කතානායක රූකඩයෙක්.. ගේන්නේ ගොං තර්ක.. – කතානායකට කුණුම කුණු බැනුම්

(08.08.2018 – 15:00 +0530 – lankacnews.com)

කතානායකවරයා විපක්ෂ නායක ධුරය සම්බන්ධයෙන් එක්සත් ජනතා නිදහස් සන්ධානයේ මහලේකම්වරයාගේ මතය විමසීම හොරාගේ අම්මගෙන් පේන අහනවා වැනි වැඩක් යැයි ඒකාබද්ධ විපක්ෂයේ කැඳවුම්කරු, ගම්පහ දිස්ත්‍රික් පාර්ලිමේන්තු මන්ත්‍රී ප්‍රසන්න රණතුංග මහතා ප්‍රකාශ කළේය.

සන්ධාන ලේකම්වරයාගේ මතය විමසීමට කතානායකවරයාට කිසිදු අයිතියක් නැති බව පැවසු රණතුංග මහතා පක්ෂ ලේකම්වරුන් සමඟ ගනුදෙනුවක් ඇත්තේ මැතිවරණ කොමසාරිස්වරයාට මිස කතානායකවරයාට නොවන බවත් පෙන්වා දුන්නේය.

ප්‍රසන්න රණතුංග මහතා මෙසේ ප්‍රකාශ කළේ මිනුවන්ගොඩ, දෙවොලපොළ ප්‍රදේශයේ පැවැති ජනහමුවකට සහභාගී වෙමිනි. මන්ත්‍රීවරයා එහිදී වැඩිදුරටත් මෙසේ ද ප්‍රකාශ කළේය.

2015 අගෝස්තු මාසයේ පැවැති මහ මැතිවරණයෙන් පස්සේ එක්සත් ජාතික පක්ෂය සහ ශ්‍රී ලංකා නිදහස් පක්ෂය එකතු වෙලා ජාතික ආණ්ඩුවක් හදන්න ගිවිසුමක් ගැහුවා. ඒ ගහපු ගිවිසුමේ වලංගු කාලය අවුරුදු දෙකයි. ගිය අවුරුද්දේ සැප්තැම්බර් වෙන කොට ඒ ගිවිසුමේ කාලය අවසන් වුණා. තවමත් ඒ ගිවිසුම දීර්ඝ කරලා හෝ අලුත් ගිවිසුමක් ගහලා හෝ නැහැ.

එහෙම බලන කොට දැන් තියෙන්නේ නීති විරෝධී ආණ්ඩුවක්. මේ ආණ්ඩුව ගන්න සියලු තීන්දු නීතිවිරෝධියි. 19 වැනි සංශෝධනයේ පැහැදිලිව සඳහන් වෙනවා ඇමැති මණ්ඩලය 30කට සීමා විය යුතුයි කියලා. ඒ සීමාව පන්නන්න පුළුවන් වෙන්නේ ජාතික ආණ්ඩුවක් තියෙන කොට විතරයි. ආණ්ඩුව ජාතික ආණ්ඩු මරාලයක් අටවා ගත්තේ මේ නීතියෙන් රිංගන්නයි.

හැබැයි දැන් පක්ෂ දෙක නීත්‍යානුකූලව ගිවිසුමකට එළැඹිලා නැති පසුබිමක ඇමැති ධුර 30 කට වඩා පත් කිරීමත් නීතිවිරෝධියි. ඒ හින්දා ජනාධිපතිවරයා නායකත්වය දරන මේ ආණ්ඩුව රටේ නීතියට මෙන්ම ජනමතයටත් පටහැණි ආණ්ඩුවක්. ජනාධිපතිවරයා නීතියට ගරු කරනවා නම් වහාම මේ ආණ්ඩුව විසිරුවා හැරිය යුතුයි.

ඒකාබද්ධ විපක්ෂය පාර්ලිමේන්තුවේ විපක්ෂ නායක ධුරය ඉල්ලා සිටින්නේ 2015 ඉඳලයි. ආණ්ඩුව තමන්ට හීලෑ පක්ෂ දෙකක් වන දෙමළ සන්ධානයට සහ ජනතා විමුක්ති පෙරමුණට දීලා තියෙන්නේ නිල වශයෙන් ඒකාබද්ධයට හිමි විපක්ෂ නායක සහ විපක්ෂයේ ප්‍රධාන සංවිධායක ධුර දෙකයි.

ආණ්ඩුවට පාර්ලිමේන්තුවේ විපක්ෂ නායක ධුරය තීන්දු කරන්න අයිතියක් නැහැ. ඒ අයිතිය තියෙන්නේ කතානායකවරයාටයි. දැන් ඉන්නේ හීන් බබා සීයා වගේ බොරු බේගල් ඇද බාන කතානායකවරයෙක්. කරු ජයසූරිය මහත්තයා මේ විනාශ කරමින් යන්නේ එතුමාගේ ප්‍රතිරූපයටත් වඩා කතානායක කියන තනතුරේ ප්‍රතිරූපයයි.

එතුමාට දේශපාලන වශයෙන් අනාගතයක් නැති හින්දා මේ විදියට අත්තනෝමතිකව කටයුතු කරන එක වැරැදියි. අද කතානායක කියන්නේ අගමැතිගේ අල්ලේ නැටවෙන රූකඩයක්. ඉතිහාසයේ පත්වෙච්ච පක්ෂපාතීම සහ අසාර්ථකම කතානායකවරයා වශයෙන් කරු ජයසූරිය හඳුන්වා දෙන්න පුළුවන්.

කතානායකට කිසිම අයිතියක් නැහැ විපක්ෂ නායක ධුරය ගැන සන්ධානයේ මහලේකම්වරයාගේ මතය විමසන්න. ඒක හොරාගේ අම්මගෙන් පේන අහනවා වගේ වැඩක්. පක්ෂ ලේකම්වරුන් එක්ක ගනුදෙනුව තියෙන්නේ මැතිවරණ කොමසාරිස්ට මිසක් කතානායකට නෙමෙයි. බල්ලගේ වැඩේ බුරුවා කරන්න ගියාම වෙන දේ තමයි අද පාර්ලිමේන්තුවේ වෙමින් තියෙන්නේ.

පාර්ලිමේන්තුවේ මන්ත්‍රීවරුන් 70 ක් නියෝජනය කරන ඒකාබද්ධ විපක්ෂයට කතානායක ධුරය හිමිවිය යුතුයි. ඒකේ විවාදයක් නැහැ. අපි දිගින් දිගටම විපක්ෂ නායක ධුරය වෙනුවෙන් සටන් කරනවා. සම්බන්ධන් අද බලෙන් වාඩි වෙලා ඉන්නේ අපිට අයිති විපක්ෂ නායක පුටුවෙයි. සම්බන්ධන් ලැජ්ජා වෙන්න ඕනේ අනුන්ගේ පුටුවක බලෙන් වාඩිවෙලා ඉන්න එක ගැන.

මහින්ද අමරවීරට ඒක තීන්දු කරන්න අයිතියක් නැහැ. සන්ධානයේ මන්ත්‍රීවරුන් ආණ්ඩුවේ ඉන්න හින්දා ඒකාබද්ධයට විපක්ෂ නායකකම දෙන්න බැරි බව කියනවා. මේක මහ ගොන් තර්කයක්. එහෙම නම් කොහොමද 2015 දී නිමල් සිරිපාලට විපක්ෂ නායකකම දුන්නේ? එදත් සන්ධානයේ මන්ත්‍රීවරුන් පිරිසක් ආණ්ඩුවේ හිටියනේ?

ආණ්ඩුව දැන් ජනතාවගෙන් ප්‍රතික්ෂේප වෙලා ඉවරයි. එක පැත්තකින් ඡන්ද කල්දාලා ප්‍රජාතන්ත්‍රවාදය උල්ලංඝනය කරනවා. අනෙක් පැත්තෙන් පාර්ලිමේන්තු ප්‍රජාතන්ත්‍රවාදය බල්ලට දානවා. මේකද 2015 දී ජනතාවට දෙනවයි කිව්ව තරු පහේ ප්‍රජාතන්ත්‍රවාදය? මේකද දෙනවයි කිව්ව යහපාලනය කියලා අපි අහනවා.

මොන සෙල්ලම් දැම්මත් තව ඉතුරු වෙලා තියෙන්නේ අවුරුද්දයි. මීළග පළාත් සභා මැතිවරණයෙන් ජයග්‍රහණය කරලා ඒ ජයග්‍රාහී පිම්මෙන් 2019 ජනාධිපතිවරණය දිනන්න අපි සූදානම්. අපිට ආණ්ඩුවේ කිසිම කෙනෙක් එක්ක තරගයක් නැහැ. මෛත්‍රි රනිල් ජෝඩුවම එකට තියලා පරද්දන්න අපි සූදානම්.

– ප‍්‍රදීප් අනුර කුමාර

++++++++++++++++++++++++++++++++++

විජයකලාට නීතිය ක්‍රියාත්මක කරනකොට පාර්ලිමේන්තුව විසුරවලා තියෙයි… – විමල් කතානායකට කියයි…
(08.08.2018 – 10:40 +0530 – lankacnews.com)

කොටි සංවිධානය යළි ගොඩනැගිය යුතු බවට ප්‍රකාශයක් සිදු කළ විජයකලා මහේෂ්වරන් මන්ත්‍රීවරියට එරෙහිව නීතිමය පියවර ගන්නේ මෙම පාර්ලිමේන්තුව විසිරුවා හැර යළි ඡ්න්දයක් පැවැත්වීමෙන් අනතුරුවදැයි ඊයේ (07) පාර්ලිමේන්තුවේදී ජානිපෙ නායක, විමල් වීරවංශ මහතා කථානායකවරයාගෙන් ප්‍රශ්නකර සිටියේය.

මහේෂ්වරන් මන්ත්‍රීවරිය සභා ගැබට ඇතුළු වන අයුරු දුටු විගස රීති ප්‍රශ්නයක් නගමින් නැගී සිටි විමල් වීරවංශ මහතා මෙසේ ප්‍රශ්නකර සිටියේය.

මෙතෙක් විජයකලා මහේෂ්වරන් මන්ත්‍රීවරියට කිසිදු පියවරක් ගෙන නැත්තේ මන්දැයි විමසා සිටි විට කථානායකවරයා පවසා සිටියේ පොලිස් විමර්ශන නිම වී නැති නිසා නීතිපතිවරයා තමන්ට නීතිමය උපදෙස් ලබාදී නොමැති වීම මේ ප්‍රමාදයට හේතුව බවය.

– අනුරුද්ද බණ්ඩාර

.

ඔබතුමා විජයකලා මන්ත්‍රීතුමියට නීතිය ක්‍රියාත්මක කරනකොට පාර්ලිමේන්තුව විසුරවලා තියෙයිවිමල් කතානායකට කියයි

Posted by Wimal weerawansa on Tuesday, August 7, 2018


********************* ( නැවත මුල් පිටුවට ….. )

ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴

ප්‍රතිචාරයක් ලබාදෙන්න

ඔබගේ ඊමේල් ලිපිනය ප්‍රසිද්ධ කරන්නේ නැත. අත්‍යාවශ්‍යයය ක්ෂේත්‍ර සලකුණු කොට ඇත *