සබීතාපාය පරදන ගිවිසුමක් ලංවිමෙන්.. මාසෙකට කෝටි 15 යි.. ව්‍යාපාරිකයාගේ හොද්ද බොරවේ..

(04.08.2018 – 10:40 +0530 – lankacnews.com)

මෙරට ප‍්‍රකට ව්‍යාපාරිකයෙකුට අයත් විදුලි බලාගාරයකින් ලංකා විදුලි බල මණ්ඩලය විදුලිය මිලට ගැනීම සදහා ගිවිසුමකට එළැඹ තිබේ.

ඒ අනුව මසකට රුපියල් කෝටි 15 බැගින් ගෙවමින් වසර තුනක කාලයක් විදුලිය ලබා ගැනීමට ගිවිසුමක් අත්සන් කර ඇත.

නියමිත ඒකක ගණන ඉක්මවා ලබා ගන්නා සෑම ඒකකයකටම රුපියල් 25-40 අතර මුදලක් ගෙවීමටද ගිවිසුම්ගතව සිටී.

මෙම ගිවිසුමේ විශේෂත්වය වන්නේ විදුලිය ලබා ගත්තද නැතද මාසිකව රුපියල් කෝටි 15 බැගින් ගෙවීමට එකග වීමයි.

මෙම අත්සන් කරන ලද ගිවිසුම විදුලි බල පනතට විරුද්ද යයි සදහන් කරමින් ඒ සම්බන්දයෙන් පරීක්‍ෂා කිරීම සදහා කෝප් කමිටුව විසින් විදුලි බල මණ්ඩල නිලධාරීන් ප‍්‍රශ්න කිරීම සදහා කැදවා ඇත ෴

************************************

සතොස සීනිත් සමග යූරියා කලවමේ විකුණයි..
(03.08.2018 – 17:30 +0530 – lankacnews.com)

වව්නියාව, සතොස ශාඛාවේ සේවකියන්ගේ අපරික්ෂාකාරී බව හේතුවෙන් සීනිවලට ‍යූරියා පොහොර කලවම්ව පාරිභෝගිකයින්ට විකිණී ඇති බව වව්නියාව නගර සභා මහජන සෞඛ්‍ය පරීක්ෂක නිලධාරීන් පවසති.

වව්නියාව මහජන සෞඛ්‍ය පරීක්ෂක නිලධාරී වරුන් පැවසූවේ වව්නියාව සතොස ශාඛාවෙන් ලබාගත් සීනි තුළ කිසියම් වෙනසක් පැවතීම සම්බන්ධයෙන් පාරිභොගිකයෙකු සිදුකළ පැමිණිල්ලක් මත පරීක්ෂා කිරීමේදී වව්නියාව සතොස ශාඛාවේ විකිණීමට තිබු සීනි උරයක් තුළ යූරියා පොහොර පවතින බවට ඊයේ(02) සවස අනාවරණය වු බවයි.

වව්නියාව සතොස ශාඛාවෙන් සීනි මිළදිගත් පිරිස් ‍වහාම අදාළ සීනි භාවිතයෙන් ඉවත් කරන ලෙසට වව්නියාව නගර සභා මහජන සෞඛ්‍ය පරීක්ෂක නිළධාරීන් පැවසූහ.

අදාළ සීනි රැගෙන ගිය පාරිභෝගික ජනතාව යුරියා මිශ්‍ර වි පවතින සීනි කුඩාදරුවන්ට හෝ වැඩිහිටියන්ට ලබාදී ඇත්නම් අදාළ සීනි පරිභෝජනය කළ පිරිස් වහාම රෝහල්ගත වන ලෙසටද මහජන සෞඛ්‍ය පරීක්ෂකවරුන් ඉල්ලා සිටිති.

වවුනියාව සතොස ශාඛාවෙන් ඊයේ දින සීනි ලබාගෙන පරිභෝජනය කළ පිරිස් වෙත වමනය යාම, ක්ලාන්ත ගතියක් ඇතිවිය හැකි බැවින් වහාම ළඟම පිහිටි රෝහල් වෙත ගොස් වෛද්‍ය ප්‍රතිකාර ලබාගන්නා ලෙසටද මහජන සෞඛ්‍ය පරීක්ෂකවරුන් ඉල්ලීම් කරති.

සතොස ශාඛාවෙන් භාණ්ඩ මිළදිගත් පුද්ගලයෙකු භාණ්ඩ ලබා‍ගෙන අදාළ භාණ්ඩ රැගෙන යාමට උරයක් ඉල්ලා ඇති අවස්ථාවේදී සතොස සේවකයෙකු පවසා ඇත්තේ ගබඩාවේ පවතින උරයක් ලබා‍ගන්නා ලෙසටයි එහිදි පොහොර උරයක අඩක් පැවති පොහොර තොගය සීනි යැයි සිතා සීනි පුරවා තැබු පෙට්ටියට අදාළ පුද්ගලයා පරික්ෂාවකින් තොරව හළා ඇති අතර, පසුව සතොස සේවකයෙකු ඊට උඩින් තවත් සීනි උරයක් හලා ඇති බව මූලික පරීක්ෂණයන්ගෙන් අනාවරණය වි ඇති බව මහජන සෞඛ්‍ය පරීක්ෂක නිලධාරීන් පැවසූහ.

අදාළ සීනි පෙට්ටිය තුළ පැවති සීනි පොහොර සමඟ කලවම් කොට සතොස සේවකයින් කිසිදු පරීක්ෂා කිරීමකින් තොරව විකුණා ඇති බවද මහජන සෞඛ්‍ය පරීක්ෂක නිලධාරීන් පැවසීය.

පාරිභෝගිකයින් පැමිණ චෝදනා කිරීම සම්බන්ධයෙන් සතොස සේවකයින් වව්නියාව පොලීසිය වෙත පැමිණිල්ලක් සිදුකොට ඇති අතර, එහිදි අදාළ සිද්ධිය සම්බන්ධයෙන් විස්තර අනාවරණය වු බවත්, අදාළ කාරණය සම්බන්ධයෙන් පුළුල් පරීක්ෂණ මෙහෙයවන බවද මහජන සෞඛ්‍ය පරීක්ෂක නිලධාරීන් සදහන් කළහ.

– වන්නි රොමේෂ් මධුෂංඛ

********************* ( නැවත මුල් පිටුවට ….. )

ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴

ප්‍රතිචාරයක් ලබාදෙන්න

ඔබගේ ඊමේල් ලිපිනය ප්‍රසිද්ධ කරන්නේ නැත. අත්‍යාවශ්‍යයය ක්ෂේත්‍ර සලකුණු කොට ඇත *