ඇලෝසියස්ට-පලිසේනට මරාගෙන මැරෙන්න අවස්ථාවක්..

(04.06.2018 – 15:50 +0530 – lankacnews.com)

පර්පචුවල් ටෙසරීස් සමාගම හෝ එයට අනුබද්ධ සමාගම් විසින් මැතිවරණ සදහා හෝ වෙනත් කාරණා සම්බන්ධයෙන් ආධාර හෝ පරිත්‍යාග ලබා දී ඇති සංවිධාන හෝ පුද්ගලයින්ගේ නාම ලේඛණයක් ලබා දෙන ලෙස නිදහස් හා සාධාරණ මැතිවරණයක් සදහා වූ ජනතා ව්‍යාපාරය (කැෆේ) පර්පචුවල් ටෙසරීස් සමාගමේ විධායක අධ්‍යක්ෂ අර්ජුන් ඇලෝසියස් හා එහි මූල්‍ය ප්‍රධානි කසුන් පලිසේන යන මහත්වරුන් වෙත ලිපියක් යවමින් තිබේ.

කැෆේ සංවිධානයේ විධායක අධ්‍යක්ෂ කීර්ති තෙන්නකෝන් මහතාගේ අත්සනින් යුතුව මෙම ලිපිය වැලිකඩ බන්ධනාගාරයේ කාර්ය භාර නිලධාරිවරයා මගින් අර්ජුන් ඇලෝසියස් මහතා වෙත සහ කසුන් පලිසේන මහතා වෙත යොමු කර තිබේ.

පාර්ලිමේන්තු මන්ත්‍රී වරුන්ගේ ගෞරවය රැක ගැනීම උදෙසා කරන කාරුණික ඉල්ලීමයි යන ශිර්ෂය යටතේ යොමු කර ඇති ලිපිය මගින් කැෆේ සංවිධානය පෙන්වා දෙන්නේ මෙසේ සත්‍ය ලෙස මුදල් අධාර හෝ පරිත්‍යාග ලබාගත් අය හෙළි කිරීම තුලින් එසේ නොගත් අයගේ ගෞරවය ආරක්ෂා වන බවයි.

මුදල් අධාර හා පරිත්‍යාග මෙන්ම මැතිවරණ ප්‍රචාරක කටයුතු වෙනුවෙන් පරිත්‍යාග ලබාදුන් අයගේ නාම ලේඛනය වෙන් වෙන් වශයෙන් ලබාදෙන ලෙසද කැෆේ සංවිධානය පර්පචුවල් ටෙසරීස් සමාගමේ ප්‍රධානීන්ගෙන් ඉල්ලා තිබේ. 2010 ජනවාරි 01 දින සිට 2017 දෙසැම්බර් 31 දක්වා දක්වා කාලය තුල තොරතුරු ලබා දෙන ලෙසද අදාල ලිපිය මගින් ඉල්ලා තිබේ.

පාර්ලිමේන්තු මන්ත්‍රීවරුන් 118 දෙනෙක් පර්පචුවල් ටෙසරීස් සමාගමෙන් මුදල් ලබාගත් බව එක් අවස්ථාවකදීත් 116 දෙනෙක් මුදල් ලබාගත් බව තවත් අවස්ථාවකදීත් කියවෙන බව අදාල ලිපියෙන් පෙන්වා දෙන කැෆේ සංවිධානය මෙහි සත්‍ය සංඛ්‍යාව දැන ගැනීම සියළු මන්ත්‍රීවරුන්ගේ ගෞරවයට හේතු වන බවද අදාල ලිපියෙන් පෙන්වා දී ඇත. රටේ නීතියට අනුව අල්ලස් හා කප්පම් ඉල්ලා සිටීමත් ලබා දීමත් වරදක් නමුත් එවන් ඉල්ලීමක් මෙම ලිපියෙන් නොකරන බවත් තමන් කැමති ඕනෑම අයෙකුට ආධාර හා පරිත්‍යාග ලබා දීම රටේ නීතියට අනුව වරදක් නොවන බැවින් මෙම ඉල්ලීම කරන බවත් කැෆේ සංවිධානය සිය ලිපිය මගින් වැඩි දුරටත් පෙන්වා දී තිබේ.

මෙම නාම ලේඛණය රුපියල් ලක්ෂයට වැඩි හා ලක්ෂ 05 ට වැඩි වශයෙන් වෙන්ව ලබා දෙන ලෙසත් මැතිවරණ කටයුතු සදහා ලබාදුන් අයගේ ලේඛණය වෙනම ලබාදෙන ලෙසත් අදාල ලිපියෙන් ඉල්ලා ඇත. මෙම ලේඛණය තමන්ට ලබා දීම නොසුදුසු යැයි හැගෙන්නේ නම් කතානායක තමා වෙත ලබාදෙන ලෙසද කීරිති තෙන්නකෝන් මහතා විසින් ඉල්ලා තිබේ.

මෙම ලිපියේ පිටපත් කතානායක, සභානායක, විපක්ෂ නායක, දිනේෂ් ගුණවර්ධන හා මහින්ද දේශප්‍රිය යන මහත්වරුන්ටද යවා ඇත.

– ජයකාන්ත ලියනගේ

+++++++++++++++++++++++++++++++++

ඇලෝසියස්ගෙන් මුදල් නොගත් බවට ගම්මන්පිල දිවුරයි
(04.06.2018 – 13:29 +0530 – sinhala.adaderana.lk)

තමන් ඇලෝසියස්ගෙන් කිසිම දවසක මුදල් නොගත් බව නිශ්චිතව සඳහන් කළ හැක්කේ දිවුරුම් ප්‍රකාශයකින් පමණක් වන බව පිවිතුරු හෙළ උරුමයේ නායක පාර්ලිමේන්තු මන්ත්‍රී උදය ගම්මන්පිල මහතා පවසයි.

අද‍ (04) කොළඹ පැවති එම පක්ෂයේ මාධ්‍ය හමුවකට එක්වෙමින් ඔහු මෙම අදහස් පළ කළේය.

අද දිනයේ දී ඒ අනුව දිවුරුම් කොමසාරිස්වරයෙකු ඉදිරියේ තමා අත්සන් තැබු බව ද දිවුරුම් ප්‍රකාශයක් හරහා බොරුවක් පවසන්නේ නම් වසර 2ක සිර දඩුවමක් ලැබිය හැකි බව ද ගම්මන්පිල මහතා මෙහිදී කියා සිටියේය.

කෙසේ වෙතත් මෙම දිවුරුම් ප්‍රකාශය හෙට (05) දිනයේ දී කතානායකවරයාට බාර දීමට කටයුතු කරන බව ද ඔහු වැඩිදුරටත් පැවසීය.

කෙදිනක හෝ බැඳුම්කර ගනුදෙනුව සිදු කළ 118 දෙනා හෙළි කර ගන්නා තුරු තමන්ගේ කීර්ති නාමය රැක ගැනීමට තිබෙන හොඳම ක්‍රමය මෙවැනි දිවුරුම් ප්‍රකාශයක් ලබා දීම බව තමා විශ්වාස කරන බව ද ගම්මන්පිල මහතා මෙහිදී සඳහන් කළේය.

************************************************

දකුණේ උණට හේතු හෙළිවේ
(04.06.2018 – 19:30 +0530 – hirunews.lk/sinhala)

දකුණු පළාත තුළ පැතිර යන වෛරස් උණ රෝගයට හේතුව ඉන්ෆ්ලූවෙන්සා ඒ, වෛරසය බවට ශ්‍රී ලංකා වෛද්‍ය පර්යේෂණ ආයතනය විසින් සිදුකළ පරීක්ෂණවලදී තහවුරු කරගෙන තිබෙනවා.

සෞඛ්‍ය අමාත්‍යාංශයේ අද පැවති මාධ්‍ය හමුවකට එක්වෙමින් වසංගත රෝග විද්‍යා අංශයේ වෛද්‍ය ජූඩ් ජයමහ මහතා මේ බව කියා සිටියා.

දැනට දකුණු පළාතේ පැතිර ගිය උණ රෝගය හේතුවෙන් කුඩා ළමයින් 12 දෙනෙකු ජීවිතක්ෂයට පත්වී තිබෙනවා.

කෙසේ වෙතත්, උණ රෝගය වැළඳී ඇති රෝගීන්ගේ අඩුවක් දකුණ පළාත තුළ මේ වන විට දක්නට ලැබෙන බවයි සෞඛ්‍ය සේවා අධ්‍යක්‍ෂ ජනරාල් විශේෂඥ වෛද්‍ය අනිල් ජාසිංහ මහතා එම මාධ්‍ය හමුවට එක්වෙමින් ප්‍රකාශ කළේ.

කෙසේ වෙතත්, රජයේ වෛද්‍ය නිලධාරීන්ගේ සංගමයේ ලේකම්, වෛද්‍ය හරිත අලුත්ගේ මහතා කොළඹ අද පැවැති මාධ්‍ය හමුවකදී කියා සිටියේ මේ සම්බන්ධයෙන් සෞඛ්‍ය බලධාරීන් මේ වන තෙක් නිසි ක්‍රියාමාර්ගයක් ගෙන නොමැති බවයි.

————————————–

********************* ( නැවත මුල් පිටුවට ….. )

ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴

Comments 1

ප්‍රතිචාරයක් ලබාදෙන්න

ඔබගේ ඊමේල් ලිපිනය ප්‍රසිද්ධ කරන්නේ නැත. අත්‍යාවශ්‍යයය ක්ෂේත්‍ර සලකුණු කොට ඇත *