිරීම

එසේ යද්දී ඔහුට දුරකතන ඇමතුමක් ලැබිණි. අපරාධ පරීක්ෂණ දෙපාර්තමේන්තුව අධිකරණයට කරුණු වාර්තා කර ඇති පරිදි ඒ කතාව මෙසේය. ඒ දුරකතන ඇමතුම එන්නේ ජ්‍යෙෂ්ඨ පොලිස් අධිකාරීවරයාගෙනි. ඔහු කියන්නේ වහාම නියෝජ්‍ය පොලිස්පතිවරයෙකු හමුවීමට එන ලෙස දැනුම් දුන් බැවින් එහි යෑමට පැමිණෙන ලෙසයි. ඒ අනුව ජ්‍යෙෂ්ඨ පොලිස් අධිකාරී සහ උප පොලිස් පරීක්ෂක සුගතපාල අදාල නියෝජ්‍ය පොලිස්පති හමුවීමට ගියහ. ඔහු ලසන්තගේ සටහන් පොත බලා එහි තිබූ දෑ එවකට පොලිස්පතිට දුරකතනයෙන් දැන්වීය. පොලිසිය සැක කරන අන්දමට එහි තිබී ඇත්තේ ඉදිරි නඩු වාරයකදී ඔහු අධිකරණයට ඉදිරිපත් කිරීමට තිබූ තොරතුරුය.

ඉන් පසු ටික වේලාවකින් නියෝජ්‍ය පොලිස්පති උප පොලිස් පරීක්ෂකට කියා ඇත්තේ ලසන්තගේ සටහන් පොත තමාට ලබා දෙන ලෙසයි. සටහන් පොත ගැන බල අපරාධ තොරතුරු පොතේ සටහන් යොදා ඇති බව උප පොලිස් පරීක්ෂක කියද්දී ඒවා ඉරා තමාට දෙන ලෙස නියෝජ්‍ය පොලිස්පති ඉල්ලා ඇතැයි පැවසේ. මේ අනීතික ක්‍රියාව කිරීමට මුලින් උප පොලිස් පරීක්ෂක සුගතපාල අකමැති විය.

‘මේවා ලියලා හොයන්න ගිහින් මැරුම් කන්නද හදන්නේ? තමුසෙටත් ලසන්තට වෙච්ච දේ තමයි වෙන්නේ. තමුසෙට ළමයි ඉන්නවා නේද? අරුන්ගෙන් මැරුම් කන්නේ නැතුව තමුසේගේ සටහනුයි නොට් පොතයි මට දීපන්.‘ යනුවෙන් එම නියෝජ්‍ය පොලිස්පතිවරයා උප පොලිස් පරීක්ෂකට කියා ඇති බව රහස් පොලිසිය අධිකරණයට දැනුම් දී තිබේ. ඒ අනුව උප පොලිස් පරීක්ෂකවරයා බල අපරාධ සටහන් පොතේ අදාළ පිටුවල මෙන්ම ලසන්තගේ නෝට් පොතේ මුල් සහ අවසන් පිටුවල ඡායා පිටපත් ගෙන ඒවා සඟවා තබා මුල් පිටපත් ජ්‍යෙෂ්ඨ පොලිස් අධිකාරීවරයා ඉදිරිපිට නියෝජ්‍ය පොලිස්පතිවරයාට ලබා දී ඇත.

ඉන් පසු අපරාධ අංශයේ ස්ථානාධිපතිවරයා පරීක්ෂණ දිගටම කරගෙන ගිය අතර ඒ ගැන සදහන් කිරීමට පෙර පරීක්ෂණ රහස් පොලිසියට පැවරීම ගැන කතා කළ යුතුය. ලසන්තගේ මරණයෙන් පසු එම පරීක්ෂණ විධිමත් කරන ලෙස රජයට දිගින් දිගටම බලපෑම් පැමිණි අතර 2009 නොවැම්බර් 25 වැනි දා පරීක්ෂණ රහස් පොලිසියට පැවරිණි. රහස් පොලිසියට පරීක්ෂණ කර ගෙන යෑමට හැකි වූයේ මාස කිහිපයක් පමණි. එවකට පොලිස්පති මහින්ද බාලසූරිය මහතා 2010 පෙබරවාරි හත් වැනි දා පරීක්ෂණ රහස් පොලිසියෙන් ඉවත් කර නියෝජ්‍ය පොලිස්පති වාකිෂ්ඨ මහතාගේ අධීක්ෂණය යටතේ ත්‍රස්ත විමර්ශන අංශයෙන් සිදු කරන ලෙස දැනුම් දුන්නේය. ඒ වන විට සීඅයිඩියෙන් කළ විමර්ශන ද ත්‍රස්ත විමර්ශන අංශය සැලකිල්ලට ගෙන තිබිණි.

පරීක්ෂණ ත්‍රස්ත විමර්ශන අංශයට

ලසන්ත වික්‍රමතුංග මහතාගේ ගමන් මග ඔස්සේ දිගින් දිගටම දුරකතන අංක 5ක් සංසරණය වූ බව විමර්ශන කණ්ඩායම සොයා ගත්හ. 811, 812, 831, 861 සහ 951 අංකවලින් අවසන් වන එක ළඟ අංක ටිකක් නිසා මේ ගැන සැක සිතී ඒ ඔස්සේ පරීක්ෂණ ආරම්භ විය. ඒවා මිලදී ගෙන තිබුණේ 2018 නොවැම්බර් 12, 13 සහ දෙසැම්බර් පළමු වැනි දා ය. ඕල්කට් මාවතේ කමියුනිකේෂන් එකකින් එම සිම් කාඩ් ලබාගෙන තිබුණේ නුවරඑළියේ ජේසුදාසන් නම් පුද්ගලයකුගේ හැඳුනුම්පතකටය. ඒ අනුව ත්‍රස්ත විමර්ශන අංශය 2010 පෙබරවාරි 26 වැනි දා ජේසුදාසන් අත්අඩංගුවට ගත්තේය.

රැඳවුම් නියෝග මත ඔහුගෙන් ප්‍රශ්න කළ ත්‍රස්ත විමර්ශන අංශය ඊළඟට අත්අඩංගුවට ගන්නේ යුද හමුදා බුද්ධි නිලධාරියෙකි. ඔහු සේව කර තිබුණේ ට්‍රිපෝලි කඳවුරට අනියුක්තවය. ජේසුදාසන් යනු ගරාජ් වැඩපොළක සේවකයෙකි. ඔහුට බොන්නට දී ඔහුගේ හැදුනුම්පත ලබා ගෙන එම සිම් කාඩ් මිලදීගත්තේයැයි අනාවරණය වුවත් ජේසුදාසන් මුදා හැරියේද නැත. ඒ අහිංසකයා අවසානයේ මරුමුවට පත් විය. එය ස්වභාවික මරණයක්ද නැතහොත් මරා දැමීමක්ද යන්න තවමත් අබිරහසකි.

2010 ජනාධිපතිවරණය පැවැතියේ ද මේ අස්සේය. ජනාධිපතිවරණය නිමවීමත් සමඟ 2010 පෙබරවාරි මස 26 වැනි දා ලසන්ත ඝාතනයට යැයි කියමින් කොහුවල යුද හමුදා කඳවුරේ 11ක් දෙනෙක් අත්අඩංගුවට ගනු ලැබූහ. යළිත් පහුවැනිදා තවත් හය දෙනෙක් අත්අඩංගුවට ගනු ලැබූහ. මේ සියලු දෙනා එවකට සරත් ෆොන්සේකා මහතාගේ ආරක්ෂක රාජකාරියේ ආවේක්ෂණ රාජකාරි කළ පිරිසකි. රජය පෙරළීමට කුමන්ත්‍රණය කිරීමේ චෝදනාවට රැඳවුම් නියෝග ගත්තතද මේ පිරිසෙන් නව දෙනෙක් දින හයකට පසු පොලිස් ඇප මත මුදා හැරිණි. ඉතිරි අට දෙනා දින 11කට පසු පොලිස් ඇප පිට මුදා හැරිණි. ට්‍රිපෝලි කඳවුරේ යුද හමුදා බුද්ධි සාමාජිකයා නීතිපති උපදෙස් පිට නිදොස් කොට නිදහස් කරනු ලැබීය.

පරීක්ෂණ යළි රහස් පොලිසියට

වත්මන් රජය බලයට පත්වීමෙන් පසු මෙම සිද්ධියේ පරීක්ෂණ රහස් පොලිසියට පවරන ලෙස හතර අතින් ආ බලපෑම් සමඟ 2015 පෙබරවාරි 25 වැනි දා යළිත් පරීක්ෂණ රහස් පොලිසියට පැවරිණි. ඒ අනුව රහස් පොලිසිය භාර ජ්‍යෙෂ්ඨ නියෝජ්‍ය පොලිස්පති රවී සෙනවිරත්න සහ එවකට අධ්‍යක්ෂ දැන් නියෝජ්‍ය පොලිස්පති සුදත් නාගහමුල්ල මහත්වරුන්ගේ අධීක්ෂණයෙන් එවකට සහකාර පොලිස් අධිකාරී දැන් රහස් පොලිස් අධ්‍යක්ෂ ජ්‍යෙෂ්ඨ පොලිස් අධිකාරී ශානි අබේසේකර සහ සහකාර පොලිස් අධිකාරී බී එස් තිසේරා මහත්වරුන්ගේ උපදෙස් පරිදි සමූහ මංකොල්ල විමර්ශන අංශයේ ස්ථානාධිපති පොලිස් පරීක්ෂක නිශාන්ත සිල්වා ඇතුළු පිරිසක් විමර්ශන ආරම්භ කළහ.

පරීක්ෂකයන්ට මුලින්ම ගැටළුව වූවේ ලසන්ත මරණයට පත්වූ ආකාරය ගැන ඉදිරිපත් වූ පරස්පර අදහස්ය. ඒ අනුව අධිකරණ නියෝගයක් මත ලසන්තගේ දේහය 2016දී යළි ගොඩ ගත් අතර කොළඹ ප්‍රධාන අධිකරණ වෛද්‍ය නිලධාරී අජිත් තෙන්නකෝන් ඇතුළු අධිකරණ වෛද්‍ය මණ්ඩලයක් යළි දෙවැනි පශ්චාත් මරණ පරීක්ෂණයක් සිදු කළහ. එහි නිගමනය වූයේ ලසන්ත මරා දමා ඇත්තේ වෙඩි තැබීමකින් නොවන බවයි. හිසට එල්ල කළ ප්‍රහාරයකින් (ඇනීමකින්) ලසන්ත මරා දමා ඇති බව නිගමනය විය. එම වාර්තාව සහ ලසන්ත මිය ගිය අවධියේම රස පරීක්ෂක දුන් වාර්තාවත්, ශල්‍යකර්මය කළ මහාචාර්යවරයා දුන් වාර්තාවත් සමානය විය. ලසන්ත මැරීමට යොදා ගෙන තිබුණේ වෙනත් රටවල බැටළුවන් මැරීමට යොදා ගන්නා නවීන උපකරණයක් බවට දැන් සැක කරයි. එම උපරණය හිස මත තබා බොත්තම තද කළ විට උල් කටුවක් හිස පසාරු කරගෙන ගොස් නැවත ආයුධය ඇතුළට එයි.

අලුතින් පරීක්ෂණ ආරම්භ කළ රහස් පොලිසිය මුලින්ම කළේ පොලිසියේ උදවියගේ සාක්කි සටහන් කර ගැනීමයි. 2015 ඔක්තෝබර් 12 වැනි දා සහ 2015 නොවැම්බර් 04 වැනි දා උප පොලිස් පරීක්ෂක සුගතපාල ගෙන්වා ප්‍රකාශ සටහන් කර ගත්තේය. එම ප්‍රකාශ සහ අනෙක් පොලිස් නිලධාරීන්ගේ ප්‍රකාශවල පරස්පරතා තිබුණු අතර ඔහුගේ ප්‍රකාශය අසත්‍ය බව දුරකතන විශ්ලේෂණ වාර්තා අනුවද පෙනී ගියේය. ඒ ගැන යළිත් ප්‍රකාශයක් සටහන් කර ගැනීමට පසුගිය ජනවාරි 31 වැනි දා උප පොලිස් පරීක්ෂක සුගතපාල කැඳවනු ලැබීය. ප්‍රකාශය අඩක් ලබා ගෙන සුගතපාලට දහවල් ආහාරයට ආපන ශාලාවට යෑමට ඉඩ දුන් අතර ඉන් ප්‍රයෝජන ගත් උප පොලිස් පරීක්ෂක රහස් පොලිසියෙන් පැන ගොස් තිබිණි.

සැකකරුගේ පැන යෑම ගැන සැක සිතුණු රහස් පොලිසිය එදින මධ්‍යම රාත්‍රියේ කළුතර පොලිසියේද සහාය ඇතිව කලුතර කටුකුරුන්දේ සැකකරුගේ නිවසක සිටිය දී අත්අඩංගුවට ගත්තේය. ඉන් පසු පෙබරවාරි පළමු වැනි දා රහස් පොලිසියේ සහකාර පොලිස් අධිකාරී බී එස් තිසේරා මහතාගේ ලිපියක් අධිකරණයට ඉදිරිපත් කළ රහස් පොලිසියේ සමූහ මංකොල්ල විමර්ශන අංශය අධිකරණයෙන් ඉල්ලා සිටියේ වැඩිදුර ප්‍රශ්න කිරීම සදහා පැය 48 ක කාලයක් සැකකරු රදවා සඳහා ගැනීමට අවසර දෙන ලෙසයි. ඊට අධිකරණයෙන් අවසර ලැබිණි.

ඒ අනුව සැකකරුගෙන් කළ ප්‍රශ්න කිරීම්වලදී නියෝජ්‍ය පොලිස්පතිගේ නියෝගය අනුව පොලිස් බල අපරාධ තොරතුරු පොතෙන් ඉරා ගත් පිටුවල ඡායාපිටපත් වසර නවයකට පසු රහස් පොලිසිය සොයා ගත්තේය. ඒ සැකකාර උප පොලිස් පරීක්ෂකගේ නිවසේ සඟවා තිබියදීය.

යතුරු පැදි නාටකය

ලසන්ත වික්‍රමතුංග මහතා ඝාතනයට පැමිණි යතුරු පැදි අත්තිඩිය ඇලේ ඇති බවට එවකට පොලිස්පතිට පෙත්සමක් ලැබුණු බවත් ඒ ගැන විමර්ශනය කරන ලෙසත් උසස් පොලිස් නිලධාරීන් උප පොලිස් පරීක්ෂක සුගතපාලට දැනුම් දී තිබිණි. එම ඇළේ කිඹුලන් ඇති නිසා කිමිදුම්කරුවන් යෙදවීමට තීරණය කළ ඔහු එවැනි අය සොයා බැලීය. 26 වැනි දා කිමිදුම්කරුවන් යොදා සෙවූවත් කිසිවක් හමු නොවීය. ඉන් පසු 27 වැනිදා සෝදිසි මෙහෙයුම් යළි ආරම්භ කළ අතර උප පොලිස් පරීක්ෂකට ලද දුරකතන ඇමතුමකින් පසු ‘අර අට්ටික්කා ගහ ළඟ බලන්ඩ.‘ යැයි ඔහු කිමිදුම්කරුවන්ට උපදෙස් දී තිබේ. එම උපදෙස් අනුව සොයා බලද්දී අට්ටික්කා ගහ ළඟ තිබූ යතුරු පැදි දෙක සොයා ගෙන ඇත.

ඒවායේ එන්ජින් අංක සහ චැසි අංක පරීක්ෂා කරද්දී පෙනී ගොස් ඇත්තේ එය වවුනියාවේ පුද්ගලයකුට අයිති බවයි. වවුනියාවට ගොස් හිමිකරු හමුවූ විට කියා ඇත්තේ ඊට වසරකට පමණ පෙර එය වවුනියාවේ රත්‍රන් බඩු කඩ හිමිකරුවකුට විකිණූ බවයි. එම දෙවැනි ගැනුම් කරු ගැන සෙවූ විට තොරතුරු ලැබුණේ දෙවැනි ගැනුම්කරු අතුරුදන්ව ඇති බවයි. ඒ ගැන සොයන්නට එපා යැයි ඉහළින් උප පොලිස් පරීක්ෂකට උපදෙස් ලැබිණි. ඒඅනුව කතාවක් ගෙතිනි. ඒ යතුරු පැදි වවුනියාවේ එල්ටීටීඊ පුද්ගලයකුට අයිති බවයි. මෙය එල්ටීටීඊ ඝාතනයක් බවට ප්‍රචාරය වන්නට වැඩි කාලයක් ගත වූයේ නැත.

රහස් පොලිසිය විමර්ශන ආරම්භ කළ පසු යතුරු පැදියේ දෙවැනි හිමිකරු සොයා ගියේය. දෙවැනි හිමිකරු විශ්නු කුමාර් පූන්තොට්ටම් ප්‍රෙද්ශයේ පදිංචිකරුවෙක් විය. ඔහු එල්ටීටීඊට සම්බන්ධ පුද්ගලයකු නොවූ අතර රත්තරන් බඩු කඩයක් කරගෙන ගිය පුද්ගලයෙකි. 2009 ජනවාරි 18 වැනි දා ඔහු සහ මිතුරකු යතුරු පැදියෙන් යද්දි කොළපාට ජීප් රියකින් පැමිණි පිරිසක් මේ දෙදෙනා සහ යතුරු පැදියට ඊට පටවා ගත් බවට ඇසින් දුටු සාක්කි හමු විය. ඊට පසු දින එනම් ජනවාරි 19 වැනි දා මේ දෙදෙනාගේ සිරුරු අනුරාධපුරය ප්‍රදේශයේ තිබී සොයා ගෙන තිබිණි. ඔවුන් මරා දමා තිබුණේ හිසට වෙඩි තබාය.

එනම් ලසන්ත ඝාතනයට යොදා ගත්තේයැයි කී යතුරු පැදිය වවුනියාවෙන් පැහැරගෙන තිබුණේ ලසන්ත වික්‍රමතුංග මරා දමා දින 10කට පසුවය. එසේ නම් එය ලසන්ත වික්‍රමතුංග මැරීමට යොදා ගත් යතුරු පැදියක් නොව ලසන්තගේ පරීක්ෂණ වෙනතකට යොමු කිරීමට උපයෝගී කර ගත් යතුරු පැදියක් බව අනුමාන කළ රහස් පොලිසිය පොලිස්පතිට ලැබුණු පෙත්සම ගැන සොයා බැලීය. පෙත්සම ලැබී තිබුණේ 2009 ජනවාරි 26 වැනි දාය. නමුත් යතුරු පැදිය සොයාන ලෙස උපදෙස් දී තිබුණේ ජනවාරි 25 වැනි දාය. ඒ අනුව යතුරු පැදි නාටකය එයින් නිමා වූයේ තවත් අපරාධයක (යතුරු පැදි හිමිකරු සහ සගයා ඝාතනය) තොරතුරු හෙළිදරව් කරමිනි.

ලසන්ත නඩුවේ දැන් සැකකරුවෝ තිදෙනෙක් සිටිති. ඒ යුද හමුදා සාමාජිකයෙක් සහ පොලිසියේ දෙදෙනෙකි. මේ තිදෙනාම ලසන්ත ඝාතන සැකකරුවෝ නොවෙති. ඔවුන් අත්අඩංගුවට ගෙන ඇත්තේ සාක්කි වසන් කිරීමට හෝ සාක්කි කරුවන්ට බලපෑම් කිරීම යටතේය. එසේ නම් ලසන්ත ඝාතනයේ නියම මිනීමරුවන් තවමත් නිදැල්ලේය.

ලසන්ත ඝාතනයේ සැකකරුවන් අත්අඩංගුවට ගැනීම පහසු නොවන්නේ සාක්කි රැසක් විනාශ කර ඇති නිසාය. මෙතරම් අමාරු වාතාවරණයක මෙතෙක් දුර විමර්ශන සාර්ථකව සිදු කරීම ගැන රහස් පොලිසියට තුති පිදිය යුතු අතර විමර්ශන කඩිනම් කර ලසන්ත ඝාතකයන් අත්අඩංගුවට ගැනීම රහස් පොලිසියේද වගකීමකි. ඊට අවශ්‍ය සහාය ලබා දීම සහ අවශ්‍ය වටපිටාව සැකසීම දේශපාලන අධිකාරියේ මෙන්ම සියලු පුරවැසියන්ගේ වගකීමකි. එසේ නොවුණහොත් ලසන්ත ඝාතනයද අපරාධකරුවන් නැති තවත් එක් මරණයක් වනු ඇත.

– තරිඳු ජයවර්ධන සහ බිඟුන් මේනක ගමගේ
( tharindudld@gmail.com / bingungamage88@gmail.com )

++++++++++++++++++++++++++++++++++++

දිනපොත සමග වළදැමූ ලසන්ත ඝාතනයේ අබිරහස
(18.02.2018 – divaina.com)

ජ්‍යෙෂ්ඨ නියෝජ්‍ය පොලිස්‌පති ප්‍රසන්න නානායක්‌කාර අත්අඩංගුවට ගත් හේතු මෙන්න…
අත්තිඩිය ඇළේ තිබුණු යතුරු පැදිය කාගේද?

සන්ඩේ ලීඩර් පුවත්පතේ හිටපු කර්තෘ ලසන්ත වික්‍රමතුංග ඝාතනය කලින් කලට ජනප්‍රිය දේශපාලන මාතෘකාවක්‌ බවට පත්වෙයි. රටේ නීතිය සාමය, සාධාරණත්වය ගැන පුරසාරම් දොඩන දේශපාලනඥයන් ලසන්ත ඝාතනය ගැන පුන පුනා කියන්නේ ඔහුට සාධාරණයක්‌ ඉටුකර දීමට දැයි සැක සහිතය.

ඒ දේශපාලන කතා හුදෙක්‌ තම ජනප්‍රියත්වයන් සඳහා යොදා ගන්නා මාතෘකා බවට රටේ බුද්ධිමත් ජනතාව තේරුම් ගෙන සිටින බව නොරහසකි. ලසන්ත ඝාතනය වී වසර 09 ක්‌ ගත වී ගොස්‌ හමාරය. එහෙත් තවමත් ඔහුට සාධාරණයක්‌ ඉටු වී නැත.

ලසන්ත වික්‍රමතුංග ඝාතන සිද්ධිය මේ දිනවල නැවතත් කරලියට පැමිණ තිබෙයි. ලසන්ත ඝාතන කථාව නැවත අලුත් වන්නේ ඒ සම්බන්ධයෙන් පොලිස්‌ දෙපාර්තමේන්තුවේ හිටපු ජ්‍යෙෂ්ඨතම නිලධාරීන් තිදෙනකුට එරෙහිව නීතිය ක්‍රියාත්මක වීමත් සමඟය.

ලසන්ත වික්‍රමතුංග ඝාතන විමර්ශනය යට ගැසීම සහ සාක්‍ෂි විනාශ කිරීම යන චෝදනා යටතේ එවකට ගල්කිස්‌ස පොලිසියේ අපරාධ අංශයේ ස්‌ථානාධිපතිවරයාව සිටි පොලිස්‌ පරීක්‍ෂක තිස්‌ස සුගතපාල අපරාධ පරීක්‍ෂණ දෙපාර්තමේන්තුව (සී.අයි.ඩී) මගින් අත්අඩංගුවට ගත්තේ මීට සති දෙකකට උඩදීය.

ලසන්ත ඝාතනය සිදු වූ කාල සීමාවේ ගල්කිස්‌ස කොට්‌ඨාස භාර ජ්‍යෙෂ්ඨ පොලිස්‌ අධිකාරිවරයා වූ හේමන්ත අධිකාරි සී.අයි.ඩී.යට ගෙන්වා ප්‍රශ්න කළේ ඉකුත් සතියේදී ය.

ලසන්ත වික්‍රමතුංග ඝාතනයේ විමර්ශන ක්‍රියාත්මක වූ ආකාරය මෙන්ම නීතිය කනපිට පෙරලූ ආකාරයත් පිළිබඳව හේමන්ත අධිකාරි සී.අයි.ඩී.ය හමුවේ වැදගත් තොරතුරු හෙළි කළ බව පැවසෙයි.

ලසන්ත ඝාතන තොරතුරු යට ගැසීම, සාක්‍ෂි විනාශ කිරීම, විමර්ශන නිලධාරීන්ට බලපෑම් කිරීම ඇතුළු චෝදනා 07 ක්‌ සම්බන්ධයෙන් එවකට බස්‌නාහිර පළාත දකුණ භාරව සිටි ජ්‍යෙෂ්ඨ නියෝජ්‍ය පොලිස්‌පති ප්‍රසන්න නානායක්‌කාර සීඅයිඩිය මගින් අත්අඩංගුවට ගත්තේ ඉන් අනතුරුවය.

ලසන්ත වික්‍රමතුංග ඝාතනය වන්නේ 2009 වර්ෂයේ ජනවාරි මස 08 වැනිදාය. අත්තිඩිය මලගල මහා විද්‍යාලය ඉදිරිපිට ජනාකීර්ණ මාර්ගයකදී ලසන්ත ඝාතනය වන්නේ ඉතාම සාහසික ආකාරයටය. ලසන්ත ඝාතනය සිදු වූ ප්‍රදේශය අයත්ව තිබුණේ ගල්කිස්‌ස පොලිස්‌ බල ප්‍රදේශයටය.

මෙම ඝාතනය සිදුවෙද්දී ගල්කිස්‌ස පොලිසියේ අපරාධ අංශයේ ස්‌ථානාධිපතිවරයා වූයේ තිස්‌ස සුගතපාලය. මූලස්‌ථාන පොලිස්‌ පරීක්‍ෂකවරයා ලෙස මහේෂ් පෙරේරා කටයුතු කළ අතර, පොලිස්‌ අධිකාරිවරයා වූයේ එල්. සී. ගුණවර්ධනය. ගල්කිස්‌ස කොට්‌ඨාස භාර ජ්‍යෙෂ්ඨ පොලිස්‌ අධිකාරිවරයා වූයේ හේමන්ත අධිකාරිය. එවකට බස්‌නාහිර පළාත දකුණ භාරව සිටියේ නියෝජ්‍ය පොලිස්‌පති ප්‍රසන්න නානායක්‌කාරය. 2009 වර්ෂය වන විට පොලිස්‌පතිවරයා වූයේ ජයන්ත වික්‍රමරත්නය.

ලසන්ත ඝාතන සිද්ධියේ මූලික විමර්ශන කටයුතු භාර වී තිබුණේ තිස්‌ස සුගතපාල වෙතය. ඔහු මෙම විමර්ශන ක්‍රියාත්මක කරන්නේ කොට්‌ඨාස භාර ජ්‍යෙෂ්ඨ පොලිස්‌ අධිකාරිවරයා සහ නියෝජ්‍ය පොලිස්‌පතිවරයා සමඟ සෘජු සම්බන්ධතාවන් පවත්වමින් ය.

ඝාතනය වූ අවස්‌ථාවේ ලසන්තගේ මෝටර් රථයේ තිබූ ඔහුට අයත් දේපළ සියල්ල තිස්‌ස සුගතපාල වෙත ලැබෙන්නේ 2009 වර්ෂයේ ජනවාරි 16 වැනිදා ය.

ලසන්ත පුරුද්දක්‌ වශයෙන් තොරතුරු සටහන් පොතක්‌ පාවිච්චි කළේය. ඔහු යන එන සෑම අවස්‌ථාවකදීම මේ තොරතුරු සටහන් පොත රැගෙන යැමට අමතක නොකළේය. ලසන්ත ඝාතනය වන අවස්‌ථාවේ මේ තොරතුරු සටහන් පොත ඔහු සතුව තිබුණේය. එය තිබුණේ ඔහුගේ මෝටර් රථයේ ය.

ලසන්ත සතුව තිබී සොයාගත් භාණ්‌ඩ අතර වූ තොරතුරු සටහන් පොත ද තිස්‌ස සුගතපාල භාරයට ගත්තේය. මේ තොරතුරු සටහන් පොතේ පිටු 160 කි. එහි පිටු 128 කම ලසන්ත විවිධ තොරතුරු සටහන් කර තිබුණේය. එහි සියලු තොරතුරු සටහන් කර තිබුණේ ඉංග්‍රීසි භාෂාවෙන් ය.

තිස්‌ස සුගතපාල ලසන්තගේ තොරතුරු සටහන් පොත පරීක්‍ෂා කළේය. එහි සටහන් කර තිබූ බොහෝ දේවල් තේරුම් ගැනීමට පොලිස්‌ නිලධාරියා සමත් වූයේ නැත. එහෙත් සටහන් පොතේ පිටකවරයේ වාහන දෙකක අංකයන් සටහන්කර තිබුණේය. තම ජීවිතයට තර්ජන එල්ල කරන පුද්ගලයා ලුහුබැඳ එන වාහනවල අංක ලසන්ත විසින් සටහන් කරගෙන තිබෙන බව පොලිසිය ඒ වන විට දැනගෙන තිබුණේ ඔහුගේ පවුලේ සාමාජිකයන්ගෙන් ලබා ගත් තොරතුරු වලින්ය.

ලසන්තගේ සටහන් පොතේ තිබූ සැකකටයුතු වාහන අංක දෙක පරීක්‍ෂා කිරීමට තිස්‌ස සුගතපාල කටයුතු කළේය. මේ සම්බන්ධයෙන් ගල්කිස්‌ස පොලිසියේ අපරාධ අංශයේ තොරතුරු සටහන් පොතේ දීර්ඝ සටහනක්‌ තැබීමට ද සුගතපාල කටයුතු කර තිබුණේය.

එමෙන්ම ලසන්තගේ තොරතුරු සටහන් පොත නඩු භාණ්‌ඩයක්‌ ලෙස නම් කිරීමට ද සුගතපාල කටයුතු කළේය. මේ අතර මෝටර් රථ ලියාපදිංචි කිරීමේ දෙපාර්තමේන්තුවෙන් ලැබුණු තොරතුරු අනුව ලසන්ත වික්‍රමතුංගගේ තොරතුරු සටහන් පොතේ තිබූ වාහන අංක දෙක යතුරුපැදි දෙකකට අයත් ඒවා බව හෙළිවිය. එම යතුරුපැදි ජාඇල සහ බොරලැස්‌ගමුව ප්‍රදේශවල පුද්ගලයන් දෙදෙනකුට අයත් බව ද තිස්‌ස සුගතපාල සොයා ගත්තේය.

තමන් විසින් සිදුකළ විමර්ශනයන් පිළිබඳව තිස්‌ස සුගතපාල ගල්කිස්‌ස කොට්‌ඨාස භාර ජ්‍යෙෂ්ඨ පොලිස්‌ අධිකාරිවරයා සහ නියෝජ්‍ය පොලිස්‌පතිවරයා දැනුවත් කරන්නේ ඉන් පසුවය.

ලසන්තගේ තොරතුරු සටහන් පොත සහ මේ සම්බන්ධයෙන් සටහන් තැබූ අපරාධ අංශයේ සටහන් පොත රැගෙන වහාම පැමිණෙන ලෙස නියෝජ්‍ය පොලිස්‌පතිවරයා ගල්කිස්‌ස ජ්‍යෙෂ්ඨ පොලිස්‌ අධිකාරිවරයාට දැනුම් දී තිබිණි.

තිස්‌ස සුගතපාල ලසන්තගේ තොරතුරු සටහන් පොත නියෝජ්‍ය පොලිස්‌පතිවරයා වෙත රැගෙන යැමට පෙර එහි මුල් කවරයේ සහ පසුපස කවරයේ ඡායාපිටපත් දෙකක්‌ ලබා ගැනීමට කටයුතු කළේය. ඒ ඡායා පිටපත් ලබා ගත් ඇතුගල නමැති පොලිස්‌ කොස්‌තාපල්වරයා අමතර ඡායා පිටපතක්‌ ලබා ගෙන එය තමන් සතුව තබා ගත්තේ නැවත අවශ්‍ය වූවොත් ප්‍රයෝජනයට ගැනීම සඳහාය.

ලසන්තගේ තොරතුරු සටහන් පොත නියෝජ්‍ය පොලිස්‌පති ප්‍රසන්න නානායක්‌කාර හොඳින් පරීක්‍ෂා කර තිබුණේය. නියෝජ්‍ය පොලිස්‌පතිවරයාට ඉංග්‍රීසි භාෂාව හොඳින් හැසිරවිය හැකි නිසා ලසන්ත ඉංග්‍රීසි භාෂාවෙන් සටහන් කර තිබූ සියල්ල පරීක්‍ෂා කිරීමට හැකි විය.

නියෝජ්‍ය පොලිස්‌පතිවරයා ලසන්තගේ තොරතුරු සටහන් පොතේ වූ ඇතැම් විස්‌තර ඒ මොහොතේ ම පොලිස්‌පතිවරයා වෙත ලබා දීමට කටයුතු කළේ එය අතිශය වැදගත් වූ නිසාය.

ලසන්තගේ තොරතුරු සටහන් පොත සහ අපරාධ අංශයේ සටහන් පොතේ වූ වාර්තාව පොලිස්‌පතිවරයා විසින් ඉල්ලා සිටින බව පැවසූ නියෝජ්‍ය පොලිස්‌පතිවරයා ඒවා තමන් සන්තකයේ තබා ගත්තේය.

මේවා ගැන හොයන්න ගිහිල්ලා තමුසෙටත් මැරුම් කන්න වෙයි. ඒ නිසා සද්ද නැතිව ඉන්නවා යනුවෙන් නියෝජ්‍ය පොලිස්‌පතිවරයා පොලිස්‌ පරීක්‍ෂක තිස්‌ස සුගතපාලට අනතුරු ඇඟවීමක්‌ ද කර තිබුණේය. මේ අවස්‌ථාවට ගල්කිස්‌ස ජ්‍යෙෂ්ඨ පොලිස්‌ අධිකාරිවරයාව සිටි හේමන්ත අධිකාරි ද පැමිණ සිටියේය.

ගල්කිස්‌ස පොලිසිය විසින් කරගෙන ආ ලසන්ත ඝාතන විමර්ශන කටයුතු එතැන් සිට මන්දගාමී වන්නට පටන් ගත්තේය. ලසන්තගේ තොරතුරු සටහන් පොත සහ තිස්‌ස සුගතපාල විසින් අපරාධ අංශයේ තොරතුරු සටහන් පොතේ තැබූ සටහනට සිදු වූයේ කුමක්‌ ද යන්න අදටත් අභිරහසකි.

මේ අතර ලසන්තගේ තොරතුරු සටහන් පොත හා සමාන පොතක්‌ රැගෙන එන ලෙස තිස්‌ස සුගතපාල පොලිස්‌ නිලධාරියකු වෙත භාර දී තිබුණේය. දින දෙකක්‌ තිස්‌සේ කොළඹ පුරා කරක්‌ ගැසූ පොලිස්‌ නිලධාරියාට ලසන්තගේ තොරතුරු සටහන් පොතට සමාන පොතක්‌ සොයා ගැනීමට නොහැකි විය.

අවසානයේදී ලසන්තගේ සටහන් පොත මුද්‍රණය කළ සමාගම වෙත ගොස්‌ ඒ හා සමාන පොතක්‌ මිලදී ගැනීමට පොලිස්‌ නිලධාරීහු කටයුතු කළහ.

ඒ පොත ඔවුන් මිලදී ගෙන තිබුණේ අවශ්‍ය වූවොත් එය නඩු භාණ්‌ඩයක්‌ ලෙස ඉදිරිපත් කිරීමටය. එහෙත් ලසන්තගේ සටහන් පොත හෝ අලුතින් ගත් සටහන් පොතට අදටත් සිදු වූ දෙයක්‌ නැත.

මේ අතර 2009 වර්ෂයේ ජනවාරි 25 වැනිදා පොලිස්‌පතිවරයා විසින් නියෝජ්‍ය පොලිස්‌පතිවරයාට වැදගත් තොරතුරක්‌ ලබා දුන්නේය. ලසන්ත ඝාතනයට පැමිණි ඝාතකයන් ගමන් ගත් යතුරු පැදියක්‌ අත්තිඩිය ඇළේ ගිල්වා ඇති බවට ලබාදුන් තොරතුර පරීක්‍ෂා කිරීමට නියෝග ලැබුණේය.

නියෝජ්‍ය පොලිස්‌පතිවරයා මෙන්ම ජ්‍යෙෂ්ඨ පොලිස්‌ අධිකාරිවරයා ද මේ රාජකාරිය භාර කළේ පොලිස්‌ පරීක්‍ෂක තිස්‌ස සුගතපාල වෙතය. අත්තිඩිය ඇළේ කිඹුලන් සිටින බැවින් එහි කිමිදීමට පුද්ගලයන් සොයා ගැනීම අපහසු කටයුත්තක්‌ විය.

එහෙත් කෙසේ හෝ ගලකිස්‌ස ප්‍රදේශයේ කිමිදුම්කරුවන් දෙදෙනෙක්‌ හොයාගෙන ඔවුන් අත්තිඩිය ඇළේ බස්‌සවා යතුරුපැදිය සෙවීමේ කටයුතු පොලිස්‌ පරීක්‍ෂකවරයා විසින් ක්‍රියාත්මක කළේය. ජනවාරි 26 වැනිදා දවස පුරා අත්තිඩිය ඇළ පරීක්‍ෂා කළ ද යතුරුපැදිය පිළිබඳ හෝඩුවාවක්‌ ලැබුණේ නැත.

ජනවාරි 27 වැනිදා ද කිමිදුම්කරුවන් දෙදෙනා යොදාගෙන යතුරුපැදිය සෙවීමේ කටයුතු සුගතපාල ක්‍රියාත්මක කළේය. එදින දහවල් සුගතපාලගේ ජංගම දුරකථනයට කිසිවකුගෙන් ඇමතුමක්‌ ලැබුණේය. ඒ ඇමතුම ලබා ගත් සුගතපාල කිමිදුම්කරුවන්ට කීවේ ඇළ අසල ඇති අට්‌ටික්‌කා ගස යට කිමිදී පරීක්‍ෂා කරන ලෙසය.

ලැබුණු තොරතුර සාර්ථකය. එම ස්‌ථානයේ ගිල්වා තිබූ යතුරුපැදිය කිමිදුම්කරුවන් විසින් සොයා ගත්හ. සොයාගත් යතුරුපැදියේ අංක තහඩු තිබුණේ නැත. එහි එන්ජින් අංකය පරීක්‍ෂා කළ පොලිස්‌ නිලධාරීන් යතුරුපැදියේ හිමිකරුගේ ලිපිනය සොයා ගත්තේය.

යතුරුපැදිය හිමිකරු වවුනියාව ප්‍රදේශයේ පදිංචි නඩරාජා නමැති අයෙකි. ගල්කිස්‌ස පොලිසියේ නිලධාරීන් වවුනියාවට ගොස්‌ යතුරුපැදියේ හිමිකරු අත්අඩංගුවට ගත්හ.

“සර් මම මේ බයික්‌ එක විකුණලා තිබුණේ. රත්ත්‍රන් බඩු බිස්‌නස්‌ කරන විග්නකුමාර් කියලා එක්‌කෙනෙක්‌ තමයි මේක ගත්තේ. යතුරුපැදියේ හිමිකරු පොලිසියට ප්‍රකාශයක්‌ ලබා දුන්නේය. අවසානයේදී පොලිසිය සිදුකළ විමර්ශනවලින් හෙළිකර ගෙන තිsබුණේ යතුරුපැදිය මිලදී ගෙන තිබූ පුද්ගලයා එල්.ටී.ටී.ඊ. සාමාජිකයකු බවත්, ඔහු මුදා නොගත් ප්‍රදේශයක පදිංචි වී සිටින බවත් ය.

ලසන්ත ඝාතනයට එල්.ටී.ටී.ඊය සම්බන්ධ බවට ප්‍රචාරයක්‌ යන්නේ එතැන් සිටය.

අත්අඩංගුවට ගත් නඩරාජා රඳවා තබා ගැනීමේ නියෝගයක්‌ මත තබාගෙන ප්‍රශ්න කිරීමට සුගතපාල කටයුතු කළේය.

මේ අතර මෙම යතුරුපැදිය මිලදී ගෙන තිබූ විග්නකුමාර් නමැති දෙමළ ජාතිකයාගේ සහ තවත් අයකුගේ මළ සිරුරු අනුරාධපුර තිරප්පනේ ප්‍රදේශයේ ටයර්සෑයක පිළිස්‌සෙමින් තිබියදී පොලිසිය සොයා ගත්තේය.

මේ පුද්ගලයන් දෙදෙනා ඝාතනය කර තිබුණේ අත් පා බැඳ දමා හිසට වෙඩි තැබීමෙන් අනතුරුව බව ද මරණ පරීක්‍ෂණයේ සඳහන් විය. මේ සියලු කරුණු කාරණා එකින් එක සිදුවෙද්දී ලසන්ත වික්‍රමතුංග ඝාතනය රටේ සිදු වූ තවත් එක්‌ අභිරහස්‌ මිනීමැරුම් ගොන්නට ඇතුළත් වුණේය. එහෙත් සිවිල් සංවිධාන, ජනමාධ්‍ය ආයතන සහ මාධ්‍යවේදීන් ලසන්ත ඝාතනය යටපත් වීමට ඉඩ නොදී විශාල හඬක්‌ නඟමින් සිටියහ. ඒ හඬ ජාත්‍යන්තරය දක්‌වා ම රැගෙන යැමට ඔවුහු සමත් වූහ.

ලසන්ත ඝාතනයේ විමර්ශන සාධාරණ අයුරින් ක්‍රියාත්මක කරන බවට ඒත්තු ගැන්වීමට එවකට රජය දැඩි උත්සාහයක්‌ ගෙන තිබුණේය. ලසන්ත ඝාතනයේ විමර්ශන කටයුතු ත්‍රස්‌තවාදී විමර්ශන ඒකකය වෙත පැවරෙන්නේ එවකට පොලිස්‌පති මහින්ද බාලසූරියගේ නියෝග මතය.

එවකට ත්‍රස්‌ත විමර්ශන ඒකකයේ නිලධාරීන්ට ද අවශ්‍යව තිබුණේ ලසන්ත ඝාතන විමර්ශන ක්‍රියාත්මක කරනවාට වඩා එය යට ගැසීමටය. ත්‍රස්‌ත විමර්ශන ඒකකය ලසන්ත ඝාතන සිද්ධිය සම්බන්ධයෙන් යුද හමුදා බුද්ධි අංශ නිලධාරීන් පිරිසක්‌ අත්අඩංගුවට ගෙන ඔවුන් මුදාහරිනු ලැබීය. එය සිදුවන්නේ එවකට රජයේ අදෘශ්‍යමාන හස්‌තයක්‌ ලබාදුන් නියෝග මත බව පැවසෙයි. යහපාලන ආණ්‌ඩුවේ ප්‍රධාන පෙළේ මැතිවරණ පොරොන්දුවක්‌ වූයේ ලසන්ත ඝාතනයේ මිනීමරුවන් අත්අඩංගුවට ගැනීමය. ලසන්ත ඝාතනය එවකට දේශපාලන වේදිකාවල රැව් පිළිරැව් දෙන්නට විය.

යහපාලන ආණ්‌ඩුව බලයට පත්වීමෙන් පසු 2015 වර්ෂයේ සැප්තැම්බර් 18 වැනිදා ලසන්ත ඝාතන විමර්ශන කටයුතු අපරාධ පරීක්‍ෂණ දෙපාර්තමේන්තුව වෙත (සී.අයි.ඩීය.) භාර කළේය.

ලසන්ත වික්‍රමතුංග ඝාතනයේ විමර්ශන කටයුතු සී.අයි.ඩි.ය විසින් ඉතාම ක්‍රමවත්ව විනිවිද භාවයකින් යුතුව ක්‍රියාත්මක කරන්නට පටන් ගත්හ.

ලසන්ත ඝාතන සිද්ධිය සම්බන්ධයෙන් යුද හමුදාවේ නිලධාරීන් 400 කට අධික පිරිසකගෙන් සීඅයිඩීය ප්‍රශ්න කර ප්‍රකාශ ලබා ගත්හ. එමෙන්ම එවකට යුද හමුදාපතිවරයාව සිටි සරත් ෆොන්සේකා සීඅයිඩීයට කැඳවා ඔහුගෙන් ද ප්‍රශ්න කළේය.

ලසන්ත ඝාතන සිද්ධිය සම්බන්ධයෙන් මුලින්ම අත්අඩංගුවට පත්වන්නේ යුද හමුදාවේ සාජන් මේජර් උදලාගමය. ඔහු අත්අඩංගුවට ගන්නේ ලසන්තගේ රියෑදුරු පැහැරගෙන ගොස්‌ තර්ජනය කිරීමේ චෝදනා මතය.

ලසන්ත වික්‍රමතුංග ඝාතනයට එල්.ටී.ටී.ඊ.ය සම්බන්ධ දැයි සෙවීමේ විමර්ශනයක්‌ ද ක්‍රියාත්මක කිරීමට සීඅයිඩිය කටයුතු කළේය.

මෙම ඝාතනය සිදු වී දින කීපයකට පසු අත්තිඩිය ඇළෙන් මතු වූ යතුරුපැදිය පිළිබඳව සෙවීමේ විමර්ශන සීඅයිඩිය කරගෙන ගියේය. එහිදී ඉතාම වැදගත් තොරතුරක්‌ හෙළිකර ගැනීමට සීඅයිඩියට හැකි විය.

ලසන්ත ඝාතනයට පැමිණි පුද්ගලයන් ගමන් ගත් යතුරුපැදියක්‌ අත්තිඩිය ඇළේ ගිල්වා ඇති බවට අරවින්දන් නමැති අයකු විසින් තොරතුරක්‌ තමන් වෙත ලබා දෙන්නේ 2009 ජනවාරි 26 වැනිදා බව පොලිස්‌පතිවරයා දැනුම්දී තිබිණි. එහෙත් යතුරුපැදියක්‌ අත්තිඩිය ඇළේ ගිල්වා ඇති බවට තොරතුරු පොලිස්‌පතිවරයා බස්‌නාහිර උතුර නියෝජ්‍ය පොලිස්‌පතිවරයා වෙත දැනුම් දෙන්නේ ජනවාරි 25 වැනිදාය. එම පරස්‌පර තොරතුරු පිළිබඳව සී.අයි.ඩිය විමර්ශන කළේය.

එමෙන්ම අත්තිඩිය ඇළේ ගිල්වා තිබියදී සොයාගත් යතුරුපැදියේ දෙවැනි හිමිකරු සොයා ගිය පොලිසිය ඉතාම වැදගත් තොරතුරු රැසක්‌ සොයා ගත්තේය.

යතුරුපැදියේ හිමිකරු රන් භාණ්‌ඩ නිෂ්පාදනකරුවකු බවත්, ඔහු වවුනියාව ප්‍රදේශයේ පදිංචිකරුවකු බවත් හෙළිකර ගත්තේය. කොළ පැහැති වෑන් රථයක පැමිණි නාඳුනන සන්නද්ධ කණ්‌ඩායමක්‌ යතුරුපැදිය සමඟ එහි හිමිකරු වූ විග්නකුමාර් සහ ඔහුගේ මිතුරකු 2009 වර්ෂයේ ජනවාරි 18 වැනිදා වවුනියාවේදී පැහැරගෙන ගොස්‌ තිබූ බව සීඅයිඩිය සොයා ගත්තේය. මේ පැහැරගැනීම ඇසින් දුටු සාක්‍ෂි කීපයක්‌ ද සීඅයිඩියට ලැබී තිබිණි. නාඳුනන පිරිස විසින් මෙම යතුරුපැදිය පැහැර ගත්තේ ලසන්ත ඝාතනය වී දින 09 කට පසුවය.

පැහැරගැනීමට ලක්‌ වූ යතුරුපැදියේ හිමිකරුගේ සහ මිතුරාගේ මළ සිරුරු අනුරාධපුරයේ තිරප්පනේ තිබී සොයා ගත්තේ ලසන්ත ඝාතනය වී දින ගණනාවකට පසුවය. මෙම පුද්ගලයන් දෙදෙනාගේ මරණයන් පිළිබඳ පරීක්‍ෂණ පැවැත්වූ වෛද්‍යවරයා ඔවුන්ගේ හිස්‌කබල් දෙක තමන් සන්තකයේ තබා ගත්තේ කිසියම් විමර්ශනයක්‌ සිදුවූවොත් ඊට ඉදිරිපත් කිරීම සඳහා ය.

සීඅයිඩිය ලසන්ත ඝාතන සිද්ධිය සම්බන්ධයෙන් පරීක්‍ෂණ ආරම්භ කරද්දී මෙම වෛද්‍යවරයා මාතලේ ප්‍රදේශයේ රෝහලකට මාරු වී ගොස්‌ සිටියේය. සීඅයිඩී නිලධාරීන් වෛද්‍යවරයා සොයාගොස්‌ තිරප්පනේදී ඝාතනයට ලක්‌ වූ පුද්ගලයන් දෙදෙනාගේ හිස්‌කබල්වල කොටස්‌ ලබාගෙන ඔවුන්ගේ දරුවන්ගේ සිරුරේ කොටස්‌ ඩී.එන්.ඒ. පරීක්‍ෂණයකට භාජන කර ඔවුන්ගේ අනන්‍යතාව තහවුරු කර ගත්තේය.

ඒ අනුව තිරප්පනේදී හිසට වෙඩි තබා ඝාතනය කර තිබුණේ අත්තිඩිය ඇළෙන් ගොඩගත් යතුරුපැදියේ හිමිකරුගේ සහ ඔහුගේ මිතුරාගේ සිරුර බව සීඅයිඩිය අනාවරණය කර ගත්හ.

මෙම යතුරුපැදියේ හිමිකරු මෙන්ම ඔහුගේ මිතුරාද එල්ටීටීඊ සංවිධානයට කිසිම සම්බන්ධතාවක්‌ නැති අහිංසකයන් බව ද සීඅයිඩිය සොයා ගත්තේය. ලසන්ත ඝාතනයට එල්.ටී.ටී.ඊ.ය සම්බන්ධ වූ බවට ගොතා තිබූ වෘතාන්තය එයින් බැහැර කිරීමට සී.අයි.ඩි.යට හැකිවිය. අත්තිඩිය ඇළෙන් ගොඩගෙන තිබුණේ ලසන්ත ඝාතනය සඳහා පැමිණි සාහසිකයන් ගමන් ගත් යතුරුපැදිය බවට එවකට පොලිසිය විසින් ගෙතූ ගජබින්නයක්‌ බව අවසානයේ හෙළි විය. නාඳුනන පිරිසක්‌ විසින් මේ යතුරුපැදිය එහි හිමිකරු ද සමඟ පැහැරගෙන තිබුණේ ලසන්ත ඝාතනය වී දින නවයකට පසුවය.

ලසන්ත ඝාතනය යට ගැසීමට ගොතන ලද වෘතාන්තය වෙනුවෙන් ඒ අහිංසකයන් දෙදෙනාට තම ජීවිතවලින් වන්දි ගෙවීමට සිදුව තිබිණි.

ලසන්ත ඝාතනයේ අපරාධකරුවන් අත්අඩංගුවට ගැනීම වසර 09 ක තරම් කාලයක්‌ ඇදී යන්නේ එදා ගල්කිස්‌ස පොලිසිය මෙම විමර්ශන කටයුතු යට ගැසීම නිසාය. එදා ඉහළ පොලිස්‌ නිලධාරීන් ලසන්ත ඝාතන විමර්ශන කණපිට පෙරළීම නිසාය. ලසන්ත ඝාතන සිද්ධියට අදාළ විමර්ශන යට ගැසීම සාක්‍ෂි විනාශ කිරීම යන චෝදනා යටතේ අත්අඩංගුවට ගත් ගල්කිස්‌ස පොලිසියේ අපරාධ අංශයේ ස්‌ථානාධිපති තිස්‌ස සුගතපාල මේ වන විට සිටින්නේ බන්ධනාගාරගතවය.

එම චෝදනාවන් යටතේ අත්අඩංගුවට ගත් ජ්‍යෙෂ්ඨ නියෝජ්‍ය පොලිස්‌පති ප්‍රසන්න නානායක්‌කාර ද බන්ධනාගාරගත කෙරුණේය.

එවකට පොලිස්‌පතිවරයාව සිටි ජයන්ත වික්‍රමරත්නට එල්ල වී ඇත්තේ ද මේ චෝදනාවමය. ලසන්ත වික්‍රමතුංග ඝාතනයේ සැකකරුවන් නීතියේ රැහැනට නතුකර ගැනීමට සීඅයිඩියට සැබෑ වුවමනාවක්‌ ඇති බවක්‌ පෙනෙන්නට තිබෙයි. එහෙත් මේ විමර්ශන කරගෙන යද්දී සීඅයිඩියට මොන ආකාරයේ බලපෑම් එල්ල වේ දැයි කිව නොහැක. ඒ මන්ද යත් අපේ රටේ තවමත් සියල්ල සිදුවන්නේ දේශපාලන අවශ්‍යතාවන් මත වීම නිසාය.

ලසන්ත වික්‍රමතුංග ඝාතනයට ලක්‌ වී පසුගිය ජනවාරි 08 වැනිදාට වසර 09 ක්‌ ගත වී හමාරය. එහෙත් ලසන්ත වික්‍රමතුංගට හෝ ඔහුගේ පවුලේ සාමාජිකයන්ට තවමත් සාධාරණයක්‌ ඉටු වී නැත.

ලසන්ත වික්‍රමතුංග මෙරට පුරවැසියෙකි. රටේ පිළිගත් මාධ්‍යවේදියකු ලෙස සිටි අයෙකි. මහ දවල් දෙනෝදාහක්‌ දෙනා බලා සිටියදී ලසන්ත ඝාතනය වන්නේ ඉතාම සාහසික අන්දමටය. මෙම ඝාතනය සම්බන්ධයෙන් මොන තරම් විමර්ශන කළ ද සැබෑ ඝාතකයන් තවමත් නිදැල්ලේය.

ලසන්ත ඝාතනය සිදුවන්නේ කාගේ වුවමනාවටද, ඔහු ඝාතනය කළේ කවුරුන් විසින්ද යන්න තවමත් හෙළිදරව් කර ගැනීමට නොහැකි වීම කනගාටුවට කරුණකි.

ලසන්ත ඝාතන සිද්ධිය වටා සිටින අවශේෂ චරිත අත්අඩංගුවට ගැනීමෙන් පලක්‌ නැත. කළ යුත්තේ ලසන්තගේ නියම ඝාතකයන් අත්අඩංගුවට ගැනීමය. ඝාතනයට ලක්‌ වූ ලසන්ත වික්‍රමතුංග නමැති මාධ්‍යවේදියාට සාධාරණයක්‌ ඉටු වන්නේ එවිටය.

(අපරාධ පරීක්‍ෂණ දෙපාර්තමේන්තුව අධිකරණයට ඉදිරිපත් කළ වාර්තාවට අනුව ලිපිය සකස්‌ කරන ලදී.)

– හේමන්ත රන්දුණු

+++++++++++++++++++++++++++++++

+++++++++++++++++++++++++++++++

ලසන්ත ඝාතනයේ නියම මිනීමරුවා නිදැල්ලේ ?
(26.02.2018 – sinhala.srilankamirror.com)

සන්ඩේ ලීඩර් පුවත්පතේ හිටපු කර්තෘ ලසන්ත වික්‍රමතුංග මහතාගේ ඝාතනයට වගකිවයුතු නියම මිනීමරුවා තවමත් නිදැල්ලේ සිටින බවට මේවන විට මතයක් මතුව තිබේ.

ඒ ලසන්තගේ මරණය සම්බන්ධයෙන් මෙතෙක් කිසිදු සැකකරුවකු හෝ අත්අඩංගුවට ගෙන නොමැතිවීම නිසාය.

කිසිවකු අත්අඩංගුවට ගෙන ඇත්නම් ඒ ඝාතනයෙන් පසු එහි සාක්කි වෙනස්කිරීම හා සාක්කි කරුවන්ට බලපෑම් කිරීම සම්බන්ධයෙන් පමණකි.

එම චෝදනා යටතේ අත්අඩංගුවට පත්වූයේ යුද හමුදා බුද්ධි අංශයේ මාණ්ඩලික සැරයන් ප්‍රේම් උදුලාගම හා දැනට රක්ෂිත බන්ධනාගාරගත කර සිටින හිටපු ජ්‍යෙෂ්ඨ නියෝජ්‍ය පොලිස්පති ප්‍රසන්න නානායක්කාර සහ ගල්කිස්ස මූලස්ථාන පොලිසියේ අපරාධ අංශයේ හිටපු ස්ථානාධිපති උප පොලිස් පරීක්ෂක තිස්ස සුගතපාල යන සැකකරුවන්ය.

ප්‍රසන්නට හා සුගතපාලට මේ වනවිට මෙම ඝාතන සිද්ධියට අදාළ සාක්ෂි විනාශ කිරීම, තොරතුරු වසන් කිරීම, මනුෂ්‍ය ඝාතනයකට ආධාර අනුබල දීම ආදී චෝදනා එල්ලව තිබේ.

උදලාගමට එල්ල වූ චෝදනාව වී තිබුණේ ලසන්තගේ රියෑදුරෙකු බව කියන ඩයස්‌ නමැත්තකු පැහැරගෙන ගොස්‌ තර්ජනය කිරීමය. ඔහු අත්අඩංගුවට පත්වූයේ ලසන්ත ඝාතනයෙන් හත්වසරකට පසුවය.

ලසන්තගේ පරීක්ෂණයට අදාළව මේ වනවිට නවසිය පනස් දෙනකුගෙන් පමණ ප්‍රකාශ සටහන් කරගෙන ඇති බවත් ඉන් දෙසිය අනූ පස් දෙනකු යුද හමුදා බුද්ධි අංශ සාමාජිකයන් බවත් රහස් පොලිසිය අධිකරණය හමුවේ පසුගියදා හෙළිකර තිබිණි .

ලසන්ත වික්‍රමතුංග ඝාතනයට ලක්වීමට පෙර දින ඔහුගේ කාර්යාලය අසල යුද හමුදා බුද්ධි අංශ සාමාජිකයින් ගැවසුනු බවට පරීක්ෂණවලදී අනාවරණය වී ඇතැයි රහස් පොලිසිය මේවන විට හෙළිකර තිබේ.

ඝාතනය සිදුවීමට පෙර දින මාධ්‍යවේදී ලසන්ත වික්‍රමතුංගගේ කාර්යාලය අසල මරදාන ට්‍රිපෝලි හමුදා කඳවුරේ බුද්ධි අංශ නිලධාරීන් ගැවසී ඇති බවට පරීක්ෂණවලදී තොරතුරු අනාවරණය වී ඇති බව රහස් පොලිසිය අධිකරණය හමුවේ කියා ඇත.

මාධ්‍යවේදී ලසන්ත වික්‍රමතුංග මහතාගේ ඝාතනය සම්බන්ධයෙන් පරීක්‍ෂණ පැවැත්වීම සඳහා වර්ෂ 2008 ජනවාරි 01 වැනිදා සිට 2009 ජනවාරි 31 වැනිදා තෙක්‌ කාලය තුළ යුද හමුදා සන්නද්ධ බුද්ධි බළකායේ සියලු ක්‍රියාකාරකම් පිළිබඳ සම්පූර්ණ විස්‌තරයක්‌ ලබාදෙන්නැයි අපරාධ පරීක්‍ෂණ දෙපාර්තමේන්තුව යුද හමුදා නීති අංශයෙන් ඉල්ලීමක්‌ කර ඇතත් ඒවා සම්බන්ධ කිසිදු තොරතුරක් මෙතෙක් ලබා දී නොමැත.

ඒ අනුව එම බළකායේ කඳවුරු පිහිටි ස්‌ථාන එහි අණදෙන නිලධාරියාගේ නම, ජාතික හැඳුනුම්පත් අංකය, භාවිතා කළ දුරකථන අංක අදාළ නිලධාරීන් සඳහා ජංගම දුරකථන නිකුත් කළ නිලධාරියාගේ විස්‌තර භාවිතා කළ සියලු රථ වාහන හා එහි අංක හා එහි අයිතිකරුවන් පිළිබඳ විස්‌තර ලබාදෙන ලෙස ඉල්ලා තිබේ.

වසර 2010 ජනාධිපතිවරණය නිමවීමත් සමඟ 2010 පෙබරවාරි මස 26 වැනි දා ලසන්ත ඝාතනයට යැයි කියමින් කොහුවල යුද හමුදා කඳවුරේ 11 ක් දෙනෙක් අත්අඩංගුවට ගනු ලැබූහ.

යළිත් පහුවැනිදා තවත් හය දෙනෙක් අත්අඩංගුවට ගනු ලැබූහ.

මේ සියලු දෙනා එවකට සරත් ෆොන්සේකා මහතාගේ ආරක්ෂක රාජකාරියේ ආවේක්ෂණ රාජකාරි කළ පිරිසකි.

රජය පෙරළීමට කුමන්ත්‍රණය කිරීමේ චෝදනාවට රැඳවුම් නියෝග ගත්තතද මේ පිරිසෙන් නව දෙනෙක් දින හයකට පසු පොලිස් ඇප මත මුදා හැරිණි.

ඉතිරි අට දෙනා දින 11 කට පසු පොලිස් ඇප පිට මුදා හැරිණි. ට්‍රිපෝලි කඳවුරේ යුද හමුදා බුද්ධි සාමාජිකයා නීතිපති උපදෙස් පිට නිදොස් කොට නිදහස් කරනු ලැබීය.


කපිල හෙන්දාවිතාරණ

හිටපු හමුදාපතිගේ කට උත්තරය

එවකට හිටපු හමුදාපතිවරයා වූ සරත් ෆොන්සේකා මහතාගෙන් රහස් පොලිසිය කට උත්තරයක් ලබාගෙන තිබේ. එහිදී ෆොන්සේකා මහතා රහස් පොලීසියට ප්‍රකාශ කොට ඇත්තේ හිටපු බුද්ධි අංශ ප්‍රධානී මේජර් ජෙනරාල් කපිල හෙන්දාවිතාරණ මහතා යටතේ මෙහෙයවුණු කල්ලියක් මගින් පසුගිය රජය සමයේ මාධ්‍යවේදීන්ට එරෙහි ප්‍රහාර දියත් කෙරුණු බවය ෴

********************* ( නැවත මුල් පිටුවට ….. )

ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴

ප්‍රතිචාරයක් ලබාදෙන්න

ඔබගේ ඊමේල් ලිපිනය ප්‍රසිද්ධ කරන්නේ නැත. අත්‍යාවශ්‍යයය ක්ෂේත්‍ර සලකුණු කොට ඇත *