සම්මාන වෙනුවෙන් මවුබිමට අපහාස කළ NGO හඳගමයාට දෙමළ රංගන ශිල්පිණිය රිදෙන්න කියූ කතාව!

(29.09.2018 – nethgossip.lk)

“සම්මාන ගන්න යුද්ධය විකුණනවා” මවුබිම වෙනුවෙන් අපේ සුන්දර දෙමළ රංගන ශිල්පිණියක් පෙරට – සම්මාන වෙනුවෙන් මවුබිමට අපහාස කළ රැඩිකල් හඳගමට රිදෙන්න කියූ කතාව !

ජාති ආගම් භේදයකින් තොරව ශ්‍රී ලංකාවේ රසික ජනයා මහත් ආදරයෙන් වැළදගත් ජනප්‍රියම ද්‍රවිඩ රංගන ශිල්පිණිය නිරංජනි ශන්මුගරාජා ය. නිරංජනි පසුගියදා ශ්‍රී ලංකාවේ සිනමාව පිළිබදව සිදු කළ ප්‍රකාශයක් කතාබහට ලක් විය.

http://nethgossip.lk/images/articles/2018/09/ff4007a06b002066195835ef4af50dcfb9a5c0cd.jpg

එහිදි ඇය දෙමළ රංගන ශිල්පීන්ට සිදුවූ අවාසනාවන්ත ඉරණමක් ගැන විස්තර කළේය. සම්මාන ලබා ගැනීමට සහ විදේශයන්ගෙන් සහ රාජ්‍ය නොවන සංවිධාන වලින් ඩොලර් අරමුදල් ලබා ගැනීමට මවුබිමට සහ රණවිරුන්ට අපහාස කරමින් චිත්‍රපටි අධ්‍යක්ෂණය කරනා අධ්‍යක්ෂකවරුන් එහිදි ඇය දැඩිව විවේචනය කළේය. සංහිදියාවට චිත්‍රපට නිෂ්පාදනය කරනවා යැයි කියමින් මෙම අධ්‍යක්ෂකවරු යුද්ධය විකුණමින් දෙමළ සිනමාව එක් සීමාවකට කොටු කරන බවට චෝදනා කළේය.

නිරංජනාගේ මෙම චෝදනාව සමාජයේ බොහෝ සෙයින් කතාබහට ලක්වූ මාතෘකාවක් වූ අතර මවුබිමට සහ රණවිරුවන්ට අපහාස කරමින් චිත්‍රපට සෑදු බොහෝ අධ්‍යක්ෂකවරු ඉතා ඉක්මණින් ධනවත් වූයේ කාගෙන් මුදල් ලැබි දැයි සමාජයේ දැඩි කතාබහක් ඇති වී තිබුනි. මෙලෙසට මවුබිමට අපහාස කරමින් නර්මාණ කරනා රැඩිකල් යැයි කියාගන්නා අධ්‍යක්ෂකවරු කිහිපදෙනෙක්ම ජනතාවගේ දැඩි දෝෂදර්ශනයට ලක්වී සිටියි.

මේ අතර නිරංජනිගේ එම කතාවෙන් ප්‍රහාරයට ලක්වූ රැඩිකල් පන්නයේ චිත්‍රපට අධ්‍යක්ෂකවරයෙක් වන අශෝක හඳගම, නිරංජනිගේ එම ප්‍රකාශය විවේචනය කරමින් සිය ෆේස්බුක් ගිණුමට සටහනක් තබා තිබුනා.

එම ප්‍රකාශයට නැවතත් පිළිතුරු ලබා දීමට නිරංජනි සිය ෆේස්සුක් ගිණුමේ තැබු සටහනක් කතාබහට ලක්වී තිබේ. එහිදි නිරංජනි පවසන්නේ අශෝක හඳගමට විඥානයේ දෑස් පෑදේවා යනුවෙනි. තමන්ගේ ප්‍රකාශය අශෝක හඳගමට හා ඔහුගේ කල්ලිවාදී රැඩිකල් සහචර පිරිසට සරළව නොතේරී ඇති බවත් නිරංජනි පවසනවා. තමන් සිනමාවට හඳුන්වා දුන්නේ හඳගම වුවද එම නිසාම ඔහුගේ ‘ඇජෙන්ඩා’වට නතුවී සැමදා සිටිය නොහැකි බවත් නිරංජනි පවසනවා.

නිරංජනීගේ පෙර ප්‍රකාශය පහතින්,

ඇයගේ ෆේස්බුක් සටහන පහතින්,

ඇවිස්සුනු අසෝක හඳගම අධ්‍යක්ෂක තුමාගේ විඥානයේ දෑස් පෑදේවා.

මීට දින කීහිපයකට පෙර මා ප්‍රධාන රංගන භූමිකාවක් නිරූපනය කල, දේවින්ද කෝන්ගහගේ මහතා විසින් රචනාකර අධ්‍යක්ෂනය කල “ගිරිවැසිපුර” සිනමා කෘතියේ මාධ්‍ය සමුළුවේදී මා දැක්වූ අදහස් සමූහයක් මේ වනවිට මුහුනුපොතේ මෙන්ම අන්තර්ජාලයේ බෙහෙවින් සංසරණය වේ.

එහිදී මා සරලව ඉදිරිපත් කල කරුණු කාරණා සරලව තෙරුම් ගත නොහැකිව, මාව රංගනයට ගෙනා වේ යයි පවසන හඳගම මහතා , කරුණු කාරණා අවිඥානිකව පටලවාගෙන , නිරපරාදේ උරණ වී, නොසෑහෙන්න මට අවලාද ස්වරූපයෙන් පෝස්ටුවක් පලකර ඇත. ඔහු එහිදී “සිංහලයාගේ අවිඥානය” කිතිකැවීමක් ගැන සඳහන් කර ඇත. මාගේ එම ප්‍රකාශය ඔහු හරි හැටි අවබෝධ කරගත්තේ නම් “සිංහල” ජන කුළකයේ පමණක් නොව දමිළ සමාජයේ විඥ්ඥානයට මා ආමන්ත්‍රණය කල බව ඔහුට වැටහෙනු ඇත. අවිඥානිකව මෙය දැක ඇත්තේ සිංහල හෝ දමිළ සමස්ත ජන සමාජය නොව, සිංහලයා අවිඥානික යැයි සිතාගෙන සිනමාවේ යෙදෙන හඳගම මහතා බව ඔහුටම පසක් වනු ඇත.

එහෙත් අවාසනාවට ඇත්ත කතාව නම්, මා කියූ දෙය ඔහුට හා ඔහුගේ කල්ලිවාදී රැඩිකල් සහචර පිරිසට සරළව නොතේරීමය.

එනිසා ඔහු කියූ පරිද්දෙන් මාගේ කතාවෙන් කිතිකැවී ඇත්තේ සිංහල අවිඥානික සමාජයද , එසේත් නැතිනම් ඇත්ත ඇති සැටියෙන් කියන විට ඇවිස්සී ඇත්තේ අවිඥානික ඔවුන්ද යන්න, ඔහුම සිතා බැලීම සුදුසුය.

මාව සිනමාවට හඳුන්වා දුන් අධ්‍යක්ෂවරයා ලෙස හඳගම මහතාට මා ගරු කලද, ඔහුගේ පෝස්ටුවේ ඇති යම් යම් හාස්‍යජනක හා අවිඥානික කතා කිහිපයක් ගැන ඇත්ත කියන්නට නැවතත් මාව පෙළඹවූයේ ඔහුමය.

හඳගම මහතා මාව සිනමාවට හඳුන්වා දුන් බව සැබෑය. එපමනින් , ඔවුන්ගේ ‘ඇජෙන්ඩා’වන්ට – මතයන්ට සදාකාලිකව නතුවිය යුතුද ? ඊට වෙන්ස් ව ගොස් ස්වාධීන මතයක් දැක්වූ පමනින් මෙසේ උරණ වීම තුල ඔහු විදහා දක්වන්නේ අවිඥානික බවම නොවේද? එනිසාම මා එම ප්‍රකාශයේ දක්වන කරුණු හඳගම මහතා පටලවා ගත් තරම කෙමෙන් මා ගෙනහැර දක්වන්නම්.

මා කියනා කරුණු ගැන ඔහු කතාකරනවාට වඩා , අදාල මාතෘකාවට පිටින් විවිධ අමතර ආරලු බූරලු කරුණු ගෙනහැර පාමින් අපහාස මුඛයෙන් කරුණු සාධාරණීකරනය කර කෝපය සංඥමයෙන් පිට කර ඇත.

මා බිසවට ඇන්දේ නිර්මාණයක චරිතයට විනා පෞද්ගලික ආකල්පයෙන් හෝ හැඟීමෙන් නොවන බව මාගේ ප්‍රකාශය තුලම ඇතිබව ඔහුට වැටහී නැති හැඩකි.

ඔහු මා රංගනයෙන් දායක වූ නිර්මාණ සියල්ලගේම නම් සහ ඒ නිර්මාණකරුවන් ගේ නම්ද සඳහන් කල අතර මෙම ප්‍රකාශය සිදුකල මාධ්‍ය සමුවට අදාල නිර්මාණයේ නම හෝ එහි නිර්මාණකරුගේ නම ලිවීමට ඔහුට අමතක වූ හැඩකි. එහිදී මා කියූ දේවල් සියල්ල ඔහුට අදාලය. එහෙත් එම ප්‍රකාශය කල නිර්මාණය අමතක වූවාද ? අමතක කලාද? දන්නේ ඔහුමය. ඒවාටද ඔහුට හේතු තිබිය හැක.

මාව ඉනියවන් චිත්‍රපටයට තෝරාගැනීම ගැන මා ඔහුට කෘතවේදීව ස්තූතිය පිරිනමමි. එහෙත් මා ඔහුගේ මතවාදී ආකල්පමය වහලෙකු හෝ සේවකයෙකු නොවන බව කාරුණිකව මතක්කර දිය යුතුමය.

ඔහු මාව ඉනියවන් සඳහා තෝරාගත්තේ, මාගේ ඇස්වල හිසකෙස් වල සහ ඇඟේ වර්ණය නිසාත්, එහි කර්කශක පෙනුම සහ තිදරු මවකගේ පෙනුමට මාව සරිලන නිසාත් බව ඔහු එහි සඳන් කර ඇත. ඔහු එම පෝස්තුවේ පලකර ඇති ඉනියවන් හී මාගේ පින්තූරය, චිත්‍රපටයට අදාල පෙනුමට එතරම්ම සාර්ථකව නිර්මාණය කර ඇත්තේ අංගරචනාවෙන් නාරද තොටගමුව මහතා බව, හඳගම මහතාට අමතකව ඇත. ඔහු පින්තූරයේ දක්වා ඇති පරිදි මාගේ පෙනුම දුටු පමණින් – එපමණකින් ඒ චරිතයට ගැලපුනේ නම් , අපාරාදේ නාරදගේ දායකත්වයක් තිබිලාම නැත.

අනික ඔහු කියනා පරිදි මාව තෝරාගෙන ඇත්තේ මාගේ පෙනුම නිසාමය. ඒ හැර මාගේ රංගන කුසලතාව නිසා නොවේ. මාගේ රංගන කුසලතාව ඔහු උකහාගෙන ඇත්තේ දර්ශන තලයේදීය.

හඳගම මහතා දක්ෂ පරිනත ප්‍රවීන අධ්‍යක්ෂවරයෙකි. එය රටම දන්නා කරුණකි.

එහෙත් පෙනුමට රංගනශිල්පීන් තේරීම, රංගන කුසලතාව නොමැති අයව දර්ශන තලයට ගෙනගොස් දර්ශන තලයේදී දස්කම් උකහා ගැනීම, දක්ෂ වෘත්තීය භාවයකින් යුතු පරිනත අධ්‍යක්ෂවරයෙකුගේ ස්වභාවයක් දැයි සිතිය යුතුය.

මා දන්නා පරිදි ‘කාස්ටින්’, එසේත් නැතිනම් චරිත තේරීමේදී පෙනුම මූලික සාධකයක් වන නමුදු, යමෙකුගේ පළමු රංගනයේ වුවද , රංගන කෞශල්‍ය ප්‍රධානතම සාධකයක් ය.

ඉනියවන් සිනමා කෘතියෙන් හඳුන්වා දෙන්නට පෙර මාගේ කලා ජීවිතය ඔහු හරිහැටි නොදන්නවා විය යුතුය.

මට කලාව උගැන්වූයේ – රංගනයට මාව මෙහෙයවූයේ – හුරුකලේ – හඳගම මහතාට මාව හඳුන්වා දුන්නේ කවුදැයි මතක්කර දීම හොඳබව මට සිතේ.

2009 වසරේ මා මහනුවරින් කොළඹට සේන්දුවූයේ ගායිකාවක් වීමටය. ඉන්පසුව එම වසරේ මා ජාතික රූපවාහිනියේ නිවේදිකාවක් ලෙස සේවය ඇරඹූවේය. ඉන්පසුව ගුවන්විදුලියේ හඬකැවීමේ ශිල්පිනියක් ලෙස කටයුතු කලේය. එහිදී මාව වේදිකාවට ගෙන වේදිකා නාට්‍ය කලාවට පුහුණු කර මාව වේදිකා රංගන ශිල්පිනියක් කලේ තරංගා ප්‍රියදර්ශනී නම් සිංහල කෙල්ලය. ඒ බව, මට ඉනියවන් සඳහා හොඳම රංගන ශිල්පිනියට හිමි සම්මානය ලැබූ විට ඇයව වේදිකාවට ගෙන ප්‍රසිද්ධියේ පැවසුවෙමි. එවකට එයටද මේ රැඩිකල් පිරිස උරණ විය. එහෙත් සැබෑව, සැබෑවමය. මාගේ රංගන කුසලතාව හැඩගැස්වූයේ තරංගා අක්කාමය. මා දන්නා පරිදි ඉනියවන් හී හඳගම මහතා සිදුකලේ මා තුල පැවති රංගන කුසලතාව සිනමාවට උචිතලෙස හැඩගැස්වීමය.

වේදිකා රංගනය සඳහා සිංහල හා දමිළ අංශ දෙකෙන්ම මා දායක වන්නේ ඉනියවන් හී රඟන්නට බොහෝ පෙරය. තරුණසේවා සභාවේ නාට්‍ය උලෙළේ හොඳම නිලියට හිමි සම්මනය මා ලබන්නේ ඉනියවන් රූගතකිරීම අතරතුරය. එතැන්පටන් මා කලාත්මක ගනයේ වේදිකා නාට්‍ය ගනනාවකට දායක වී සම්මන ලබා ඇත. හඳගම මහතා කියනා පරිදි ඒ කිසිදු කුසලතාවයක් ඉනියවන් සඳහා බලපාලාම නැත.

පෙනුමට පමනක් ‘කාස්ටින්’ කරනා අධ්‍යක්ෂ ක්‍රමවේදයට අනුව ඔහුගේ තර්කය ඔහුට පමණක් සාධාරණ විය හැක.

තමන්ගේ මතවාදයට අනුගත නම් – තම මතවාදී ආකල්පයන්ට වහල් නම් නියම රැඩිකල් අය ලෙස පිලිගෙන කල්ලි ගැසී අමුතු සංස්කෘතියක් අමුතු සිනමාවක් හරහා ලංකාවේ ජනවිඤ්ඤාණය තමන්ගේ ක්‍රමයට නතුකර ගෙන තම මතය හරියැයි සපථ කරන්නට වෙහෙසෙන පිරිසක් අතර, වෙනස් සාධාරණ හා අපක්ෂපාතී ස්වාධීන මතවාදයක් – ආකල්පයක් ඉදිරිපත් කලවිට, එතෙක් තමන්ගේ ඉවුරේ සිටි රැඩිකල්වාදීන්, අවිඤ්ඤානිකයින් බවට ලේබල් කරන ක්‍රමයක් පැවතීම මෙවන් අයගේ සාමාන්‍ය ක්‍රමය බව , ඒ කුළකයට පරිබාහිර බහුතරය දන්නා කරුණකි.

යමෙකු රැඩිකල් වීමේ නිර්නායකයන් තීරණය කරන්නේ ඔහුම බව ඔහුගේ පෝස්ටුවෙන් පෙනේ . ඔහුගේ ආකල්ප රාමුවට ගැනෙනෙ මනෝමූලික කරුණු අනුව යමෙක් රැඩිකල් වන්නේ නම්, ඒ තනැත්තා සවිඥ්ඥානික රැඩිකල් අයෙකි. එසේ නැතිනම් යමෙක් නිදහස් මතධාරී ස්වාධීන දැක්මකින් යුතුව අපක්ෂපාතී මත ඉදිරිපත් කරයි නම් “හඳගම තියරියට” අනුව “රැඩිකල් යැයි සිතාසිටිනා අයගේ අවිඥානය දුටුවා” වෙයි. ඔහුගේ මතවාදයට වහල් නොවනා අන් සැමගේ අවිඥානික බව ඔහුට පෙනෙන්නට පටන්ගනී.

මා ඉනියවන් හී රංගන ශිල්පිනියක් විනා, එහි රැඟපෑ පමණින් සදාකාලිකව එහි නිර්මාන කරුගේ මතයට ආකල්පයට මා එකඟ විය යුතුද? අනුගත විය යුතුද. වහලෙක් විය යුතුද? මා නිහඬ තාක් ඔවුනට මා හොඳය. ඒ රැල්ලට පිටින් ගිය විට, ඔහුගේ නිර්වචනයට අනුව ලංකාවේ සමස්ත ජනවිඥ්ඥානය මා කිතිකවනා කෙනා බවට ඔවුන්ම ලේබල කරයි. එසේ කියන්නෙ ඔහුම මිසක්, පොදු සමාජය නොවේ.

මා කිසි අකටයුත්තක් ප්‍රකාශ කර නැත. යුද්ධ වාතාවරණය තුල පීඩිත වූ සමස්ත දමිළ ජනයාගේ වේදනාව, එය වින්ඳ අයෙක් ලෙස, සිනමා කරුවෙකුට වඩා මා ප්‍රායෝගිකව හොඳින් දනී. මා යමක් කීවේ, සමස්ත සිංහල දමිළ පොදු ජනතව අරඹයා මිස, පෞද්ගලික මතවාදයක් ඔප්පු කිරීමට නොවේ. මා සරලව පවසන්නේ අප දමිළ ජනසමාජය හෝ රංගන ශිල්පීන් ශිල්පිනියන් ජන සමූහයක් ලෙස එකම මොඩලයක් තුල පමණක් සදා සිරවි යුතු නොවන බවය. නිර්මාණකරුවන් වෙනත් මානයන්ගේ නිර්මාණද කල යුතු බවය. මතබේදාත්මක, අසම්මත හෝ කටුක චරිතවලට පමණක් දමිළ අය සිර නොවිය යුතු බවය. මා දමිළ සමාජයට කීවේ විදේශීය නිර්මාණ අගයනවාට වඩා අපේකමට ගරුකරන ලෙසය. හඳගම මහතා කියනා පරිදි යුධ වාතාවරණයේ තත්වයන් සිනමාකරනයට නැගීමේ වරදක් නැත. එය ලොව පුරා සිදු වෙයි. එහෙත් නිර්මානකරුවන් ලෙස එකම රාමුවක සිරවී එකම දෙයක් ‘මාකට්’ කරමින් පමණක් සිටිනවාට වඩා දමිල සමාජය තුල බොහෝ සේ වෙනස් වූ, විවිධ මාතෘකා හා විෂයන් පවතින බවත් ඒවා නිර්මාණය කරන්නේ නම් මැනවියි යන්නත් එහිදී මා දැක්වීය.

මෙවැනි සරළ කාරණා කිහිපයක් මා ඉදිරිපත් කර ඇත. ඒවා අපක්ෂපාතීය; ස්වාධීනය. එහෙත් පාට කණ්නාඩි දමාගෙන ඒකමිතික විකෘති ආකල්පයකින් බලන යමෙකුට එම ප්‍රකාශ ‘ඇලජික්’ විය හැක.

මා හඳගම මහතාට හෝ ඔහුගේ මතවාදී සිනමාකරණයට දොස් නගා ද නැත. එම කුලකයේ අන් අයට ද දොස් නගා නැත. එහෙත් මේ රට විවේචනයන්ට විවෘතය නිදහස් රටකි. මා කලේ ඒ නිදහස තුල ස්වාධීන මතයක් – එසේත් නැතිනම් අදහසක් දැක්වීම පමණි. පිලිගන්නෝ එය පිලිගනිත්වා .. නොපිලිගන්නෝ නොපිලිගනිත්වා.

මා දක්වා ඇත්තේ ඔවුන් විසින් සැමවිට එක් පැත්තක් විතරක් පෙන්වනා දෙන කාසියේ, අනික් පැත්ත පෙන්වීම පමණි. ඒ අනික් පැත්ත පෙන්වා දෙනවාට ඒ මතවාදී කුලකයේ ගැත්තන් කොහොමත් අකමැතිය. මන්ද ඔවුන්ගේ යැපීම ඇත්තේ එතැනය.

ඔහු ලියා ඇති පරිදි, මේ දේශපාලන සමාජ ක්‍රමය සහ වර්තමානයේ අප ක්ෂේත්‍රයේ පවතින ස්වභාවය අනුව, සාමන්‍ය ක්‍රමවේදයට අනුව, මේ ක්ෂෙත්‍රය තුලින්ම සාධාරණ ලෙස කුසලතාවයෙන් යැපෙන සැමගේ වෘත්තීයභාවයේ අනාරක්ෂිත බවක් තිබීම පොදු සාදාධාරණ කරුණකි. එහෙත් විවිධ ‘ඇජෙන්ඩා’වන්ට අනුව කලාව විකිණෙන විකුණන ක්‍රමවේදයක් තුල ඇතමුන්ගේ වෘත්තීයභාවයේ ආරක්ෂාව සැලසෙන බව අද බහුතරයක් දනී. එසේ කලාවේ සිනමාවේ අදෘශ්‍යමාන (එහෙත් ජනතව හොඳින් දන්නා) ක්‍රමවේද තුලින් වෘත්තීයභාවයේ ආරක්ෂව සලසා ගන්නා යමෙක්, මා මේ කල ප්‍රකාශය හෝ රැජින ගේ චරිතය නිරූපනය කල පමණින්, මා උත්සාහ කරන්නේ ‘වෘත්තීමය ආරක්ෂව බලාපොරොත්තුවෙන්’ බව කීමම බොළඳය. මන්ද මාගේ ප්‍රකාශය තුල සැබෑ හරය ඔහුට නොවැටහුනු බැවිනි.

ඔවුන්ගේ මතවාදයට අනුව තැනෙන සිනමා කෘති හෝ කලා නිර්මාණ තුලින්, යුද්ධයෙන් පීඩිත සමස්ත සිංහල දමිළ පොදු සමාජයට සිදු වූ යහපත කුමක්දැයි ඔවුන් සමාජයෙන්ම ඇසිය යුතුව ඇත. සාමජයට යහපතක් වනවාට වඩා, සමාජයේ යම් යම් මාතෘකා හා යුධ අත්දැකීම ‘මාකට්’වීම හෝ ‘මාකට්’ කිරීම තුල තම තමන්ට යහපතක් නොවුනේද යන්න, කණ්නාඩියකින් බලා ස්වයං විවේචනයක නිරතවීම මනාය. මා කුමක් කීවත් ඒ කාරණා දැන් දැන් සමාජය නම් පැහැදිලිව දනී.

මේ පොස්ටුවෙන් පසු ඔහුගේ මතවාදී වහලුන් මට තව තවත් ප්‍රහාර එල්ල කරනු ඇත. එය සාමන්‍ය දෙයකි. ඊට කම් නැත . මන්ද සවිඤ්ඤානික සිංහල දමිළ මහජනයා මා කී දෙය හොඳින් වටහාගෙන ඇති නිසාය. එසැමට ස්තූතියි.

අවසානයේ මට කියන්නට ඇත්තේ එක් දෙයක් පමණි.

මතවාදයක වහලුන් නොවන්න…..

මා කී කවිය ඔබට නොතේරේ නම්, එය ඔබේ අවිඥානිකව බව විනා, මාගේ විඥ්ඥානයේ අර්බුධයක් නොවේ.

යමක් දෙස යහපත්ව දකින්නට විඥ්ඥානයේ නෙත් විවර වේවා.

මට ස්තූති කල ඔබට ස්තූතියි, හඳගම.

http://rasagossip.lk/wp-content/uploads/2018/03/e-2.png
https://srilankanmodel.lk/modelimages/srilankanmodel_1513695623_3370433.jpg

+++++++++++++++++++++

සම්මාන වෙනුවෙන් මවුබිමට අපහාස කළ NGO හඳගමයා

********************* ( නැවත මුල් පිටුවට ….. )

ඔබතුමා / ඔබතුමිය ගේ ඊමේල් ලිපිනය සඳහන් කිරීමට අකමැති නම් ඊමේල් ලිපිනය ලෙස abc@xyz.lk යන්න පහත පෝරමයට ඇතුලත් කොට ඔබතුමා / ඔබතුමිය ගේ ප්‍රතිචාර (සිංහල හෝ ඉංග්‍රීසි බසින්) ලබාදෙන්න ෴

ප්‍රතිචාරයක් ලබාදෙන්න

ඔබගේ ඊමේල් ලිපිනය ප්‍රසිද්ධ කරන්නේ නැත. අත්‍යාවශ්‍යයය ක්ෂේත්‍ර සලකුණු කොට ඇත *